MLA Yashaswini Reddy | స్మార్ట్ రేషన్ కార్డుల పంపిణీ

Published: 24 Aug 2026 • 03:37 PM

* అర్హులందరికీ సంక్షేమ ఫలాలు అందించడమే కాంగ్రెస్ ప్రభుత్వ లక్ష్యం: ఎమ్మెల్యే యశస్విని రెడ్డి

* రైతు వేదికలో ఆహార భద్రత స్మార్ట్ రేషన్ కార్డుల పంపిణీ

* పీహెచ్‌సీని సందర్శించి, రోగులతో నేరుగా మాట్లాడిన ఎమ్మెల్యే

ఆకేరు న్యూస్, రాయపర్తి:

ప్రభుత్వం అమలు చేస్తున్న ప్రతి సంక్షేమ పథకం అర్హులైన ప్రతి కుటుంబానికి అందాలనేదే కాంగ్రెస్ ప్రభుత్వ ముఖ్య ఉద్దేశమని ఎమ్మెల్యే యశస్విని రెడ్డి స్పష్టం చేశారు. మండల కేంద్రంలోని రైతు వేదికలో ఏర్పాటు చేసిన కార్యక్రమంలో ఆమె లబ్ధిదారులకు ఆహార భద్రత స్మార్ట్ రేషన్ కార్డులను పంపిణీ చేశారు.

ఈ సందర్భంగా ఎమ్మెల్యే మాట్లాడుతూ, పేద ప్రజల సంక్షేమం మరియు వారి జీవన ప్రమాణాలు మెరుగుపరచడమే ధ్యేయంగా ప్రభుత్వం పనిచేస్తోందని తెలిపారు. అర్హత ఉన్న ప్రతి ఒక్కరికీ ప్రభుత్వ ఫలాలు నేరుగా అందుతాయని, ఏ ఒక్కరూ సంక్షేమ పథకాలకు దూరం కాకుండా చూస్తామని హామీ ఇచ్చారు.

* ప్రభుత్వ ఆసుపత్రి తనిఖీ – రోగులకు పరామర్శ:

రేషన్ కార్డుల పంపిణీ అనంతరం ఎమ్మెల్యే యశస్విని రెడ్డి మండల కేంద్రంలోని ప్రాథమిక ఆరోగ్య కేంద్రాన్ని (PHC) సడన్‌గా సందర్శించారు. ఆసుపత్రిలోని వివిధ వార్డులను పరిశీలించి, వైద్య సేవలు అందుతున్న తీరుపై ఆరా తీశారు. అనంతరం వార్డుల్లో చికిత్స పొందుతున్న రోగులతో నేరుగా మాట్లాడి, వారి ఆరోగ్య పరిస్థితిని మరియు వారికి అందుతున్న చికిత్స వివరాలను అడిగి తెలుసుకున్నారు.
వైద్యులు, సిబ్బంది రోగులకు అందుబాటులో ఉంటూ మెరుగైన వైద్య సేవలు అందించాలని ఆమె సూచించారు. మందుల కొరత లేకుండా చూసుకోవాలని, ఆసుపత్రి పరిసరాలను పరిశుభ్రంగా ఉంచాలని అధికారులను ఆదేశించారు. ప్రజా వైద్యానికి ప్రభుత్వం పెద్దపీట వేస్తోందని, ఆస్పత్రికి వచ్చే పేద రోగులకు ఎలాంటి ఇబ్బందులు కలగకుండా చూడాల్సిన బాధ్యత వైద్యులపై ఉందన్నారు.
ఈ కార్యక్రమంలో స్థానిక ప్రజాప్రతినిధులు, వివిధ శాఖల అధికారులు, కాంగ్రెస్ పార్టీ నాయకులు, కార్యకర్తలు మరియు పెద్ద ఎత్తున ప్రజలు పాల్గొన్నారు.