Haryana School Incident| హర్యానాలో పాఠశాలలో దారుణం

Published: 03 Nov 2026 • 08:42 PM Updated: 03 Nov 2026 • 09:10 PM

* పబ్జీ ప్రభావంతోనే చిన్నారిపై దాడి

* 6 ఏళ్ల చిన్నారిపై 8 ఏళ్ల బాలుడి దాడి..

* 40 గంటల తర్వాత స్పృహలోకి వచ్చిన చిన్నారి

Haryana School Incident| ఆకేరు న్యూస్, డెస్క్: దేశవ్యాప్తంగా సంచలనం సృష్టించిన పంచకుల (Panchkula) ప్రభుత్వ పాఠశాల ఘటనలో విస్తుపోయే నిజాలు ఆలస్యంగా వెలుగులోకి వస్తున్నాయి. హర్యానాలోని పంచకుల ప్రభుత్వ పాఠశాలలో ఆరేళ్ల కేజీ బాలికపై మూడో తరగతి చదువుతున్న 8 ఏళ్ల బాలుడు అత్యంత పాశవికంగా దాడి చేశాడు. ఈ దాడిలో తీవ్రంగా గాయపడి దాదాపు 40 గంటల పాటు అపస్మారక స్థితిలో ఉన్న చిన్నారి, ప్రస్తుతం కోలుకుంటోంది.

అసలేం జరిగిందంటే…
పోలీసులు మరియు కుటుంబ సభ్యుల సమాచారం ప్రకారం.. ఆ బాలుడు తరచూ బాలికను టీజ్ చేస్తూ ‘పిచ్చిది’ అని ఏడిపించేవాడు. దీనిపై బాలిక తిరగబడి ఫిర్యాదు చేస్తానని అనడంతో బాలుడు భయపడ్డాడు. పైస్థ్ధాయిలో తన తండ్రి ఉన్నాడని నమ్మించి, ఆమెను ఖాళీగా ఉన్న క్లాస్‌రూమ్‌లోకి తీసుకెళ్లాడు. అక్కడ క్లాస్‌రూమ్ తలుపునకు ఆసరాగా ఉంచిన ఇటుకను (Brick) తీసుకుని బాలికపై విచక్షణారహితంగా దాడి చేశాడు. ఆ తర్వాత ఎవరికీ తెలియకుండా గదికి బయట నుంచి లాక్ చేసి అక్కడి నుంచి వెళ్లిపోయాడు.

పబ్జీ గేమ్‌ల ప్రభావమే కారణం

ఈ దారుణ ఘటనపై బాధితురాలి అంకుల్ ఫాజిల్ మాట్లాడుతూ తీవ్ర ఆరోపణలు చేశారు. నిందితుడైన బాలుడు నిత్యం ‘పబ్జీ’ (PUBG) లాంటి హింసాత్మక ఆన్‌లైన్ వీడియో గేమ్‌లు ఆడేవాడని తెలిపారు. బాలుడి తండ్రి కూడా తన కొడుకు ఆ గేమ్‌లు ఆడతాడని ధృవీకరించినట్లు ఆయన పేర్కొన్నారు. ఇలాంటి హింసాత్మక గేమ్‌ల వ్యసనమే చిన్నారిపై ఇంతటి క్రూరంగా దాడి చేసేలా ప్రేరేపించి ఉంటుందని కుటుంబ సభ్యులు ఆవేదన వ్యక్తం చేశారు.

ప్రస్తుత పరిస్థితి మరియు ప్రభుత్వ చర్యలు
చండీగఢ్‌లోని ప్రతిష్టాత్మక పీజీఐఎంఈఆర్ (PGIMER) ఆసుపత్రిలో చికిత్స పొందుతున్న చిన్నారి, దాదాపు 40 గంటల తర్వాత స్పృహలోకి వచ్చింది. ప్రస్తుతం ఆమె ఆరోగ్యం కుదుటపడుతోందని, వైద్యులు ఆమెను నిరంతరం పర్యవేక్షిస్తున్నారని కుటుంబ సభ్యులు తెలిపారు. చిన్నారికి కావాల్సిన పూర్తి వైద్య ఖర్చులను ప్రభుత్వమే భరిస్తుందని అధికారులు హామీ ఇచ్చారు.

పాఠశాల భద్రతా వైఫల్యంపై తీవ్ర విమర్శలు వ్యక్తమవుతుండటంతో.. హర్యానా విద్యాశాఖ తీవ్రంగా స్పందించింది. నిర్లక్ష్యంగా వ్యవహరించిన ఇద్దరు జేబీటీ (JBT) ఉపాధ్యాయులను (సిమ్రంజిత్ కౌర్, పూజా రాణి) సస్పెండ్ చేసింది. హర్యానా బాలల హక్కుల పరిరక్షణ కమిషన్ (HSCPCR) ఈ ఘటనపై సుమోటోగా కేసు నమోదు చేసి, పంచకుల జిల్లా విద్యాశాఖ అధికారి నుండి సమగ్ర నివేదిక కోరింది. మరోవైపు పోలీసులు పాఠశాలపై, బాలుడిపై వేర్వేరుగా రెండు ఎఫ్‌ఐఆర్‌లు (FIRs) నమోదు చేసి దర్యాప్తు చేస్తున్నారు. పాఠశాలల్లో పిల్లల భద్రతపై రాష్ట్రవ్యాప్తంగా సేఫ్టీ ఆడిట్ నిర్వహించాలని ప్రభుత్వం ఆదేశించింది.ప్రస్తుతం చండీగఢ్ పీజీఐ ఆసుపత్రిలో చికిత్స పొందుతున్న చిన్నారి క్రమంగా కోలుకుంటోందని, వైద్యుల బృందం ఆమె ఆరోగ్యాన్ని నిరంతరం పర్యవేక్షిస్తోందని కుటుంబ సభ్యులు తెలిపారు.