MP KADIYAM KAVYA | ప్రజల్లో సంపాదించుకునే పేరే ముఖ్యం

ఆకేరు న్యూస్, వరంగల్ : రాజకీయాల్లో పదవులు, అధికారం శాశ్వతం కాదని, ప్రజల కోసం చేసే నిరంతర సేవ మరియు దాని ద్వారా లభించే మంచి పేరు మాత్రమే చరిత్రలో నిలిచిపోతాయని వరంగల్ పార్లమెంట్ సభ్యురాలు డాక్టర్ కడియం కావ్య అన్నారు. బుధవారం గ్రేటర్ వరంగల్ మున్సిపల్ కార్పొరేషన్ (GWMC) ప్రధాన కార్యాలయంలో నిర్వహించిన కౌన్సిల్ సమావేశానికి ఆమె విశిష్ట అతిథిగా హాజరయ్యారు. ఈ సందర్భంగా నగర సమగ్ర అభివృద్ధిపై ఆమె దిశా నిర్దేశం చేశారు.

* ఓరుగల్లుకు నూతన వైభవం అంతర్జాతీయ స్థాయికి వరంగల్

వరంగల్ నగరాన్ని అంతర్జాతీయ ప్రమాణాలతో అభివృద్ధి చేయడమే కాంగ్రెస్ ప్రభుత్వ సంకల్పమని ఎంపీ కడియం కావ్య పునరుద్ఘాటించారు. “చారిత్రక ప్రాధాన్యత కలిగిన ఓరుగల్లు నగరాన్ని ఆధునిక హంగులతో తీర్చిదిద్దేందుకు ప్రణాళికాబద్ధంగా ముందుకు వెళ్తున్నాం. ఎన్నో ఏళ్లుగా పెండింగ్‌లో ఉన్న అండర్‌గ్రౌండ్ డ్రైనేజీ (UGD) ప్రాజెక్టును పట్టాలెక్కించడం మా ప్రభుత్వ చిత్తశుద్ధికి నిదర్శనం. ఇందుకు అవసరమైన నిధులను ఇప్పటికే మంజూరు చేశాం,” అని ఆమె పేర్కొన్నారు.

* సీఎం రేవంత్ రెడ్డి చొరవతో పెండింగ్ నిధుల విడుదల

గత పదేళ్లుగా నిధుల కొరతతో కుంటుపడిన అనేక అభివృద్ధి పనులకు ముఖ్యమంత్రి రేవంత్ రెడ్డి ప్రత్యేక కృషితో మోక్షం లభించిందని ఆమె తెలిపారు. కేంద్ర ప్రభుత్వం నుంచి రాష్ట్రానికి అందాల్సిన వాటా మరియు హక్కుగా రావాల్సిన నిధుల సాధన కోసం తాము నిరంతరం పోరాడుతున్నామని వెల్లడించారు. పెండింగ్‌లో ఉన్న బకాయిలను విడుదల చేయించడంలో రాష్ట్ర ప్రభుత్వం విజయం సాధించిందని, దీనివల్ల నగరంలో మౌలిక సదుపాయాల కల్పన వేగవంతం అవుతుందని ఆశాభావం వ్యక్తం చేశారు.

* వేయి స్తంభాల గుడి అభివృద్ధికి రూ. 14 కోట్లు

నగర భవిష్యత్తును మార్చబోయే ప్రధాన అంశాలపై ఎంపీ స్పష్టతనిచ్చారు. వరంగల్ ఎయిర్‌పోర్ట్ పనులు, కాజీపేట కోచ్ ఫ్యాక్టరీ మరియు మెగా టెక్స్టైల్ పార్క్ వంటి ప్రతిష్టాత్మక ప్రాజెక్టులను త్వరితగతిన పూర్తి చేసేందుకు కృషి చేస్తున్నట్లు తెలిపారు. ప్రసిద్ధ వేయి స్తంభాల ఆలయ పునరుద్ధరణ మరియు అభివృద్ధి కోసం రూ. 14 కోట్ల నిధులను మంజూరు చేయించామని, త్వరలోనే ఆలయానికి పూర్వ వైభవం వస్తుందని చెప్పారు. నగరంలో శానిటేషన్ (పారిశుధ్యం), మిషన్ భగీరథ ద్వారా స్వచ్ఛమైన తాగునీరు మరియు పరిసరాల పరిశుభ్రతపై GWMC యంత్రాంగం రాజీ లేని పోరాటం చేయాలని సూచించారు.

* అధికారం కోసమే కాదు.. సేవ కోసం పని చేయండి

ప్రజా ప్రతినిధులు ఎప్పుడూ ప్రజల మధ్యే ఉండాలని, అప్పుడే నిజమైన సమస్యలు తెలుస్తాయని ఎంపీ కావ్య అన్నారు. “అధికారం ఉంటేనే సేవ చేయాలని లేదు, ప్రజా సేవకు ప్రతి క్షణం ఒక అవకాశమే. ప్రతి కార్పొరేటర్ తమ డివిజన్‌లోని క్షేత్రస్థాయి సమస్యలను గుర్తించి, అధికారులతో సమన్వయం చేసుకుంటూ పరిష్కారానికి కృషి చేయాలి. రానున్న రోజుల్లో కష్టపడి పనిచేసే ప్రతి ఒక్కరికీ రాజకీయంగా మంచి భవిష్యత్తు ఉంటుంది,” అని ఆమె స్ఫూర్తిని నింపారు. ఈ సమావేశంలో మేయర్ గుండు సుధారాణి, జిల్లా కలెక్టర్ మరియు GWMC ఇంచార్జ్ కమిషనర్ చాహత్‌ బాజ్‌పాయ్‌, ఎమ్మెల్సీ బసవరాజ్ సారయ్య, ఎమ్మెల్యేలు నాయిని రాజేందర్ రెడ్డి, కె.ఆర్.నాగరాజుతో పాటు కార్పొరేటర్లు, వివిధ విభాగాల ఉన్నతాధికారులు పాల్గొన్నారు.