CM REVANTH REDDY | త్వరలోనే వేల ఉద్యోగాలు

* సీఎం రేవంత్ రెడ్డి మార్క్ ప్లానింగ్..

ఆకేరు న్యూస్, హైదరాబాద్: తెలంగాణ రాష్ట్రానికి పెట్టుబడుల ప్రవాహం పెరగడమే కాకుండా, కుదుర్చుకున్న ఒప్పందాలన్నీ త్వరితగతిన కార్యరూపం దాల్చాలని ముఖ్యమంత్రి శ్రీ ఎ. రేవంత్ రెడ్డి అధికారులను ఆదేశించారు. దావోస్ పర్యటనతో పాటు ‘తెలంగాణ రైజింగ్ గ్లోబల్ సమ్మిట్’లో వివిధ అంతర్జాతీయ సంస్థలతో కుదిరిన అవగాహనా ఒప్పందాల (MoUs) పురోగతిపై ఆయన సచివాలయంలో ఉన్నతస్థాయి సమీక్ష నిర్వహించారు. ఈ సమావేశంలో ఐటీ, పరిశ్రమల శాఖ మంత్రి శ్రీ దుద్దిళ్ల శ్రీధర్ బాబు, ప్రభుత్వ ప్రధాన కార్యదర్శి మరియు ఇతర కీలక అధికారులు పాల్గొన్నారు. ఈ సందర్భంగా సీఎం రేవంత్ రెడ్డి పలు కీలక ఆదేశాలు జారీ చేశారు.

* మూడు కేటగిరీలుగా ప్రాధాన్యతలు:

పెట్టుబడులకు ముందుకొచ్చిన సంస్థలను వాటి స్థాయి, పేరు ప్రఖ్యాతులను బట్టి మూడు కేటగిరీలుగా విభజించాలని సీఎం సూచించారు. పెద్ద సంస్థలకు మొదటి ప్రాధాన్యతనిస్తూ, వాటికి అవసరమైన అనుమతులు, వసతులను తక్షణమే కల్పించాలని ఆదేశించారు.

* భూసేకరణపై స్పెషల్ ఫోకస్:

పెట్టుబడులు పెండింగ్‌లో ఉండటానికి భూసేకరణ ప్రధాన అడ్డంకి కాకూడదని సీఎం స్పష్టం చేశారు. ఫ్యూచర్ సిటీతో పాటు ఇతర ప్రాంతాల్లో కేటాయించిన భూములకు సంబంధించి పెండింగ్‌లో ఉన్న పనులను సత్వరమే పూర్తి చేయాలని అధికారులను ఆదేశించారు.

* రియల్ టైమ్ మానిటరింగ్ డ్యాష్‌బోర్డ్:

పారదర్శకత కోసం, ప్రతి ఎంవోయూ స్థితిగతులను పర్యవేక్షించడానికి ఒక ‘రియల్ టైమ్ అప్‌డేట్ డ్యాష్‌బోర్డ్’ ఏర్పాటు చేయాలని ముఖ్యమంత్రి సూచించారు. దీని ద్వారా ఏ కంపెనీ ఎంత పెట్టుబడి పెడుతోంది? ఎన్ని ఉద్యోగాలు వస్తున్నాయి? పనులు ఏ దశలో ఉన్నాయి? అనే అంశాలను సీఎంఓ మరియు మంత్రులు నేరుగా పర్యవేక్షించవచ్చు.

* మౌలిక వసతులు & డేటా సెంటర్లు:

భవిష్యత్ అవసరాలకు తగ్గట్టుగా మౌలిక సదుపాయాలు ఉండాలని సీఎం ఆదేశించారు. ముఖ్యంగా డేటా సెంటర్ల నిర్వహణకు భారీగా నీరు అవసరమవుతుంది కాబట్టి, తాగునీటిని వాడకుండా ఎస్‌టీపీల (STPs) ద్వారా శుద్ధి చేసిన నీటిని వినియోగించుకునేలా ప్రణాళికలు సిద్ధం చేయాలని చెప్పారు.

* ఐటీ టవర్ల విస్తరణ:

కేవలం హైదరాబాద్‌కే పరిమితం కాకుండా టైర్-2, టైర్-3 నగరాల్లో (వరంగల్, కరీంనగర్, ఖమ్మం వంటివి) ఏర్పాటు చేసిన ఐటీ టవర్ల పనితీరుపై ఆయన ఆరా తీశారు. ద్వితీయ శ్రేణి నగరాల్లో కూడా ఐటీ కార్యకలాపాలు ముమ్మరం కావాలని ఆకాంక్షించారు.

* జైకా (JICA) నిధుల వినియోగం:

పరిశ్రమలు, ఐటీ రంగాల అభివృద్ధి కోసం జైకా నిధులతో చేపట్టనున్న ప్రాజెక్టుల వేగాన్ని పెంచాలని, నిధులను సద్వినియోగం చేస్తూ పనులను నాణ్యతతో పూర్తి చేయాలని అధికారులకు సూచనలు చేశారు.