Nagarjuna Donates Two Acres
* తమ్మిడికుంట కోసం నాగార్జున 2 ఎకరాల విరాళం
* సీఎం చేతుల మీదుగా సన్మానం
ఆకేరు న్యూస్, హైదరాబాద్: సినిమాల్లో ఎన్నో విభిన్న పాత్రలతో ప్రేక్షకులను అలరించిన అక్కినేని నాగార్జున (Akkineni Nagarjuna) .. నిజజీవితంలోనూ తన పెద్ద మనసును చాటుకున్నారు. హైదరాబాద్‌లోని తమ్మిడికుంట చెరువు పునరుద్ధరణ కోసం రెండు ఎకరాల భూమిని ప్రభుత్వానికి అందించి సామాజిక బాధ్యతను చాటుకున్నారు. నాగార్జున తీసుకున్న ఈ నిర్ణయంపై తెలంగాణ ముఖ్యమంత్రి రేవంత్ రెడ్డి ప్రశంసలు కురిపించారు. సినిమాల్లోనే కాకుండా నిజజీవితంలోనూ నాగార్జున హీరోగా నిలిచారని కొనియాడారు.
* చెరువు అభివృద్ధి కోసం కీలక నిర్ణయం
హైదరాబాద్‌లోని మాదాపూర్, హైటెక్ సిటీ ప్రాంతంలో ఉన్న తమ్మిడికుంట చెరువు ఒకప్పుడు సుమారు 30 ఎకరాల విస్తీర్ణంలో ఉండేది. అయితే ఆక్రమణలు, ఇతర కారణాలతో చెరువు విస్తీర్ణం 14 ఎకరాలకు తగ్గిపోయింది. ఈ నేపథ్యంలో చెరువును తిరిగి పునరుద్ధరించి పూర్వ వైభవం తీసుకురావాలనే లక్ష్యంతో ప్రభుత్వం చర్యలు చేపట్టింది. ఈ క్రమంలో సినీనటుడు అక్కినేని నాగార్జున ముందుకొచ్చి చెరువు అభివృద్ధి కోసం తనకు సంబంధించిన రెండు ఎకరాల భూమిని ప్రభుత్వానికి అప్పగించారు. దీంతో చెరువు విస్తరణ, పునరుద్ధరణకు మార్గం సుగమమైంది. గతంలో 14 ఎకరాలకు కుంచించుకుపోయిన తమ్మిడికుంటను తిరిగి సుమారు 30 ఎకరాలకు విస్తరించి అభివృద్ధి చేశారు.
* ఎన్-కన్వెన్షన్ కూల్చివేత తర్వాత కీలక పరిణామం
2024 ఆగస్టులో నాగార్జునకు చెందిన ఎన్-కన్వెన్షన్ సెంటర్‌ను హైడ్రా అధికారులు కూల్చివేసిన విషయం తెలిసిందే. తమ్మిడికుంట చెరువు పరిధిలోని ఫుల్ ట్యాంక్ లెవల్ (FTL), బఫర్ జోన్‌లో ఆక్రమణలు ఉన్నాయనే ఆరోపణల నేపథ్యంలో ఈ చర్య చేపట్టారు. ఈ వ్యవహారం అప్పట్లో తీవ్ర చర్చనీయాంశమైంది. ఆ తర్వాత నాగార్జున హైడ్రా కమిషనర్ రంగనాథ్‌ను కలిసి పరిస్థితిని వివరంగా తెలుసుకున్నట్లు వెల్లడించారు. నగర అభివృద్ధి, చెరువుల పరిరక్షణ ప్రాధాన్యతను అర్థం చేసుకున్న అనంతరం తన రెండు ఎకరాల భూమిని ప్రభుత్వానికి అప్పగించాలని నిర్ణయించుకున్నట్లు తెలిపారు.
* నాగార్జునపై సీఎం రేవంత్ రెడ్డి ప్రశంసలు
తమ్మిడికుంట చెరువు పునరుద్ధరణ పనులు పూర్తయిన అనంతరం ముఖ్యమంత్రి రేవంత్ రెడ్డి, నాగార్జునతో కలిసి చెరువును ప్రారంభించారు. ఈ సందర్భంగా ఏర్పాటు చేసిన కార్యక్రమంలో నాగార్జున సేవాభావాన్ని సీఎం ప్రత్యేకంగా ప్రశంసించారు. చెరువును 14 ఎకరాల నుంచి 30 ఎకరాలకు విస్తరించే క్రమంలో నాగార్జున పెద్ద మనసుతో రెండు ఎకరాల స్థలాన్ని అందించారని తెలిపారు. సంపాదించిన దాంట్లో సమాజానికి తిరిగి ఇవ్వాలనే ఆలోచనతో ఆయన ముందుకొచ్చారని కొనియాడారు. నాగార్జున సినిమాల్లోనే కాకుండా నిజజీవితంలోనూ హీరోగా నిలిచారని సీఎం వ్యాఖ్యానించారు. అభివృద్ధి కార్యక్రమాల్లో స్వచ్ఛందంగా భాగస్వాములయ్యే వారిని ప్రభుత్వం గౌరవిస్తుందని గతంలోనే ప్రకటించామని, అందులో భాగంగా నాగార్జునను శాలువాతో సత్కరించినట్లు తెలిపారు.
* చెరువు అందంపై నాగార్జున ఆనందం
తమ్మిడికుంట చెరువు పునరుద్ధరణతో వచ్చిన మార్పును చూసి నాగార్జున సంతోషం వ్యక్తం చేశారు. విదేశాల్లో అందమైన సరస్సులను చూసినప్పుడు మన దేశంలోనూ ఇలాంటి చెరువులు ఎందుకు ఉండకూడదని అనుకునేవాడినని, ఇప్పుడు తమ్మిడికుంటను చూస్తుంటే ఎంతో ఆనందంగా ఉందని పేర్కొన్నారు. చెరువును ఇంత అందంగా తీర్చిదిద్దిన హైడ్రా కమిషనర్ రంగనాథ్‌ను నాగార్జున అభినందించారు. తన తదుపరి సినిమా షూటింగ్‌ను ఇదే చెరువు పరిసరాల్లో నిర్వహించేందుకు అనుమతి ఇవ్వాలని ముఖ్యమంత్రిని సరదాగా కోరారు. అంతేకాకుండా రాష్ట్రంలో మరో రెండు వేల చెరువులను కూడా ఇదే తరహాలో పునరుద్ధరించాలని సూచించారు.
* అభివృద్ధిలో భాగస్వామ్యం కావాలన్న సందేశం
తమ్మిడికుంట చెరువు పునరుద్ధరణ కోసం నాగార్జున తీసుకున్న నిర్ణయం పర్యావరణ పరిరక్షణలో వ్యక్తిగత భాగస్వామ్యం ఎంత ముఖ్యమో తెలియజేస్తోంది. నగరాల్లో చెరువులు, సరస్సులు కేవలం నీటి వనరులు మాత్రమే కాదు.. భూగర్భ జలాల పెరుగుదలకు, పర్యావరణ సమతుల్యతకు, ప్రజలకు ఆహ్లాదకరమైన వాతావరణాన్ని అందించడానికి కూడా ఉపయోగపడతాయి. తమ్మిడికుంట పునరుద్ధరణలో నాగార్జున అందించిన సహకారాన్ని ముఖ్యమంత్రి ప్రత్యేకంగా గుర్తించి సత్కరించడం ఈ కార్యక్రమంలో ప్రధాన ఆకర్షణగా నిలిచింది. సమాజ ప్రయోజనం కోసం ముందుకొచ్చిన నాగార్జున నిర్ణయం ఇప్పుడు చర్చనీయాంశంగా మారింది.
About the Author
Please tell us what is wrong. Your report will be sent to the website team.
