Thorrur | అంబేడ్కర్‌కు బీఆర్ఎస్ వినతిపత్రం

Published: 08 Sep 2026 • 08:13 PM

* కాంగ్రెస్ ప్రభుత్వ ‘ఆరు గ్యారంటీలు – 420 హామీల’ మోసంపై సమర శంఖం

ఆకేరు న్యూస్, తొర్రూర్:
బాబాసాహెబ్ అంబేడ్కర్ విగ్రహానికి బిఆర్ఎస్ వినతిపత్రం. మహబూబాబాద్ జిల్లా, తొర్రూరు మండల కేంద్రంలో కాంగ్రెస్ ప్రభుత్వ ప్రజా వ్యతిరేక విధానాలపై బిఆర్ఎస్ పార్టీ ఆధ్వర్యంలో మంగళవారం నిరసన కార్యక్రమం నిర్వహించారు. ఎన్నికల ముందు “ఆరు గ్యారంటీలు, 420 హామీలు” ఇచ్చి అధికారంలోకి వచ్చిన కాంగ్రెస్ పార్టీ, తొమ్మిది నెలలు గడిచినా ఏ ఒక్క హామీని సక్రమంగా అమలు చేయకుండా ప్రజలను తీవ్రంగా మోసం చేసిందని బిఆర్ఎస్ నాయకులు మండిపడ్డారు.

రాయపర్తి, తొర్రూరు, పెద్దవంగర మండలాల బిఆర్ఎస్ పార్టీ అధ్యక్షులు, ముఖ్య నాయకులు మరియు కార్యకర్తలు భారీ సంఖ్యలో తొర్రూరు బస్టాండ్ ఆవరణలోని భారత రాజ్యాంగ నిర్మాత డాక్టర్ బి.ఆర్. అంబేడ్కర్ విగ్రహం వద్దకు చేరుకున్నారు. అంబేడ్కర్ విగ్రహానికి పూలమాల వేసి ఘనంగా నివాళులర్పించిన అనంతరం, కాంగ్రెస్ ప్రభుత్వం బహుజనులకు, రైతులకు, మహిళలకు మరియు యువతకు ఇచ్చిన హామీలను తక్షణమే నెరవేర్చేలా చూడాలని కోరుతూ అంబేడ్కర్ విగ్రహానికి వినతిపత్రాన్ని సమర్పించారు.

ఈ సందర్భంగా బిఆర్ఎస్ ముఖ్య నాయకులు మాట్లాడుతూ కాంగ్రెస్ ప్రభుత్వ వైఫల్యాలపై తీవ్రస్థాయిలో మండిపడ్డారు. కాంగ్రెస్ ప్రభుత్వం అధికారంలోకి వచ్చి ఇన్ని నెలలైనా రూ. 2 లక్షల రుణమాఫీని పూర్తిగా చేయకపోవడం, రైతుబంధు/రైతు భరోసా పథకాలను నిలిపివేయడం దారుణమని విమర్శించారు. మహిళలకు నెలకు రూ. 2,500 ఇచ్చే మహాలక్ష్మి పథకం, నిరుద్యోగ భృతి, కల్యాణలక్ష్మి పథకం కింద తులం బంగారం వంటి ఏ ఒక్క హామీని కూడా అమలు చేయకుండా ప్రజలను నమ్మించి గొంతు కోశారని ఆగ్రహం వ్యక్తం చేశారు. కాంగ్రెస్ ప్రభుత్వం తమ హామీలను నెరవేర్చే వరకు, బిఆర్ఎస్ పార్టీ వర్కింగ్ ప్రెసిడెంట్ కేటీఆర్ మరియు పాలకుర్తి నియోజకవర్గ నాయకుల పిలుపు మేరకు ప్రభుత్వ వైఫల్యాలను ఎండగడుతూ తమ పోరాటాలు, ప్రజా ఉద్యమాలను కొనసాగిస్తామని వారు హెచ్చరించారు.

ఈ కార్యక్రమంలో రాయపర్తి, తొర్రూరు, పెద్దవంగర మండలాల బిఆర్ఎస్ పార్టీ అధ్యక్షులు, స్థానిక ప్రజాప్రతినిధులు, వివిధ గ్రామాల సర్పంచులు, ఎంపిటిసిలు, సోషల్ మీడియా సమన్వయకర్తలు మరియు అపూర్వ సంఖ్యలో బిఆర్ఎస్ శ్రేణులు, కార్యకర్తలు పాల్గొన్నారు.