HYDERABAD | ఫేస్‌బుక్ మాయాజాలం

Published: 10 Apr 2026 • 10:50 AM

* వ్యాపారవేత్తగా నకిలీ అవతారం

ఆకేరు న్యూస్, హైదరాబాద్:
హైదరాబాద్‌ ముసారాంబాగ్‌కు చెందిన సూరజ్ శర్మ అనే యువకుడు కోఠిలోని ఒక ఆటోమొబైల్ దుకాణంలో పని చేసేవాడు. సామాన్య జీవితం గడుపుతున్నప్పటికీ, విలాసాలకు అలవాటు పడి ఫేస్‌బుక్‌లో తనను తాను ఒక కోటీశ్వరుడైన వ్యాపారవేత్తగా చిత్రించుకుంటూ నకిలీ ప్రొఫైల్ సృష్టించాడు. ఈ క్రమంలోనే జూబ్లీహిల్స్‌కు చెందిన ఒక వివాహితతో పరిచయం పెంచుకున్నాడు.

* ప్రేమ ముసుగులో మూడేళ్ల సహజీవనం..
తన మాటకారితనంతో సదరు మహిళను మభ్యపెట్టిన సూరజ్, ఆమెను ప్రేమిస్తున్నానంటూ నమ్మబలికాడు. వారి పరిచయం కాస్తా సాన్నిహిత్యానికి దారితీసింది. గత మూడేళ్లుగా ఆమెతో సహజీవనం (Live-in relationship) చేస్తూ, ఆమె నమ్మకాన్ని పూర్తిగా చూరగొన్నాడు. తాను పెద్ద బిజినెస్ మ్యాగ్నెట్ అని నమ్మించడానికి రకరకాల అబద్ధాలు ఆడాడు.

* అవసరం పేరుతో భారీ స్కెచ్…
బాధితురాలు తనను పూర్తిగా నమ్ముతుందని గ్రహించిన నిందితుడు, అసలు రూపం బయటపెట్టాడు. తన వ్యాపారంలో అత్యవసరంగా పెట్టుబడి పెట్టాలని, భారీ లాభాలు వస్తాయని నమ్మించి ఆమె నుండి విడతల వారీగా నగదు, నగలు కలిపి సుమారు కోటి రూపాయల సొత్తును వసూలు చేశాడు. డబ్బు చేతికి అందగానే తన ఫోన్ స్విచ్ఛాఫ్ చేసి అక్కడ నుంచి మాయమయ్యాడు.

* పోలీసుల వేట – కటకటాల్లో నిందితుడు…
మోసపోయానని ఆలస్యంగా గుర్తించిన బాధితురాలు జూబ్లీహిల్స్ పోలీసులను ఆశ్రయించింది. కేసు నమోదు చేసుకున్న పోలీసులు సాంకేతిక ఆధారాలతో నిందితుడి ఆచూకీ కనిపెట్టి, సూరజ్ శర్మను అరెస్ట్ చేశారు. సోషల్ మీడియాలో పరిచయమయ్యే వ్యక్తుల పట్ల అప్రమత్తంగా ఉండాలని, ఆకర్షణీయమైన ప్రొఫైల్స్ చూసి మోసపోవద్దని పోలీసులు హెచ్చరిస్తున్నారు.