Palakurthy | కాంగ్రెస్ ఆరు గ్యారంటీల మోసంపై సమర శంఖం

Published: 08 Sep 2026 • 08:06 PM

* బాబాసాహెబ్ అంబేడ్కర్ విగ్రహానికి బిఆర్ఎస్ వినతిపత్రం

ఆ కేరు న్యూస్, పాలకుర్తి:
జనగామ జిల్లా పాలకుర్తి మండల కేంద్రంలో కాంగ్రెస్ ప్రభుత్వ ప్రజా వ్యతిరేక విధానాలపై పాలకుర్తి బిఆర్ఎస్ పార్టీ మాజీ జెడ్పిటిసి పుస్కూరి శ్రీనివాసరావు, ఆధ్వర్యంలో మంగళవారం నిరసన కార్యక్రమం నిర్వహించారు. ఎన్నికల ముందు “ఆరు గ్యారంటీలు, 420 హామీలు” ఇచ్చి అధికారంలోకి వచ్చిన కాంగ్రెస్ పార్టీ, తొమ్మిది నెలలు గడిచినా ఏ ఒక్క హామీని సక్రమంగా అమలు చేయకుండా ప్రజలను తీవ్రంగా మోసం చేసిందని బిఆర్ఎస్ నాయకులు మండిపడ్డారు.

పాలకుర్తి, మండల బిఆర్ఎస్ పార్టీ అధ్యక్షులు, ముఖ్య నాయకులు మరియు కార్యకర్తలు భారీ సంఖ్యలో పాలకుర్తి అంబేద్కర్ చౌరస్తా ఆవరణలోని భారత రాజ్యాంగ నిర్మాత డాక్టర్ బి.ఆర్. అంబేడ్కర్ విగ్రహం వద్దకు చేరుకున్నారు. అంబేడ్కర్ విగ్రహానికి పూలమాల వేసి ఘనంగా నివాళులర్పించిన అనంతరం, కాంగ్రెస్ ప్రభుత్వం బహుజనులకు, రైతులకు, మహిళలకు మరియు యువతకు ఇచ్చిన హామీలను తక్షణమే నెరవేర్చేలా చూడాలని కోరుతూ అంబేడ్కర్ విగ్రహానికి వినతిపత్రాన్ని సమర్పించారు.

ఈ సందర్భంగా బిఆర్ఎస్ ముఖ్య నాయకులు, మాజీ జెడ్పిటిసి పుస్కూరి శ్రీనివాసరావు మాట్లాడుతూ కాంగ్రెస్ ప్రభుత్వ వైఫల్యాలపై తీవ్రస్థాయిలో మండిపడ్డారు. కాంగ్రెస్ ప్రభుత్వం అధికారంలోకి వచ్చి సంవత్సరాలు గడిచినా రూ. 2 లక్షల రుణమాఫీని పూర్తిగా చేయకపోవడం, రైతుబంధు/రైతు భరోసా పథకాలను నిలిపివేయడం దారుణమని విమర్శించారు. అంతేకాకుండా, మహిళలకు నెలకు రూ. 2,500 ఇచ్చే మహాలక్ష్మి పథకం, నిరుద్యోగ భృతి, కల్యాణలక్ష్మి పథకం కింద తులం బంగారం వంటి ఏ ఒక్క హామీని కూడా అమలు చేయకుండా ప్రజలను నమ్మించి గొంతు కోశారని ఆగ్రహం వ్యక్తం చేశారు. కాంగ్రెస్ ప్రభుత్వం తమ హామీలను నెరవేర్చే వరకు, బిఆర్ఎస్ పార్టీ వర్కింగ్ ప్రెసిడెంట్ కేటీఆర్ మరియు పాలకుర్తి నియోజకవర్గ నాయకుల పిలుపు మేరకు ప్రభుత్వ వైఫల్యాలను ఎండగడుతూ తమ పోరాటాలు మరియు ప్రజా ఉద్యమాలను కొనసాగిస్తామని ఆయన హెచ్చరించారు.

ఈ కార్యక్రమంలో పాలకుర్తి, మండల బిఆర్ఎస్ పార్టీ అధ్యక్షులు, స్థానిక ప్రజాప్రతినిధులు, వివిధ గ్రామాల సర్పంచులు, ఎంపిటిసిలు, సోషల్ మీడియా సమన్వయకర్తలు మరియు అపూర్వ సంఖ్యలో బిఆర్ఎస్ శ్రేణులు, కార్యకర్తలు పాల్గొన్నారు.