Abhijeet Dipke
* నిరసనల వేళ విషాదం
* అంత్యక్రియలకు వెళ్తారా?
Abhijeet Dipke| ఆకేరు న్యూస్, న్యూఢిల్లీ: కాక్రోచ్ జనతా పార్టీ (సీజేపీ) వ్యవస్థాపకుడు, ముఖ్య కన్వీనర్ అభిజీత్ దీప్కే కుటుంబంలో విషాదం నెలకొంది. ఆయన నానమ్మ సావిత్రీ బాయి శంకర్ దీప్కే (80) మహారాష్ట్రలోని హింగోలి జిల్లాలో తమ స్వగ్రామంలో శనివారం కన్నుమూశారు. వయోభారంతో పాటు అనారోగ్య సమస్యలతో బాధపడుతున్న ఆమె ఆరోగ్య పరిస్థితి క్షీణించడంతో తుదిశ్వాస విడిచినట్లు కుటుంబ సభ్యులు వెల్లడించారు.
ఢిల్లీలో రాజకీయ ఉత్కంఠ
మరోవైపు దేశ రాజధాని ఢిల్లీలో రాజకీయ పరిణామాలు కొనసాగుతున్నాయి. కేంద్ర ఎన్నికల సంఘం నిర్ణయాలు, ఓటర్ల జాబితాల సవరణలో అక్రమాలు జరిగాయన్న ఆరోపణలకు వ్యతిరేకంగా జంతర్‌మంతర్ వద్ద నిరసన తెలిపేందుకు అభిజీత్ దీప్కే తన సహచర నేతలతో కలిసి ఢిల్లీకి చేరుకున్నారు. ఈ క్రమంలో విమానాశ్రయంలోనే పోలీసులు ఆయనను, సౌరవ్ దాస్, ఆశుతోష్ రంకాలను అదుపులోకి తీసుకున్నట్లు సమాచారం. అనంతరం వారిని మరో ప్రాంతానికి తరలించినట్లు కథనాలు వెలువడ్డాయి.
అంత్యక్రియలకు హాజరవుతారా?
అభిజీత్ దీప్కే పోలీసుల అదుపులో ఉన్న సమయంలోనే నానమ్మ మరణవార్త వెలువడటం కుటుంబ సభ్యులను విషాదంలో ముంచెత్తింది. సావిత్రీ బాయి అంత్యక్రియలను ఆదివారం ఉదయం స్వగ్రామంలో నిర్వహించేందుకు బంధువులు ఏర్పాట్లు చేస్తున్నట్లు సమాచారం.
నానమ్మకు అంతిమ వీడ్కోలు పలికేందుకు అభిజీత్ దీప్కే స్వగ్రామానికి వెళ్లగలరా? అనే అంశంపై స్పష్టత రావాల్సి ఉంది. పోలీసుల అనుమతి లేదా చట్టపరమైన ప్రక్రియ ద్వారా ఆయన అంత్యక్రియలకు హాజరయ్యే అవకాశం ఉందన్న సమాచారం ఉన్నప్పటికీ, దీనిపై అధికారిక ధ్రువీకరణ లేదు.
ఒకవైపు రాజకీయ పరిణామాలు, మరోవైపు కుటుంబంలో పెద్దదిక్కును కోల్పోవడం అభిజీత్ దీప్కే కుటుంబానికి తీవ్ర విషాదాన్ని మిగిల్చింది.
About the Author
Please tell us what is wrong. Your report will be sent to the website team.
