Mata Hasi Devi| 200 నాణెంపై హసి దేవి

Published: 22 Oct 2026 • 07:13 PM

* ముర్ము చేతుల మీదుగా విడుదల

Mata Hasi Devi| ఆకేరు న్యూస్, రాయ్‌పూర్‌: మాతా సాహిబ్‌ హసి దేవి 200వ జయంతిని పురస్కరించుకుని రూపొందించిన 200 స్మారక నాణెాన్ని రాష్ట్రపతి ద్రౌపది ముర్ము గురువారం విడుదల చేశారు. ఛత్తీస్‌గఢ్‌ రాజధాని రాయ్‌పూర్‌లోని లోక్‌భవన్‌లో ఈ కార్యక్రమం జరిగింది. ఛత్తీస్‌గఢ్‌ గవర్నర్‌ రమన్‌ డేకా, ముఖ్యమంత్రి విష్ణు దేవ్‌ సాయి తదితరులు కార్యక్రమంలో పాల్గొన్నారు.

నాణెం ప్రత్యేకతలు

మాతా హసి దేవి ఆధ్యాత్మిక సేవలు, సింధీ సమాజానికి ఆమె చేసిన కృషిని గుర్తు చేసుకునేలా ఈ స్మారక నాణెాన్ని రూపొందించారు. వృత్తాకారంలో ఉండే ఈ నాణెం 35 గ్రాముల బరువు, 44 మిల్లీమీటర్ల వ్యాసంతో ఉంటుంది. ఇందులో 50 శాతం వెండి, 40 శాతం రాగి, 5 శాతం నికెల్‌, 5 శాతం జింక్‌ ఉపయోగించారు.

నాణెం ఒకవైపు అశోక స్తంభంలోని సింహచిహ్నం, దాని కింద ‘సత్యమేవ జయతే’ అనే పదాలు, అంచుల వెంట ‘భారత్‌’, ‘ఇండియా’ పేర్లతో పాటు ₹200 విలువను ముద్రించారు. మరోవైపు మాతా సాహిబ్‌ హసి దేవి చిత్రాన్ని పొందుపరిచారు. ఆమె పేరుతో పాటు ‘200వ జయంతి’ వివరాలను హిందీ, ఆంగ్ల భాషల్లో ముద్రించారు. చిత్రానికి ఇరువైపులా 1826, 2026 సంవత్సరాలను పేర్కొన్నారు. నాణెం అంచున 200 గీతలు ఉంటాయి.

ఎవరీ మాతా హసి దేవి?

షాదాని దర్బార్‌ చారిత్రక వివరాల ప్రకారం.. మాతా సాహిబ్‌ హసి దేవి 1826లో ప్రస్తుతం పాకిస్థాన్‌లో ఉన్న సింధ్‌ ప్రాంతంలోని ఖాన్‌పూర్‌ మెహర్‌లో జన్మించారు. 1846లో సంత్‌ తన్సుఖ్‌రామ్‌ సాహిబ్‌ను వివాహం చేసుకున్నారు. అనంతరం 1852లో షాదాని దర్బార్‌ ఆధ్యాత్మిక నాయకత్వ బాధ్యతలు చేపట్టారు. ఈ సంప్రదాయంలో ఆమె ఐదో ఆధ్యాత్మిక గురువుగా సేవలందించారు.

షాదాని దర్బార్‌ ఆధ్యాత్మిక సంప్రదాయానికి 18వ శతాబ్దంలో సంత్‌ షాదారామ్‌ సాహిబ్‌ పునాది వేశారు. సింధ్‌ ప్రాంతంలో ప్రారంభమైన ఈ సంప్రదాయం ప్రస్తుతం భారత్‌లోని రాయ్‌పూర్‌తో పాటు పలు ప్రాంతాల్లో కొనసాగుతోంది. భారత్‌, పాకిస్థాన్‌లలోని సింధీ సమాజ భక్తులకు షాదాని దర్బార్‌ ప్రత్యేక ప్రాధాన్యం కలిగి ఉంది.

నాణెం ఎలా పొందాలి?

స్మారక నాణెం విడుదల అనంతరం షాదాని దర్బార్‌కు చెందిన వివిధ కేంద్రాల ద్వారా భక్తులు, నాణేల సేకరణదారులు దీనిని బుక్‌ చేసుకోవచ్చని వార్తా కథనాలు పేర్కొన్నాయి. అయితే, నాణెం విక్రయ ధర, బుకింగ్‌ విధానం, సాధారణ ప్రజలకు అందుబాటులోకి వచ్చే తేదీపై స్పష్టమైన వివరాలు వెల్లడికాలేదు.

మాతా హసి దేవి 200వ జయంతిని పురస్కరించుకుని విడుదల చేసిన ఈ నాణెం ద్వారా ఆమె ఆధ్యాత్మిక సేవలను భవిష్యత్‌ తరాలకు పరిచయం చేయడంతో పాటు సింధీ సమాజ చారిత్రక, ఆధ్యాత్మిక వారసత్వానికి గుర్తింపు కల్పించడమే లక్ష్యంగా పెట్టుకున్నారు.

President Droupadi Murmu released a ₹200 commemorative coin to mark the 200th birth anniversary of Pujya Mata Hasi Devi Ji at a function held at Lok Bhavan, Raipur. https://t.co/fDn3TVB0Na

— President of India (@rashtrapatibhvn) October 22, 2026