TGSRTC STRIKE | మంత్రి పొన్నం ప్రభాకర్ రిక్వెస్ట్

Published: 23 Apr 2026 • 06:59 AM

* చర్చలకు సిద్ధమన్న ప్రభుత్వం, సమ్మె విరమించాలని విజ్ఞప్తి

ఆకేరు న్యూస్, హైదరాబాద్: తెలంగాణ రాష్ట్ర రోడ్డు రవాణా సంస్థ (TGSRTC) కార్మికులు చేపట్టిన సమ్మెపై రాష్ట్ర రవాణా శాఖ మంత్రి పొన్నం ప్రభాకర్ కీలక వ్యాఖ్యలు చేశారు. కార్మికులు లేవనెత్తిన 32 డిమాండ్లలో 29 అంశాలను పరిష్కరించేందుకు ప్రభుత్వం సానుకూలంగా ఉందని, మిగిలిన మూడు అంశాలపై సాంకేతిక కమిటీ వేసి చర్చలు జరుపుతామని ఆయన స్పష్టం చేశారు. ఈ మేరకు సమ్మెను తక్షణమే విరమించి విధుల్లో చేరాలని ఆయన కార్మికులకు విజ్ఞప్తి చేశారు.

* ప్రభుత్వ రాయితీలు – కీలక నిర్ణయాలు…

మంత్రి పొన్నం ప్రభాకర్ మాట్లాడుతూ, ఆర్టీసీని కాపాడుకోవాల్సిన బాధ్యత అందరిపై ఉందన్నారు. గతంలో పెండింగ్‌లో ఉన్న అంశాలపై ప్రభుత్వం ఇప్పటికే కీలక చర్యలు తీసుకుందని గుర్తు చేశారు.

బాండ్ల చెల్లింపు: 2013 బాండ్ల కింద సుమారు ₹280 కోట్లను కార్మికులకు అందజేశామని తెలిపారు. దాదాపు 1134 మందికి కారుణ్య నియామకాల ద్వారా ఉద్యోగ అవకాశాలు కల్పించామన్నారు. ఆర్టీసీ నిర్వహణ కోసం ప్రభుత్వం ప్రతి నెలా ₹300 కోట్ల నుంచి ₹400 కోట్ల వరకు నిధులు కేటాయిస్తోందని వివరించారు.

* రాజకీయ విమర్శలు – కుట్ర కోణం..

సమ్మె వెనుక రాజకీయ ప్రేరేపిత కుట్రలు ఉన్నాయని మంత్రి ఆరోపించారు. సీనియర్ అధికారులతో కూడిన కమిటీ ఐదు గంటల పాటు చర్చలు జరుపుతున్న సమయంలో, కార్మికులు మధ్యలోనే వాకౌట్ చేయడం సరికాదని ఆయన అభిప్రాయపడ్డారు. “మహాలక్ష్మి” పథకం (మహిళలకు ఉచిత బస్సు ప్రయాణం) ద్వారా రోజుకు 40 లక్షల మంది మహిళలు లబ్ధి పొందుతున్నారని, ఈ పథకాన్ని దెబ్బతీసేందుకు కొందరు ప్రతిపక్ష నాయకులు కార్మికులను తప్పుదోవ పట్టిస్తున్నారని ఆయన మండిపడ్డారు.

* ప్రయాణికుల భద్రత ప్రధానం…

రాష్ట్రవ్యాప్తంగా ప్రతిరోజూ 65 లక్షల మంది సామాన్య ప్రజలు ఆర్టీసీపైనే ఆధారపడి ప్రయాణిస్తారని, వారిని ఇబ్బందులకు గురిచేయడం ధర్మం కాదని మంత్రి అన్నారు. కార్మికుల శ్రేయస్సు కోరే ప్రభుత్వంగా, తాము చర్చలకు ఎప్పుడూ సిద్ధంగా ఉన్నామని, సానుకూల వాతావరణంలో సమస్యలను పరిష్కరించుకుందామని ఆయన పిలుపునిచ్చారు.