Thorrur | ప్రభుత్వ పాఠశాలలో 'ఆర్‌ఓ వాటర్ ప్లాంట్' ప్రారంభం

Published: 08 Sep 2026 • 08:19 PM

* సీడీఎఫ్ హైదరాబాద్ సౌజన్యంతో రూ. 2 లక్షల వ్యయంతో ఏర్పాటు

* ప్రారంభించిన మున్సిపల్ చైర్మన్ తూర్పు శ్రావణ్ కుమార్, ఎంఈఓ బుచ్చయ్య

ఆకేరు న్యూస్, తొర్రూర్:
మహబూబాబాద్ జిల్లా తొర్రూర్ పట్టణ కేంద్రంలోని ప్రభుత్వ పాఠశాల విద్యార్థులకు సురక్షితమైన మంచినీటిని అందించేందుకు కమ్యూనిటీ డెవలప్మెంట్ ఫౌండేషన్ (CDF – హైదరాబాద్) ముందుకు రావడం అభినందనీయమని మున్సిపల్ చైర్మన్ తూర్పు శ్రావణ్ కుమార్ తెలిపారు. సిడిఎఫ్ హైదరాబాద్ సౌజన్యంతో సుమారు రూ. 2 లక్షల వ్యయంతో పాఠశాలలో నూతనంగా ఏర్పాటు చేసిన ఆర్‌ఓ (RO) వాటర్ ప్లాంట్‌ను మండల విద్యాధికారి (MEO) బుచ్చయ్యతో కలిసి మున్సిపల్ చైర్మన్ మంగళవారం ఘనంగా ప్రారంభించారు.

ఈ సందర్భంగా మున్సిపల్ చైర్మన్ శ్రావణ్ కుమార్ మాట్లాడుతూ… ప్రభుత్వ పాఠశాలల్లో చదివే పేద విద్యార్థుల ఆరోగ్య రక్షణకు పరిశుభ్రమైన తాగునీరు ఎంతో అవసరమని పేర్కొన్నారు. కార్పొరేట్ సామాజిక బాధ్యతగా (CSR) పాఠశాలకు వాటర్ ప్లాంట్ మంజూరు చేసిన సీడీఎఫ్ హైదరాబాద్ నిర్వాహకులకు ఆయన ప్రత్యేక ధన్యవాదాలు తెలిపారు. విద్యార్థులు కూడా ఈ సౌకర్యాన్ని సద్వినియోగం చేసుకుని, చదువులో రాణించాలని ఆకాంక్షించారు.

మండల విద్యాధికారి బుచ్చయ్య మాట్లాడుతూ… స్వచ్ఛమైన నీటిని తాగడం వల్ల విద్యార్థులు సీజనల్ వ్యాధుల బారిన పడకుండా ఆరోగ్యంగా ఉంటారని, తద్వారా హాజరు శాతం పెరుగుతుందని అన్నారు. ప్రభుత్వ పాఠశాలల అభివృద్ధికి దాతలు, ఎన్జీఓలు ముందుకొచ్చి తమవంతు సహకారం అందించడం అభినందనీయమని కొనియాడారు.

ఈ కార్యక్రమంలో పాఠశాల ప్రధానోపాధ్యాయులు, ఉపాధ్యాయ బృందం, ప్రజాప్రతినిధులు, కమ్యూనిటీ డెవలప్మెంట్ ఫౌండేషన్ ప్రతినిధులు, స్థానిక నాయకులు మరియు విద్యార్థులు పాల్గొన్నారు.