Leema Rose AIADMK | దేశంలోనే ధనిక అభ్యర్థి ?

*అన్నాడీఎంకే అభ్యర్థి లీమారోస్ ఆస్తుల చిట్టా చూస్తే షాక్ అవ్వాల్సిందే..

*అక్షరాలా రూ. 6,000 కోట్లు!

*ఎన్నికల బరిలో దేశంలోనే అత్యంత ధనిక అభ్యర్థిగా లీమారోస్?

*ఆరో తరగతే చదివారు.. కానీ ఆస్తులు వేల కోట్లు!

*తమిళనాడు ఎన్నికల్లో హాట్ టాపిక్‌గా మారిన మహిళా అభ్యర్థి.

ఆకేరు న్యూస్, డెస్క్: తమిళనాడు రాజకీయాల్లో ఇప్పుడు ఒకే ఒక పేరు మార్మోగిపోతోంది. అన్నాడీఎంకే (AIADMK) తరపున బరిలోకి దిగుతున్న లీమారోస్ (Leema Rose) సమర్పించిన ఆస్తుల అఫిడవిట్ చూసి సామాన్యులే కాదు, రాజకీయ దిగ్గజాలు కూడా నోరెళ్లబెడుతున్నారు. తిరుచ్చి జిల్లా లాల్గుడి నియోజకవర్గం నుంచి పోటీ చేస్తున్న ఆమె, తన కుటుంబానికి సుమారు 6,000 కోట్ల రూపాయల ఆస్తులు ఉన్నట్లు ప్రకటించారు.

*ఎవరీ లీమారోస్?
లీమారోస్ దేశవ్యాప్తంగా సంచలనం సృష్టించిన “లాటరీ కింగ్” శాంటియాగో మార్టిన్ భార్య. ఇటీవల ఆమె అన్నాడీఎంకేలో చేరి ప్రత్యక్ష రాజకీయాల్లోకి అడుగుపెట్టారు. సోమవారం నామినేషన్ దాఖలు చేసిన సందర్భంగా తన ఆస్తుల వివరాలను బహిర్గతం చేశారు.

*లీమారోస్ పేరు మీద ఉన్న వ్యక్తిగత ఆస్తులు:
అఫిడవిట్ ప్రకారం, ఆమె వ్యక్తిగత సంపద కళ్లు చెదిరేలా ఉంది:
బంగారం: 19 కిలోలు
వజ్రాలు: 1,217 క్యారెట్లు
వెండి: 13 కిలోలు
ప్లాటినం: 33 గ్రాములు
చరాస్తులు: రూ. 139.63 కోట్లు
స్థిరాస్తులు: రూ. 909.94 కోట్లు
అప్పులు: రూ. 8.57 కోట్లు

*భర్త మరియు కుటుంబ ఆస్తుల వివరాలు:
ఆమె భర్త శాంటియాగో మార్టిన్ పేరిట రూ. 887.36 కోట్ల విలువైన చరాస్తులు, రూ. 3,262 కోట్ల విలువైన స్థిరాస్తులు ఉన్నాయి. ఆయన వద్ద 281 గ్రాముల బంగారం, 9.83 క్యారెట్ల వజ్రాలు, 21 కిలోల వెండి మరియు 321 గ్రాముల విలువైన ముత్యాలు ఉన్నట్లు పేర్కొన్నారు. వీరి కుమారుడు జోస్ చార్లెస్ మార్టిన్ పేరిట రూ. 655 కోట్ల ఆస్తులు ఉన్నాయి. వెరసి కుటుంబం మొత్తం ఆస్తుల విలువ రూ. 6,000 కోట్లు దాటుతుందని అంచనా.

*చదువు తక్కువ.. కేసులు ఎక్కువ!
ఈ అఫిడవిట్‌లో మరో ఆసక్తికరమైన అంశం ఏమిటంటే.. లీమారోస్ చదువు కేవలం ఆరో తరగతి వరకు మాత్రమే. అయినప్పటికీ వేల కోట్ల సామ్రాజ్యాన్ని శాసిస్తున్నారు. ఇక ఆమెపై ప్రస్తుతం 4 క్రిమినల్ కేసులు పెండింగ్‌లో ఉన్నట్లు అఫిడవిట్‌లో వెల్లడించారు.

*ఎన్నికల్లో హాట్ టాపిక్:
లాటరీ వ్యాపారాల ద్వారా సంపాదించిన ఈ అపారమైన సంపద ఇప్పుడు తమిళ రాజకీయాల్లో చర్చనీయాంశమైంది. ఒక అభ్యర్థి ఇంత భారీ స్థాయిలో ఆస్తులు కలిగి ఉండటం దేశవ్యాప్తంగా చర్చకు దారితీస్తోంది. లాల్గుడి నియోజకవర్గంలో లీమారోస్ విజయావకాశాలు ఎలా ఉంటాయో వేచి చూడాలి.