Telangana Local Reservation,
* తెలంగాణలో వైద్యవిద్య ప్రవేశాలపై స్పష్టత
* నాలుగేళ్ల నిబంధన చెల్లుబాటు
ఆకేరు న్యూస్, న్యూఢిల్లీ : తెలంగాణలో వైద్య విద్య ప్రవేశాల్లో లోకల్ రిజర్వేషన్ల అమలుపై అత్యున్నత న్యాయస్థానం సుప్రీంకోర్టు కీలక అంశాలు వెల్లడించింది. రాష్ట్రంలో స్థానిక రిజర్వేషన్ పొందేందుకు ఎంబీబీఎస్ అర్హత పరీక్షకు ముందు వరుసగా నాలుగేళ్ల విద్యాభ్యాసం తప్పనిసరి అని స్పష్టం చేసింది.
గతంలో తాము ఇచ్చిన తీర్పులను పునరుద్ఘాటించిన ధర్మాసనం, తెలంగాణ ప్రభుత్వం తీసుకొచ్చిన ఈ జీవో రాజ్యాంగబద్ధమైనదేనని సమర్థించింది. రాష్ట్రపతి ఉత్తర్వులకు లోబడి లోకల్ కోటాను అమలు చేయాలని స్పష్టమైన ఆదేశాలు జారీ చేసింది.
పిటిషన్ కొట్టివేత
ఎంబీబీఎస్ ప్రవేశాల్లో నాలుగేళ్ల విద్యాభ్యాస నిబంధనను సవాల్ చేస్తూ అంకిత అనే విద్యార్థిని దాఖలు చేసిన పిటిషన్ను సుప్రీంకోర్టు ధర్మాసనం తీవ్రంగా పరిశీలించిన అనంతరం కొట్టివేసింది. వైద్య విద్య అర్హత పరీక్ష రాయడానికి ముందు విద్యార్థి వరుసగా నాలుగేళ్ల పాటు తెలంగాణలోనే చదివి ఉండాలన్న ప్రభుత్వ నిబంధన సమంజసమేనని న్యాయస్థానం అభిప్రాయపడింది.
స్థానిక విద్యార్థుల ప్రయోజనాలను కాపాడేందుకు తెలంగాణ ప్రభుత్వం జీవో 33 ద్వారా తెచ్చిన ఈ నిబంధన సరైనదేనని సదరు పిటిషన్ను తిరస్కరిస్తూ తీర్పు వెలువరించింది.
మెడికల్ విద్యార్థులకు లభించిన స్పష్టత
సుప్రీంకోర్టు ఇచ్చిన ఈ చారిత్రాత్మక తీర్పుతో తెలంగాణలోని మెడికల్ కోర్సుల ప్రవేశాల ప్రక్రియకు ఉన్న ప్రధాన అడ్డంకి తొలగిపోయింది. స్థానికత వివాదాల వల్ల కౌన్సెలింగ్ ప్రక్రియలో ఏర్పడే గందరగోళానికి తెరపడటంతో పాటు, తెలంగాణలోనే సుదీర్ఘకాలం చదివిన స్థానిక విద్యార్థులకు వైద్య సీట్ల కేటాయింపులో న్యాయం జరుగుతుందని విశ్లేషకులు భావిస్తున్నారు.
అత్యున్నత న్యాయస్థానం స్పష్టత ఇవ్వడంతో ప్రభుత్వం కూడా మెడికల్ ప్రవేశాల కౌన్సెలింగ్ను వేగవంతం చేయడానికి మార్గం సుగమమైంది.
About the Author
Please tell us what is wrong. Your report will be sent to the website team.
