Kakatiya Mega Textile Park Accident
ఆకేరు న్యూస్, వరంగల్ : వరంగల్ జిల్లా గీసుగొండ మండలం శాయంపేట శివారులోని కాకతీయ మెగా టెక్స్టైల్ పార్క్లో గురువారం తీవ్ర విషాదం చోటుచేసుకుంది. పార్క్లోని గణేషా ఈకో ఫ్యాక్టరీ (Ganesha Ecosphere) ప్రమాదవశాత్తు చెలరేగిన అగ్నికీలల్లో చిక్కుకుని బిహార్ రాష్ట్రానికి చెందిన ఇద్దరు వలస కార్మికులు సజీవ దహనమయ్యారు.
* షార్ట్ సర్క్యూట్తో చెలరేగిన మంటలు…
స్థానికులు మరియు పోలీసుల సమాచారం ప్రకారం.. గురువారం ఫ్యాక్టరీలో రోజువారీ పనులు శరవేగంగా జరుగుతున్న సమయంలో విద్యుత్ షార్ట్ సర్క్యూట్ సంభవించింది. క్షణాల్లోనే మంటలు భవనమంతటా వ్యాపించి, దట్టమైన పొగలు అలుముకున్నాయి. ప్రమాదాన్ని గమనించిన తోటి కార్మికులు భయాందోళనతో బయటకు పరుగులు తీశారు.
* లిఫ్ట్లోనే మిగిలిపోయిన ప్రాణాలు…
అగ్నిప్రమాదం జరుగుతున్న సమయంలో బిహార్ రాష్ట్రానికి చెందిన కార్మికులు వినోద్ కుమార్ ప్రజాపతి (30), సూర్యప్రకాశ్ (31) భవనం నాలుగో అంతస్తులోని లిఫ్ట్లో ఉన్నారు. ప్రమాదం కారణంగా విద్యుత్ సరఫరా నిలిచిపోవడం, మంటలు లిఫ్ట్ దారిని చుట్టుముట్టడంతో వారు బయటకు రాలేకపోయారు. నాలుగో అంతస్తు లిఫ్ట్ గదిలోనే దట్టమైన పొగ, సెగలకు తాళలేక నరకయాతన అనుభవిస్తూ వారిద్దరూ అక్కడికక్కడే సజీవ దహనమయ్యారు.
* ఘటనా స్థలికి చేరుకున్న పోలీసులు, ఫైర్ సిబ్బంది
సమాచారం అందుకున్న వెంటనే అగ్నిమాపక సిబ్బంది, పోలీసులు హుటాహుటిన ఘటనా స్థలానికి చేరుకున్నారు. ఫైర్ సిబ్బంది తీవ్రంగా శ్రమించి మంటలను అదుపులోకి తెచ్చారు. అనంతరం లిఫ్ట్లో కాలిపోయిన స్థితిలో ఉన్న వినోద్, సూర్యప్రకాశ్ ల మృతదేహాలను పోలీసులు వెలికితీశారు. పోస్టుమార్టం నిమిత్తం మృతదేహాలను వరంగల్ ఎంజీఎం ఆసుపత్రికి తరలించారు.
ఈ ఘటనపై గీసుగొండ పోలీసులు కేసు నమోదు చేసుకుని దర్యాప్తు ప్రారంభించారు. ప్రమాదానికి గల ఖచ్చితమైన కారణాలు, కంపెనీలో అగ్నిమాపక భద్రతా ప్రమాణాలు (Fire Safety Standards) పాటించారా లేదా అనే కోణంలో అధికారులు విచారణ జరుపుతున్నారు. పనుల కోసం ఎక్కడో బిహార్ నుండి వచ్చిన ఇద్దరు యువ కార్మికులు ఇలా ప్రాణాలు కోల్పోవడంతో టెక్స్టైల్ పార్క్ ఆవరణలో తీవ్ర శోకఛాయలు అలముకున్నాయి.
——————————–
About the Author
Please tell us what is wrong. Your report will be sent to the website team.
