OPERATION MATRUSHAKTI | తల్లి, బిడ్డను కాపాడిన ఆర్పీఎఫ్

* మాతృత్వాన్ని గెలిపించిన ‘ఆపరేషన్ మాతృశక్తి’

ఆకేరు న్యూస్, డెస్క్: రైలు ప్రయాణంలో ఎదురైన ఓ ఆకస్మిక సవాలును రైల్వే పోలీసులు (RPF), తోటి ప్రయాణికులు కలిసి విజయవంతంగా ఎదుర్కొన్నారు. పట్టాలపై వేగంగా దూసుకుపోతున్న రైలులోనే ఓ మహిళ పండంటి బిడ్డకు జన్మనిచ్చింది. సెంట్రల్ రైల్వే ప్రతిష్టాత్మకంగా చేపట్టిన ‘ఆపరేషన్ మాతృశక్తి’ కింద ఆర్పీఎఫ్ సిబ్బంది చూపిన చొరవ ఇప్పుడు అందరి ప్రశంసలు అందుకుంటోంది.

* అధికారులకు సమాచారం…

పుణే నుండి సుపాల్ వెళ్తున్న ఎక్స్‌ప్రెస్ రైలులో రుఖ్సానా ఖాతూన్ అనే గర్భిణీ ప్రయాణిస్తోంది. రైలు మహారాష్ట్రలోని అహల్యనగర్ స్టేషన్‌కు చేరుకుంటున్న సమయంలో ఆమెకు అకస్మాత్తుగా పురిటి నొప్పులు మొదలయ్యాయి. నొప్పులు తీవ్రం కావడంతో ఆందోళన చెందిన తోటి ప్రయాణికులు వెంటనే రైల్వే అధికారులకు సమాచారం అందించారు.

* రంగంలోకి ఆర్పీఎఫ్ సిబ్బంది…

సమాచారం అందుకున్న వెంటనే రైల్వే ప్రొటెక్షన్ ఫోర్స్ (RPF) మహిళా సిబ్బంది మరియు రైల్వే అధికారులు అప్రమత్తమయ్యారు. సెంట్రల్ రైల్వే ప్రవేశపెట్టిన ‘ఆపరేషన్ మాతృశక్తి’ స్ఫూర్తితో, మహిళా ప్రయాణికుల సహాయంతో రైలులోనే సురక్షితమైన వాతావరణాన్ని కల్పించారు. ఎటువంటి వైద్య పరికరాలు అందుబాటులో లేకపోయినా, సమయస్ఫూర్తితో వ్యవహరించి రుఖ్సానా ప్రసవానికి సహకరించారు.

* క్షేమంగా తల్లి, బిడ్డ…
రైలు అహల్యనగర్ స్టేషన్‌కు చేరుకునే సమయానికే అధికారులు 108 అంబులెన్స్‌ను సిద్ధంగా ఉంచారు. ప్రసవం అనంతరం తల్లిని, అప్పుడే పుట్టిన శిశువును స్ట్రెచర్‌పై తీసుకెళ్లి స్థానిక ఆసుపత్రికి తరలించారు. ప్రస్తుతం తల్లి, బిడ్డ ఇద్దరూ క్షేమంగా ఉన్నారని, వారికి మెరుగైన వైద్యం అందుతోందని వైద్యులు ధృవీకరించారు.
సకాలంలో స్పందించి, మానవత్వాన్ని చాటుకున్న రైల్వే సిబ్బందిని మరియు తోటి ప్రయాణికులను నెటిజన్లు సోషల్ మీడియా వేదికగా కొనియాడుతున్నారు.