Virat Kohli| విరాట్ కోహ్లీ @15,000

Published: 27 Sep 2026 • 08:56 PM

* వన్డేల్లో అరుదైన ఘనత

Virat Kohli| ఆకేరు న్యూస్, డెస్క్: టీమిండియా స్టార్ బ్యాటర్ విరాట్ కోహ్లీ వన్డే క్రికెట్‌లో అరుదైన మైలురాయిని అందుకున్నాడు. వన్డేల్లో 15,000 పరుగులు పూర్తి చేసిన ప్రపంచంలో రెండో బ్యాటర్‌గా కోహ్లీ చరిత్ర సృష్టించాడు. వెస్టిండీస్‌తో జరుగుతున్న తొలి వన్డేలో ఈ ఘనత సాధించాడు. కోహ్లీ కంటే ముందు క్రికెట్ దిగ్గజం సచిన్ టెండూల్కర్ మాత్రమే ఈ మార్క్‌ను అందుకున్నాడు.

తిరువనంతపురంలో హాఫ్ సెంచరీ

వన్‌డౌన్‌లో బ్యాటింగ్‌కు వచ్చిన కోహ్లీ ఆరంభం నుంచే దూకుడుగా ఆడాడు. కేవలం 40 బంతుల్లోనే హాఫ్ సెంచరీ పూర్తి చేశాడు. అనంతరం 58 పరుగుల వ్యక్తిగత స్కోర్ వద్ద అల్జారీ జోసెఫ్ వేసిన 29వ ఓవర్‌లో ఫోర్ బాదడంతో వన్డేల్లో 15 వేల పరుగుల మైలురాయిని చేరుకున్నాడు.

కోహ్లీ వన్డే కెరీర్

2008లో వన్డేల్లో అరంగేట్రం చేసిన విరాట్ కోహ్లీ.. ఇప్పటివరకు 315 మ్యాచ్‌ల్లో 15,000కుపైగా పరుగులు సాధించాడు. వన్డేల్లో అత్యంత నిలకడైన బ్యాటర్లలో ఒకరిగా కొనసాగుతున్నాడు.

ఛేదనల్లోనూ కోహ్లీకి ప్రత్యేక రికార్డు ఉంది. 160 ఇన్నింగ్స్‌లలో సుమారు 64 సగటుతో 8,000కుపైగా పరుగులు చేశాడు. ఇందులో 28 సెంచరీలు, 41 హాఫ్ సెంచరీలు ఉన్నాయి. 2012 ఆసియా కప్‌లో పాకిస్థాన్‌పై చేసిన 183 పరుగులు వన్డేల్లో కోహ్లీ అత్యధిక వ్యక్తిగత స్కోర్‌గా నిలిచాయి.