JANGAON | ప్రభుత్వ అధికారి పేరుతో ఫోన్.. రూ. లక్ష మాయం

* ఫేక్ స్కీమ్.. ఫేక్ ఆఫీసర్: పల్లా రాజేశ్వర్ రెడ్డి ఫిర్యాదుతో వెలుగులోకి వచ్చిన భారీ మోసం

ఆకేరు న్యూస్, జనగామ: సైబర్ నేరగాళ్లు రోజురోజుకూ రెచ్చిపోతున్నారు. సామాన్యులే కాదు, చదువుకున్న వారు, అత్యున్నత పదవుల్లో ఉన్న ప్రజాప్రతినిధులు సైతం వీరి మాయలో పడి మోసపోతున్నారు. తాజాగా బీఆర్ఎస్ సీనియర్ నేత, జనగామ ఎమ్మెల్యే పల్లా రాజేశ్వర్ రెడ్డి సైబర్ నేరగాళ్ల బారిన పడటం ఇప్పుడు తెలంగాణవ్యాప్తంగా సంచలనం సృష్టిస్తోంది.

* ఘటన వివరాలు:
కేంద్ర ప్రభుత్వ ప్రతిష్టాత్మక పథకమైన ‘వికసిత్ భారత్’ పేరుతో ఈ మోసం జరిగింది. ఆదివారం ఉదయం ఎమ్మెల్యే పల్లా రాజేశ్వర్ రెడ్డికి ఒక గుర్తు తెలియని వ్యక్తి నుంచి ఫోన్ వచ్చింది. తాను తెలంగాణ ఆర్థిక శాఖ (Finance Department)లో అదనపు కార్యదర్శిగా పనిచేస్తున్నానని, తన పేరు అనంతరామిరెడ్డి అని పరిచయం చేసుకున్నాడు. ప్రభుత్వ యంత్రాంగంలో కీలక పదవిలో ఉన్న వ్యక్తిగా నమ్మించి పల్లాతో సంభాషణ ప్రారంభించాడు.

* మాయమాటలతో బురిడీ:
సదరు నిందితుడు ఎమ్మెల్యేను నమ్మించడానికి కేంద్ర ప్రభుత్వ పథకం ‘వికసిత్ భారత్’ గురించి వివరించాడు. ఈ పథకం కింద నియోజకవర్గంలోని అర్హులైన ఒక్కో లబ్ధిదారుడికి రూ. 10 లక్షల వరకు రుణాలు ఇప్పిస్తామని నమ్మబలికాడు. వెంటనే మీ నియోజకవర్గంలో ఉన్న 40 మంది అర్హులైన లబ్ధిదారుల జాబితా పంపాలని కోరాడు. అంతేకాకుండా, దరఖాస్తుకు ఇదే చివరి రోజని ఎమ్మెల్యేపై ఒత్తిడి తెచ్చాడు.

* డబ్బు బదిలీ.. ఆపై మాయం:
నిందితుడు పల్లా రాజేశ్వర్ రెడ్డితో మాట్లాడుతూ.. ఒక్కో దరఖాస్తు ప్రాసెసింగ్ ఫీజు కింద రూ. 2,500 చొప్పున మొత్తం 40 మందికి కలిపి రూ. 1 లక్ష వెంటనే ఫోన్ పే (PhonePe) ద్వారా పంపాలని కోరాడు. తన నియోజకవర్గ ప్రజలకు మేలు జరుగుతుందన్న ఉద్దేశంతో, ఎమ్మెల్యే వెంటనే ఆ మొత్తాన్ని సదరు వ్యక్తి చెప్పిన నంబర్‌కు బదిలీ చేశారు. డబ్బు అందిన కాసేపటికే ఆ వ్యక్తి ఫోన్ స్విచ్ఛాఫ్ రావడంతో తాను మోసపోయానని ఎమ్మెల్యే గుర్తించారు.

* కేసు నమోదు – పోలీసుల హెచ్చరిక:
ఈ ఘటనపై ఎమ్మెల్యే పల్లా రాజేశ్వర్ రెడ్డి పోలీసులను ఆశ్రయించారు. దీనిపై స్పందించిన సైబర్ క్రైమ్ పోలీసులు BNS సెక్షన్లు 319 (2), 318 (4) మరియు ఐటీ యాక్ట్ 66c, 66d కింద కేసులు నమోదు చేసి దర్యాప్తు ప్రారంభించారు.

* పోలీసుల సూచనలు:
ఉన్నతాధికారుల పేరుతో ఫోన్ కాల్స్ వచ్చినప్పుడు వెంటనే డబ్బులు పంపవద్దు.
సంబంధిత శాఖల ద్వారా అధికారికంగా సరిచూసుకోవాలి.
ఏదైనా అనుమానాస్పద కాల్స్ వస్తే వెంటనే 1930 నంబర్‌కు ఫిర్యాదు చేయాలి.