Jayashankar Bhupalpally | భూపాలపల్లి మున్సిపల్ కార్మికుల ధర్నా

Published: 14 Aug 2026 • 05:41 PM

* 152 మంది కార్మికుల ఆందోళన

ఆకేరు న్యూస్, జయశంకర్ భూపాలపల్లి: జయశంకర్ భూపాలపల్లి మున్సిపాలిటీలో పనిచేస్తున్న పారిశుధ్య, ఇతర మున్సిపల్ కార్మికుల వేతనాలపై ప్రభుత్వం తీవ్ర కోతలు విధించడాన్ని నిరసిస్తూ కార్మికులు ఆగ్రహం వ్యక్తం చేశారు.

మున్సిపాలిటీ పరిధిలో పనిచేస్తున్న 152 మంది కార్మికుల వేతనాలను తగ్గించేందుకు ప్రభుత్వం చేపట్టిన చర్యలను తీవ్రంగా ఖండిస్తూ, జిల్లా కేంద్రంలోని మున్సిపల్ కార్యాలయం ఎదుట కార్మికులు గురువారం పెద్ద ఎత్తున నిరసన ప్రదర్శన చేపట్టారు. తమ న్యాయమైన డిమాండ్లను పరిష్కరించాలని, పాత పద్ధతిలోనే పూర్తి వేతనాలు చెల్లించాలని డిమాండ్ చేశారు.

* జీవో నెం. 69 పేరిట తీవ్ర అన్యాయం..

ఈ నిరసన కార్యక్రమంలో మున్సిపల్ కార్మికులు మాట్లాడుతూ జీవో నంబర్ 69 ప్రకారం తమ వేతనాలను తగ్గించాలంటూ హైదరాబాద్ ఉన్నతాధికారుల నుంచి ఆదేశాలు వచ్చాయని తెలపడంపై తీవ్ర ఆగ్రహం వ్యక్తం చేశారు. ప్రజా ప్రతినిధులు, కౌన్సిల్ నిర్ణయాలను సైతం పక్కనబెట్టి అధికారుల ఆదేశాల నెపంతో జీతాలు తగ్గించడం సరికాదన్నారు. ఇటీవల జరిగిన మున్సిపల్ కౌన్సిల్ సమావేశంలో కార్మికుల శ్రమను, వారి కుటుంబ సంక్షేమాన్ని దృష్టిలో ఉంచుకుని 152 మంది కార్మికులకు ఎలాంటి కోతలు లేకుండా పాత పద్ధతిలోనే జీతాలు చెల్లించాలని కౌన్సిల్ ఏకగ్రీవంగా తీర్మానం చేసిన విషయాన్ని ఈ సందర్భంగా గుర్తుచేశారు.

* కౌన్సిల్ తీర్మానాన్ని పక్కనబెట్టిన కమిషనర్..

కౌన్సిల్ ఏకగ్రీవంగా తీర్మానం చేసినప్పటికీ, మున్సిపల్ కమిషనర్ మాత్రం పైఅధికారుల నుంచి వచ్చిన ఆదేశాలను అమలు చేయాల్సిందేనని స్పష్టం చేయడం సమంజసం కాదని కార్మికులు ఆవేదన వ్యక్తం చేశారు. స్థానిక కౌన్సిల్ తీర్మానానికి విలువ ఇవ్వకుండా, ఉన్నతాధికారుల ఒత్తిళ్లకు తలొగ్గి కార్మికుల పొట్ట కొట్టడం దారుణమని మండిపడ్డారు.

* కుటుంబాలపై తీవ్ర ఆర్థిక భారం..

అహర్నిశలు కష్టపడుతూ, పట్టణాన్ని శుభ్రంగా ఉంచుతూ ప్రజలకు నిరంతరం సేవలందిస్తున్న తమ వేతనాల్లో కోతలు విధించడం వల్ల తమ కుటుంబ పోషణ తీవ్ర భారంగా మారుతుందని ఆందోళన వ్యక్తం చేశారు. ప్రస్తుతం అమలు చేయాలనుకుంటున్న ఉత్తర్వుల వల్ల ఒక్కో కార్మికుడి వేతనం నుంచి నెలకు సుమారు రూ.1,000 నుండి రూ.4,900 వరకు కోత పడే పరిస్థితి ఉందన్నారు. నిత్యావసర ధరలు పెరుగుతున్న కాలంలో ఇలా జీతాలు తగ్గించడం వల్ల తమ జీవనోపాధి దెబ్బతింటుందని వాపోయారు.

* 14వ తేదీ వచ్చినా చెల్లించని వేతనాలు..

నెలంతా కష్టపడి పనిచేస్తే నెలాఖరుకల్లా లేదా నెల ప్రారంభంలో జీతాలు రావాల్సి ఉండగా, ఈ నెల 14వ తేదీ వచ్చినా ఇప్పటివరకు వేతనాలు చెల్లించకపోవడం ప్రభుత్వం మరియు అధికారుల నిర్లక్ష్యానికి నిదర్శనమని మండిపడ్డారు. “నెలంతా రక్తాన్ని చెమటగా మార్చి పనిచేసిన మేము, జీతాలు రాకపోతే కుటుంబాలను ఎలా పోషించుకోవాలి?” అని ప్రభుత్వాన్ని మరియు అధికారులను నిలదీశారు.

* డిమాండ్లు నెరవేరకపోతే ఆందోళనలు ఉధృతం..

వెంటనే జీవో 69ని సవరించి, కౌన్సిల్ తీర్మానం ప్రకారం 152 మంది కార్మికులకు పాత పద్ధతిలోనే పూర్తి వేతనాలు చెల్లించాలని, నిలిచిపోయిన వేతనాలను తక్షణమే విడుదల చేయాలని డిమాండ్ చేశారు.

ప్రభుత్వం మరియు కమిషనర్ స్పందించి తమ వేతన కోతలను ఉపసంహరించుకోకపోతే రాబోయే రోజుల్లో ఆందోళన బాట పడతామని కార్మికులు స్పష్టం చేశారు. ఈ కార్యక్రమంలో మున్సిపల్ కార్మిక సంఘ నాయకులు, కార్మికులు పెద్ద సంఖ్యలో పాల్గొన్నారు.