Vijayawada | విజ‌య‌వాడ టెర్మిన‌ల్ ప్రారంభం ఆల‌స్యం

Published: 08 Sep 2026 • 07:56 PM

* ద‌స‌రాకు అనుకున్నాం కానీ..

* కేంద్ర మంత్రి రామ్మోహ‌న్ నాయుడు

ఆకేరున్యూస్‌, విజ‌య‌వాడ : విజయవాడ విమానాశ్రయ ఇంటిగ్రేటెడ్ టెర్మిన‌ల్‌ పనులను కేంద్ర పౌర విమానయాన శాఖ మంత్రి కింజరాపు రామ్మోహన్ నాయుడు పరిశీలించారు. ఇంటిగ్రేటెడ్ టెర్మినల్ పనుల ప్రగతిని అధికారులు ఆయ‌న‌కు వివరించారు. పనులు మధ్యలో ఆగడం వల్లే టెర్మిన‌ల్‌ పూర్తి కాలేదని, సమస్యలను అధిగమించి వేగంగా పనులు చేస్తున్నామని రామ్మోహ‌న్ తెలిపారు.

దసరా నాటికి ప్రారంభించాలని అనుకున్నా.. మరికొంత సమయం పట్టే అవకాశం ఉందని వెల్లడించారు. సంస్కృతి, సంప్రదాయాలు ఉట్టిపడేలా టెర్మినల్ తయారీ ఉంటుందన్నారు

* స‌మ‌స్య‌ల‌ను అధిగ‌మించి..

రవాణా సౌకర్యాల విస్తరణలో భాగంగా చేపట్టిన ఈ అధునాతన టెర్మినల్ ప్రాజెక్టు పురోగతిని, నిర్మాణ పురోగతికి సంబంధించిన మ్యాప్‌లను ఎయిర్‌పోర్ట్ అథారిటీ ఆఫ్ ఇండియా ఉన్నతాధికారులు, ఇంజనీర్ల బృందం కేంద్రమంత్రికి వివరించింది. ఈ సందర్భంగా కేంద్రమంత్రి రామ్మోహన్ నాయుడు మీడియాతో మాట్లాడారు. గత ప్రభుత్వ హయాంలో నిధుల కేటాయింపులు, సాంకేతిక సమస్యల కారణంగా పనులు మధ్యలోనే నిలిచిపోవడం వల్లే టెర్మినల్ నిర్మాణం తీవ్రంగా ఆలస్యమైందని తెలిపారు. కూటమి ప్రభుత్వం అధికారంలోకి వచ్చాక ఆయా అడ్డంకులను ఒక్కొక్కటిగా అధిగమించి పనుల్లో వేగం పెంచామని పేర్కొన్నారు. అనుకున్న సమయానికి ప్రాజెక్టును పూర్తి చేయడానికి ప్రాధాన్యత ఇస్తున్నామని వివరించారు.

* మ‌రికొంత స‌మ‌యం..

వాస్తవానికి ఈ కొత్త టెర్మినల్‌ను దసరా పండుగ కానుకగా ప్రారంభించాలని భావించినప్పటికీ, అంతర్జాతీయ ప్రమాణాలకు అనుగుణంగా మిగిలిన మౌలిక వసతుల పనులు పూర్తి కావడానికి మరికొంత సమయం పట్టే అవకాశం ఉందని వెల్లడించారు. పనుల్లో నాణ్యత విషయంలో ఎలాంటి రాజీ పడకుండా, ప్రయాణికులకు అవసరమైన అన్ని ఆధునిక సదుపాయాలను సిద్ధం చేసిన తర్వాతే ప్రారంభోత్సవం జరుపుతామని ఆయన స్పష్టం చేశారు.

* సంస్కృతి, సంప్ర‌దాయాలుఉట్టిప‌డేలా..

ఆంధ్రప్రదేశ్ కళలు, చరిత్ర సాంస్కృతిక సంప్రదాయాలు ఉట్టిపడేలా ఈ ఇంటిగ్రేటెడ్ టెర్మినల్‌ రూపకల్పన ఉంటుందని రామ్మోహన్ నాయుడు తెలిపారు. విమానాశ్రయానికి వచ్చే దేశీయ, అంతర్జాతీయ ప్రయాణికులను ఆకట్టుకునేలా అమరావతి శిల్పకళ, తెలుగు సంస్కృతి ప్రతిబింబించే డిజైన్లతో పాటు అంతర్జాతీయ స్థాయి చెక్-ఇన్ కౌంటర్లు, బ్యాగేజ్ హ్యాండ్లింగ్ సిస్టమ్స్ మరియు ఏరోబ్రిడ్జ్‌లను నిర్మిస్తున్నట్లు ఆయ‌న వివ‌రించారు.