Kakatiya University
* డెవలప్మెంట్ ఆఫీస్లో దుండగుల హంగామా
* ఆఫీస్ తాళాలు బద్దలు.. ఫైళ్లు చిందరవందర..
ఆకేరు న్యూస్, హనుమకొండ : కాకతీయ యూనివర్సిటీ క్యాంపస్లో చోరీకి యత్నం కలకలం రేపింది. విశ్వవిద్యాలయంలోని డెవలప్మెంట్ ఆఫీస్లోకి గుర్తుతెలియని వ్యక్తులు చొరబడి తాళాలు పగులగొట్టారు. కార్యాలయంలోని బీరువాలు, సొరుగులను పరిశీలించినట్లు తెలుస్తోంది. పలు ఫైళ్లు, పత్రాలు చిందరవందరగా కనిపించడంతో సిబ్బంది ఆందోళనకు గురయ్యారు. గురువారం అర్ధరాత్రి తర్వాత ఈ ఘటన జరిగినట్లు సమాచారం. శుక్రవారం ఉదయం కార్యాలయానికి వచ్చిన సిబ్బంది తాళాలు పగిలి ఉండటాన్ని గుర్తించి ఉన్నతాధికారులకు సమాచారం అందించారు. దీంతో యూనివర్సిటీ అధికారులు పోలీసులకు ఫిర్యాదు చేశారు.
* ఫైళ్లు చిందరవందర..
డెవలప్మెంట్ ఆఫీస్లోని బీరువాలు, సొరుగులను దుండగులు తెరిచిన ఆనవాళ్లు కనిపించాయి. కార్యాలయంలోని కీలక ఫైళ్లు, పత్రాలు తారుమారయ్యాయి. అయితే నగదు, ఇతర విలువైన వస్తువులు ఏమైనా అపహరణకు గురయ్యాయా? లేదా? అనే అంశంపై అధికారులు పూర్తి స్థాయిలో పరిశీలిస్తున్నారు.
* రంగంలోకి పోలీసులు..
సమాచారం అందుకున్న పోలీసులు సంఘటనా స్థలానికి చేరుకుని వివరాలు సేకరించారు. క్లూస్ టీమ్ను రప్పించి ఆధారాలను పరిశీలించినట్లు సమాచారం. కార్యాలయంతో పాటు యూనివర్సిటీ పరిసరాల్లోని సీసీటీవీ కెమెరాల ఫుటేజీలను పోలీసులు పరిశీలిస్తున్నారు. ఘటనకు పాల్పడిన వ్యక్తులు ఎవరు? ఏ ఉద్దేశంతో కార్యాలయంలోకి ప్రవేశించారు? అనే కోణాల్లో దర్యాప్తు కొనసాగుతోంది.
* భద్రతపై ప్రశ్నలు..
కాకతీయ యూనివర్సిటీ వంటి భారీ క్యాంపస్లో రాత్రివేళ భద్రతపై మరోసారి ప్రశ్నలు తలెత్తాయి. ముఖ్యమైన కార్యాలయాల వద్ద రాత్రి వేళ నిఘా మరింత పెంచాల్సిన అవసరం ఉందని విద్యార్థులు, సిబ్బంది అభిప్రాయపడుతున్నారు. ఘటనపై యూనివర్సిటీ అధికారులు కూడా అంతర్గతంగా వివరాలు సేకరిస్తున్నట్లు తెలుస్తోంది. చోరీకి యత్నం ఘటనతో కేయూ క్యాంపస్లో భద్రతా వ్యవస్థపై చర్చ మొదలైంది. పోలీసుల దర్యాప్తులో మరిన్ని వివరాలు వెలుగులోకి వచ్చే అవకాశం ఉంది.
About the Author
Please tell us what is wrong. Your report will be sent to the website team.
