CMR Rice Millers Telangana
* వరంగల్ ఉమ్మడి జిల్లాలో వేడెక్కిన ధాన్యం వివాదం
* ధాన్యం దారి మళ్లించిన మిల్లర్లపై పోలీసు కేసులు
* రికవరీ నోటీసులు జారీ
ఆకేరు న్యూస్, వరంగల్ : ప్రభుత్వం అత్యంత ప్రతిష్టాత్మకంగా సేకరించి, సీఎంఆర్ (కస్టమ్ మిల్లింగ్ రైస్) కోసం అప్పగించిన ధాన్యాన్ని దారి మళ్లించి, అక్రమాలకు పాల్పడిన రైస్ మిల్లర్లపై ప్రభుత్వం అత్యంత కఠినంగా వ్యవహరిస్తోంది. సకాలంలో బియ్యం తిరిగివ్వని, ప్రభుత్వ ధాన్యాన్ని సొంతానికి వాడుకున్న మిల్లర్ల యజమానులపై క్రిమినల్ కేసులు పెట్టాలని అధికారులు సంచలన నిర్ణయం తీసుకున్నారు. ఉమ్మడి వరంగల్ జిల్లాతో పాటు మహబూబాబాద్, జనగామ తదితర ప్రాంతాల్లో ఈ తనిఖీలు మరియు చర్యలు వేగవంతమయ్యాయి.
*వరంగల్ జిల్లాలో కఠిన చర్యలు..
వరంగల్ జిల్లాలో 2023-24 వాసకాలం సీజన్లో సీఎంఆర్ కోసం ఇచ్చిన ధాన్యాన్ని సొంత అవసరాలకు వాడేసుకుని, బియ్యం తిరిగివ్వని మిల్లర్లపై కేసులు పెట్టాలని నిర్ణయించారు. ఇందులో భాగంగా ఇప్పటికే ఐదు మిల్లర్లపై రేంజ్లో ఫిర్యాదు చేసేందుకు అధికారులు సిద్ధమయ్యారు. రాయపర్తి మండలం కొండూరులోని పరమేశ్వర మిల్లుపై, అలాగే వరంగల్ మండలం మామానూరు రేంజ్లోని లక్ష్మి ఎంటర్ప్రైజెస్ మిల్లు యజమాన్యంపై అధికారులు ఇప్పటికే ఫిర్యాదు చేశారు.
అంతేకాకుండా వర్ధన్నపేట, గీసుగొండ, నర్సంపేట మండలాలకు చెందిన మరో మూడు మిల్లర్ల యజమానులపై సైతం ఫిర్యాదులు సిద్ధం చేశారు. త్వరలోనే రేపొద్దిక, మాపోద్దిక రేంజ్లలోనూ ఫిర్యాదు చేయనున్నట్లు పౌరసరఫరాల సంస్థ డీఎం తెలిపారు. సంబంధిత ఆధారాలతో పౌరసరఫరాల శాఖ అధికారులు నేరుగా పోలీస్ స్టేషన్లలో ఫిర్యాదులు దాఖలు చేస్తున్నారు.
*మహబూబాబాద్, జనగామ జిల్లాల్లోనూ విచారణ..
మహబూబాబాద్, జనగామ, హనుమకొండ జిల్లాల్లోనూ ధాన్యం పక్కదారి పట్టించిన మిల్లర్ల జాబితాలను అధికారులు సిద్ధం చేశారు. ఇప్పటికే కొన్ని యజమానులకు బకాయిలు చెల్లించాలంటూ తుది నోటీసులు జారీ చేయగా, మరికొందరికి రెవెన్యూ రికవరీ (RR) నోటీసులు అందజేశారు. ఈ విచారణలో భాగంగా జనగామ జిల్లా లింగాల ఘనపూరంలో ఇప్పటికే ఒక మిల్లుపై క్రిమినల్ కేసు నమోదైంది. ఈ మిల్లు యజమానికి యాదాద్రి భువనగిరి జిల్లా, సూర్యాపేట జిల్లాల్లోని మిల్లులతోనూ భాగస్వామ్యాలు ఉన్నట్లు తేలింది. ఆ మిల్లుల్లో కూడా ధాన్యం పక్కదారి పట్టిందనే కోణంలో సమగ్ర దర్యాప్తు కొనసాగుతోంది.
* కమిషనర్ ఆదేశాలతో రంగంలోకి..
సీఎంఆర్ ధాన్యం పెద్దమొత్తంలో పక్కదారి పట్టినట్లు తేలిన నేపథ్యంలో మిల్లర్లపై కఠిన చర్యలకు ప్రభుత్వం పక్కా ప్రణాళిక రచించింది. పౌరసరఫరాల సంస్థ కమిషనర్ ఆదేశాల మేరకు సంస్థ డీఎంలు, డీఎస్వోలు ఆయా జిల్లాల కలెక్టర్లతో ప్రత్యేకంగా సమీక్షలు నిర్వహించారు. పక్కదారి పట్టిన ధాన్యం ఎంత? మిల్లర్ల పూర్తి వివరాలు ఏమిటి? ఇప్పటివరకు ఎన్నిసార్లు హెచ్చరిక నోటీసులు ఇచ్చారు? రికవరీ నోటీసులు ఇచ్చిన తర్వాత మిల్లర్ల నుండి స్పందన ఏంటి? అనే అంశాలపై లోతుగా చర్చించారు.
బకాయిలు కట్టేందుకు ముందుకురాని యజమానులపై తక్షణమే క్రిమినల్ కేసులు పెట్టాలని తుది నిర్ణయం తీసుకున్నారు. వెలగని ధాన్యం విషయంలోనూ పెద్దసంఖ్యలో మిల్లర్లకు రెవెన్యూ రికవరీ చట్టం కింద నోటీసులు జారీ చేసేందుకు అధికారులు సన్నద్ధమవుతున్నారు.
About the Author
Please tell us what is wrong. Your report will be sent to the website team.
