Deputy CM Bhatti | ఫ్లోటింగ్ సోలార్‌పై గ్లోబల్ టెండర్లు..

Published: 10 Sep 2026 • 05:36 PM

* ఉచిత విద్యుత్‌పై డిప్యూటీ సీఎం కీలక వ్యాఖ్యలు

* రిజర్వాయర్లలో సోలార్ ప్లాంట్లు..

* గిరిజన ప్రాంతాల్లో మైక్రో గ్రిడ్లు

ఆకేరు న్యూస్, హైదరాబాద్ : తెలంగాణ శాసనసభలో డిప్యూటీ సీఎం, ఇంధన శాఖ మంత్రి మల్లు భట్టి విక్రమార్క రాష్ట్రంలో సోలార్ విద్యుత్ ప్రాజెక్టులు, ఫ్లోటింగ్ సోలార్ ప్రణాళికలు మరియు ఉచిత విద్యుత్ పథకాల అమలుపై కీలక విషయాలను వెల్లడించారు. రాష్ట్రంలో వేగంగా పెరుగుతున్న విద్యుత్ డిమాండ్‌ను తట్టుకునేందుకు, ప్రభుత్వంపై పడుతున్న ఆర్థిక భారాన్ని తగ్గించేందుకు పునరుత్పాదక ఇంధన రంగాన్ని ప్రోత్సహిస్తున్నట్లు తెలిపారు.

* ఫ్లోటింగ్ సోలార్ ప్రాజెక్టులు..

ప్రత్యేకంగా భూమిని సేకరించే అవసరం లేకుండా, అందుబాటులో ఉన్న ప్రధాన జలాశయాలపై ఫ్లోటింగ్ సోలార్ ప్యానెళ్లు ఏర్పాటు చేయడం వల్ల రాష్ట్రానికి తీవ్ర మేలు జరుగుతుందని ఇంధన శాఖ భావిస్తోంది. నాగార్జున సాగర్, శ్రీశైలం, పులిచింతల, శ్రీరాంసాగర్ (SRSP), శ్రీపాద ఎల్లంపల్లి, దేవాదుల, పాలేరు, వైరా, మల్లన్న సాగర్, లోయర్ మానేరు డ్యామ్ (LMD), మిడ్ మానేరుతో పాటు పోచారం వంటి రిజర్వాయర్లలో ఫ్లోటింగ్ సోలార్ ప్లాంట్ల ఏర్పాటుపై తీవ్రంగా అధ్యయనం జరుగుతోంది.

* శాఖల మధ్య సమన్వయం..

ఇంధన శాఖ ఇప్పటికే నీటిపారుదల (Irrigation) శాఖకు రాతపూర్వకంగా లేఖ రాసింది. ఉమ్మడి అధ్యయనం ద్వారా నివేదిక సిద్ధం చేస్తున్నట్లు భట్టి తెలిపారు. త్వరలోనే వీటిపై గ్లోబల్ టెండర్లు పిలవనున్నట్లు స్పష్టం చేశారు. సాధారణ సోలార్ ప్లాంట్ల కంటే ఫ్లోటింగ్ సోలార్‌కు మెగావాట్‌కు రూ.1 కోటికి పైగా అదనపు ఖర్చు అవుతుంది. కేంద్ర ప్రభుత్వం రూ.1 కోటి వైయబిలిటీ గ్యాప్ ఫండ్ (VGF) సబ్సిడీ ఇస్తున్నప్పటికీ, దేశీయంగా ఉత్పత్తి చేసిన మెటీరియల్ మాత్రమే వాడాలనే నిబంధన వల్ల ప్రతి మెగావాట్‌కు రూ.1.30 కోట్లు అదనపు భారం పడుతోంది. సబ్సిడీ పోను నికరంగా రూ.30 లక్షల భారం పెరుగుతుండటంతో ఇన్వెస్టర్లు ముందుకు రావడం లేదని, దీనికి సంబంధించిన పూర్తి గైడ్‌లైన్స్ వచ్చాక తగిన చర్యలు తీసుకుంటామని వివరించారు.

* రికార్డు స్థాయికి చేరిన విద్యుత్ డిమాండ్..

రాష్ట్రంలో పారిశ్రామిక పురోగతి, ప్రజల కొనుగోలు శక్తి పెరగడం వల్ల విద్యుత్ వాడకం విపరీతంగా పెరిగింది. డిసెంబర్ 2023 నాటికి 15,000 మెగావాట్లుగా ఉన్న గరిష్ట విద్యుత్ డిమాండ్, ఇటీవల 19,543 మెగావాట్లకు చేరిందని మంత్రి వెల్లడించారు.

* ఉచిత విద్యుత్ పథకాలు..

వ్యవసాయం : రాష్ట్రంలోని 30 లక్షల వ్యవసాయ పంప్‌సెట్లకు ఉచిత విద్యుత్ అందించేందుకు ప్రభుత్వం ఏటా ₹14,000 కోట్లు వెచ్చిస్తోంది. గృహ జ్యోతి : 200 యూనిట్ల వరకు ఉచిత విద్యుత్ ఇచ్చే ‘గృహ జ్యోతి’ పథకం కింద 53 లక్షల కుటుంబాలకు గాను ఏటా ₹5,000 కోట్లు కేటాయిస్తోంది. మొత్తంగా ఇంధన సమీకరణ కోసం ప్రభుత్వం ఏటా దాదాపు ₹19,000 కోట్ల భారీ ఆర్థిక భారాన్ని భరిస్తోంది.

* మైక్రో గ్రిడ్లు & ‘ఇందిరా సౌర గిరి జల వికాసం’..

అమ్రాబాద్ పైలట్ ప్రాజెక్ట్ : ప్రభుత్వంపై భారం తగ్గించి, నిరంతర ఉచిత విద్యుత్ అందించేందుకు అచ్చంపేట నియోజకవర్గంలోని అమ్రాబాద్ గిరిజన ప్రాంతంలో పైలట్ ప్రాజెక్ట్ చేపట్టారు. 80 గ్రామాల్లో పగలు సోలార్ విద్యుత్ ఉత్పత్తి చేసి, బ్యాటరీల్లో స్టోర్ చేసుకుని రాత్రి వేళల్లో వాడుకునేలా మైక్రో గ్రిడ్లు ఏర్పాటు చేస్తున్నారు. ఇది విజయవంతమైతే రాష్ట్రవ్యాప్తంగా ప్రతి మండలంలో అమలు చేస్తామన్నారు. గిరిజనుల సంక్షేమం: FRA పట్టాలు పొందిన పేద గిరిజనులకు లబ్ధి చేకూర్చేందుకు 6,70,000 ఎకరాల్లో “ఇందిరా సౌర గిరి జల వికాసం” పథకాన్ని అమలు చేస్తున్నట్లు చెప్పారు. మంథని, ములుగు, ఆసిఫాబాద్, ఆదిలాబాద్ వంటి ఏజెన్సీ ప్రాంతాల్లోని భూములను సోలరైజ్ చేసేందుకు ప్రణాళికలు సిద్ధం చేస్తున్నారు.

* శాసన సభ్యులకు పిలుపు..

గ్రామీణ ప్రాంతాల్లో సోలార్ ప్లాంట్లు, పంప్‌సెట్ల సోలరైజేషన్‌పై రైతులకు అవగాహన కల్పించి, దరఖాస్తులు చేసుకునేలా ప్రోత్సహించాలని శాసన సభ్యులందరికీ డిప్యూటీ సీఎం భట్టి విక్రమార్క పిలుపునిచ్చారు.