ODI WORLD CUP 2027 | 'సూపర్ 7'తో మరింత ఉత్కంఠ.. పూర్తి వివరాలు ఇవే

Published: 31 Jul 2026 • 04:39 PM

* 14 జట్లతో వన్డే ప్రపంచకప్ 2027

* దక్షిణాఫ్రికా, జింబాబ్వే, నమీబియా సంయుక్త ఆతిథ్యం

* 24 ఏళ్ల తర్వాత ఆఫ్రికాలో వన్డే వరల్డ్ కప్ మ్యాచ్ లు

ఆకేరు న్యూస్, డెస్క్: ఐసీసీ వన్డే ప్రపంచకప్ 2027 కోసం సరికొత్త ఫార్మాట్‌ను ప్రకటించింది. దక్షిణాఫ్రికా, జింబాబ్వే, నమీబియా సంయుక్తంగా ఆతిథ్యం ఇస్తున్న ఈ మెగా టోర్నీలో మొత్తం 14 జట్లు, 57 మ్యాచ్‌లు, 12 వేదికలు ఉండనున్నాయి.

గత రెండు ప్రపంచకప్‌లతో పోలిస్తే ఈసారి పోటీని మరింత ఆసక్తికరంగా మార్చేందుకు ‘సూపర్ 7’ అనే కొత్త దశను ప్రవేశపెట్టింది.

* టోర్నీ ఫార్మాట్ ఎలా ఉంటుంది?

మొదటగా అత్యల్ప ర్యాంక్‌లో ఉన్న మూడు జట్లు ‘సూపర్ సిరీస్’ ఆడతాయి. ఈ సిరీస్‌లో విజేతగా నిలిచిన ఒక జట్టు మాత్రమే ప్రధాన టోర్నీకి అర్హత సాధిస్తుంది. ఆ తర్వాత మొత్తం 12 జట్లను రెండు గ్రూపులుగా (ఆరేసి జట్లు) విభజిస్తారు. ప్రతి జట్టు తమ గ్రూప్‌లోని మిగతా ఐదు జట్లతో తలపడుతుంది. ఈ దశలో మొత్తం 30 మ్యాచ్‌లు జరుగుతాయి.

గ్రూప్ దశ ముగిసిన తర్వాత రెండు గ్రూపుల నుంచి టాప్-3 జట్లు నేరుగా అర్హత సాధిస్తాయి. వాటితో పాటు రెండు గ్రూపుల్లో నాలుగో స్థానంలో నిలిచిన జట్లలో మెరుగైన రికార్డు ఉన్న మరో జట్టు కలిపి మొత్తం 7 జట్లు ‘సూపర్ 7’ దశకు చేరుకుంటాయి.

* సెమీస్‌కు ఎలా చేరుకుంటారు?

సూపర్ 7లో ప్రతి జట్టు మిగతా జట్లతో తలపడుతుంది. ఈ దశ ముగిసే సమయానికి పాయింట్ల పట్టికలో తొలి నాలుగు స్థానాల్లో నిలిచిన జట్లు సెమీఫైనల్స్‌కు అర్హత సాధిస్తాయి. P1 vs P4, P2 vs P3 మధ్య సెమీస్ జరుగుతాయి. విజేతలు ఫైనల్లో తలపడి ప్రపంచకప్ టైటిల్ కోసం పోటీ పడతారు.

* 12 వేదికల్లో 57 మ్యాచ్‌లు

ఈ ప్రపంచకప్‌కు దక్షిణాఫ్రికాలో 8, జింబాబ్వేలో 3, నమీబియాలో 1 వేదికను ఎంపిక చేశారు. మొత్తం 57 మ్యాచ్‌లు జరగనున్నాయి. 2003 తర్వాత మళ్లీ ఆఫ్రికా ఖండంలో వన్డే ప్రపంచకప్ నిర్వహించబడటం విశేషం.