Hanamkonda| పట్టభద్రుల ఓటరు నమోదుపై ప్రత్యేక దృష్టి

Published: 31 Oct 2026 • 06:29 PM

* అపార్ట్‌మెంట్ ప్రతినిధులతో వినోద్ కుమార్, వినయ్ భాస్కర్ భేటీ

ఆకేరు న్యూస్, హనుమకొండ: వరంగల్–నల్గొండ–ఖమ్మం పట్టభద్రుల ఎమ్మెల్సీ ఎన్నికలను దృష్టిలో ఉంచుకుని ఓటరు నమోదు కార్యక్రమంపై బీఆర్ఎస్ నాయకులు ప్రత్యేక దృష్టి సారించారు. ఇందులో భాగంగా వరంగల్ ట్రైసిటీస్ అపార్ట్‌మెంట్ వెల్ఫేర్ అసోసియేషన్ ప్రతినిధులతో మాజీ ఎంపీ, రాష్ట్ర ప్రణాళికా సంఘం మాజీ ఉపాధ్యక్షుడు బోయినపల్లి వినోద్ కుమార్, ప్రభుత్వ మాజీ చీఫ్ విప్, మాజీ ఎమ్మెల్యే దాస్యం వినయ్ భాస్కర్, మాజీ కుడా చైర్మన్ మర్రి యాదవరెడ్డి తదితరులు సమావేశమయ్యారు.

అపార్ట్‌మెంట్లలో అవగాహన

హనుమకొండలోని బోయినపల్లి వినోద్ కుమార్ నివాసంలో జరిగిన ఈ సమావేశంలో పట్టభద్రుల ఎమ్మెల్సీ ఎన్నికలకు సంబంధించి ఓటరు నమోదు ప్రక్రియపై విస్తృతంగా చర్చించారు. డిగ్రీ పూర్తి చేసి అర్హత కలిగిన ప్రతి ఒక్కరూ ముందుగానే ఓటరుగా నమోదు చేసుకోవాలని నాయకులు సూచించారు. ముఖ్యంగా అపార్ట్‌మెంట్లలో నివసించే పట్టభద్రులు, ఉద్యోగులు, యువతకు ఈ ప్రక్రియపై అవగాహన కల్పించాలని అసోసియేషన్ ప్రతినిధులను కోరారు.

ఓటు హక్కుపై పిలుపు

ప్రజాస్వామ్యంలో ఓటు హక్కు ఎంతో విలువైనదని, పట్టభద్రుల సమస్యలు, హక్కులు, ఆకాంక్షలకు ప్రాధాన్యత లభించాలంటే అర్హులైన ప్రతి ఒక్కరూ ఎమ్మెల్సీ ఎన్నికల్లో భాగస్వాములు కావాలని నాయకులు పేర్కొన్నారు. వరంగల్ ట్రైసిటీస్ పరిధిలోని అపార్ట్‌మెంట్లలో అర్హులైన పట్టభద్రులను గుర్తించి, వారి పేర్లు ఓటరు జాబితాలో నమోదు అయ్యేలా కృషి చేయాలని విజ్ఞప్తి చేశారు.

పట్టభద్రుల హక్కుల పరిరక్షణకు, వారి సమస్యలను శాసనమండలిలో ప్రస్తావించేందుకు ఓటరు నమోదును బాధ్యతగా తీసుకోవాలని నాయకులు పిలుపునిచ్చారు.