HYDERABAD | కిలోమీటర్లమేర స్తంభించిన ట్రాఫిక్

ఆకేరు న్యూస్ హైదరాబాద్ : భాగ్యనగర గుండెకాయ వంటి ఎంజే మార్కెట్ (MJ Market) శనివారం ఉద్రిక్త పరిస్థితులకు వేదికైంది. తమ జీవనోపాధిని కాపాడుకోవాలంటూ స్థానిక ఆటో డ్రైవర్లు చేపట్టిన ఆకస్మిక నిరసనతో నగరం ఒక్కసారిగా అప్రమత్తమైంది. ఇతర రాష్ట్రాల డ్రైవర్ల చొరబాటుతో తమ ఉపాధి దెబ్బతింటోందంటూ ఆటో కార్మికులు గళమెత్తారు.నగరంలోని ఆటో డ్రైవర్లు ప్రధానంగా “నాన్-లోకల్” ఆటోల పైన తమ నిరసనను వ్యక్తం చేస్తున్నారు.

 *అక్రమ రవాణా – ఆదాయానికి గండి

ఇతర రాష్ట్రాల (ప్రధానంగా పొరుగు రాష్ట్రాల) రిజిస్ట్రేషన్లతో ఉన్న ఆటోలు హైదరాబాద్ నగరంలో యధేచ్ఛగా తిరుగుతున్నాయి.స్థానికంగా పర్మిట్లు పొంది, ట్యాక్సులు చెల్లిస్తున్న తమకు గిరాకీలు దొరక్కుండా ఇతర రాష్ట్రాల వారు తక్కువ ధరలకే సేవలు అందిస్తూ తమ పొట్ట కొడుతున్నారని డ్రైవర్లు వాపోయారు.

 *అధికారుల నిర్లక్ష్యం

నిబంధనలకు విరుద్ధంగా నడుస్తున్న ఈ వాహనాలపై రవాణా శాఖ అధికారులు కఠిన చర్యలు తీసుకోవడం లేదని వారు ఆగ్రహం వ్యక్తం చేశారు.

*కిలోమీటర్ల మేర జామ్- వాహనదారులకు తప్పని తిప్పలు

ఎంజే మార్కెట్ చౌరస్తా అనేది అబిడ్స్, కోటి, నాంపల్లి మరియు బేగంబజార్ వంటి కీలక ప్రాంతాలను కలిపే ప్రధాన జంక్షన్. ఆటో డ్రైవర్లు వందలాది ఆటోలను రోడ్డుకు అడ్డంగా నిలిపివేయడంతో ట్రాఫిక్ వ్యవస్థ పూర్తిగా అస్తవ్యస్తమైంది.ఎంజే మార్కెట్ నుండి నాంపల్లి వైపు, అటు మొజాంజాహి మార్కెట్ నుండి అబిడ్స్ వైపు కిలోమీటర్ల మేర వాహనాలు నిలిచిపోయాయి. అంబులెన్సులు, స్కూల్ బస్సులు మరియు ఆఫీసులకు వెళ్లే ఉద్యోగులు గంటల తరబడి ఎండలో చిక్కుకుపోయి తీవ్ర ఇబ్బందులు పడ్డారు. ట్రాఫిక్ పోలీసులు వాహనాలను దారి మళ్లించినప్పటికీ, అంతర్గత రహదారులు కూడా వాహనాల రద్దీతో నిండిపోయాయి.

*స్వల్ప తోపులాట – పరిస్థితి ఉధృతం

సమాచారం అందిన వెంటనే గోషామహల్ మరియు అబిడ్స్ పరిధిలోని పోలీసులు భారీగా మోహరించారు. నిరసనకారులను రోడ్డుపై నుండి పంపించే క్రమంలో స్వల్ప తోపులాట చోటుచేసుకుంది. “మాకు న్యాయం జరిగే వరకు కదిలేది లేదు” అంటూ డ్రైవర్లు భీష్మించుకోవడంతో పరిస్థితి ఉద్రిక్తంగా మారింది. చివరికి, ఉన్నతాధికారులతో చర్చించి ఈ సమస్యపై రవాణా శాఖతో మాట్లాడతామని పోలీసులు హామీ ఇవ్వడంతో డ్రైవర్లు తాత్కాలికంగా శాంతించారు.

*అప్పు చేసి ఆటోలు కొనుక్కున్నాం మేం బ్రతుకేదేట్ల

“మేము ఇక్కడే పుట్టి పెరిగి, అప్పులు చేసి ఆటోలు కొనుక్కున్నాం. కానీ బయటి రాష్ట్రాల వారు వచ్చి ఇక్కడ అడ్డగోలుగా ఆటోలు నడుపుతుంటే మా పిల్లలకు తిండి ఎలా పెట్టాలి? వెంటనే అక్రమ ఆటోలను సీజ్ చేయాలి.”

 *నిబంధనలు కఠినంగా ఉండకపోతే మళ్ళీ నరసన

ప్రస్తుతానికి ట్రాఫిక్ నెమ్మదిగా పునరుద్ధరించబడుతున్నప్పటికీ, ఆటో డ్రైవర్ల సమస్యను ప్రభుత్వం ఎలా పరిష్కరిస్తుందనేది ఆసక్తికరంగా మారింది. భవిష్యత్తులో నగరవ్యాప్త నిరసనలకు దిగుతామని ఆటో యూనియన్లు హెచ్చరించాయి.