Revanth Reddy| ధరణి దందాపై రేవంత్ ఫోకస్

Published: 16 Sep 2026 • 05:57 PM

Revanth Reddy: ఆకేరు న్యూస్, హైదరాబాద్: ఎర్రవల్లి ఫామ్‌హౌస్ భూములు, ధరణి పోర్టల్‌లో జరిగినట్లు ప్రభుత్వం ఆరోపిస్తున్న అక్రమ లావాదేవీలపై సీఎం రేవంత్ రెడ్డి అసెంబ్లీలో కీలక ఆదేశాలు జారీ చేశారు.

ఎర్రవల్లిలో 388 ఎకరాలు

సిద్దిపేట జిల్లా మర్కూక్ మండలం ఎర్రవల్లి పరిధిలోని సర్వే నంబర్ 325లో 388 ఎకరాల ప్రభుత్వ, అసైన్డ్, సీలింగ్ భూములు ఉన్నాయని సీఎం తెలిపారు. భూముల సరిహద్దులను గుర్తించి స్వాధీనం చేసుకోవాలని అధికారులను ఆదేశించారు. 30 రోజుల్లో విచారణ పూర్తి చేసి నివేదిక ఇవ్వాలని గడువు విధించారు. స్వాధీనం చేసుకునే భూమిలో 800 మంది దళిత కుటుంబాలకు పట్టాలు ఇవ్వనున్నట్లు ప్రకటించారు.

TM-33పై ఆరోపణలు

ధరణి పోర్టల్‌లోని TM-33 మాడ్యూల్ను ఉపయోగించి భూముల యాజమాన్య మార్పులు జరిగినట్లు రేవంత్ రెడ్డి ఆరోపించారు. మహబూబ్‌నగర్ జిల్లా బాలానగర్‌లో 122.08 ఎకరాల భూమి విషయంలో పత్రాలు లేకుండానే రికార్డుల్లో పేర్లు మార్చారని పేర్కొన్నారు. జన్వాడ పరిధిలో సత్యం సంస్థలకు చెందినట్లు పేర్కొన్న భూములు కేటీఆర్ కుటుంబ సభ్యుల పేర్లకు బదిలీ అయ్యాయని కూడా సీఎం ఆరోపించారు.

ఫోరెన్సిక్ ఆడిట్

ధరణి వ్యవహారాలపై విజిలెన్స్, సీఐడీ, ఫోరెన్సిక్ ఆడిట్ ద్వారా విచారణ జరుగుతోందని సీఎం తెలిపారు. అక్రమాలు నిర్ధారణ అయితే బాధ్యులపై చర్యలు తీసుకుంటామని అసెంబ్లీలో ప్రకటించారు.