BRS Protest | కరెంట్ కోతలపై బీఆర్ఎస్ నిరసన..

Published: 24 Sep 2026 • 06:45 PM

* కేటీపీపీ వద్ద బీఆర్ఎస్ నేతల ధర్నా

ఆకేరు న్యూస్, భూపాల్ పల్లి : రాష్ట్రంలో కరెంట్ కోతలకు నిరసనగా జయశంకర్ భూపాలపల్లి జిల్లా చెల్పూర్‌లోని కాకతీయ థర్మల్ పవర్ ప్లాంట్‌ను బీఆర్ఎస్ బృందం సందర్శించింది. ఈ సందర్భంగా పోలీసులు ప్లాంట్‌లోకి అనుమతించకపోవడంతో మాజీ మంత్రి ఎర్రబెల్లి దయాకర్ రావు ఆధ్వర్యంలో బీఆర్ఎస్ నాయకులు అక్కడే ధర్నా నిర్వహించారు.

*బీఆర్ఎస్ నేతల ముఖ్య డిమాండ్లు..

అనుమతి నిరాకరణపై ఆగ్రహం : ప్రజల ఆస్తి అయిన పవర్ ప్లాంట్‌ను పరిశీలించేందుకు వచ్చిన ప్రజాప్రతినిధులను అడ్డుకోవడం వెనుక ఉద్దేశం ఏంటని, ప్రభుత్వం దేన్ని దాచాలని చూస్తోందని ఎర్రబెల్లి దయాకర్ రావు పోలీసులను, ప్రభుత్వాన్ని నిలదీశారు.

వాస్తవాలు వెల్లడించాలి : ప్లాంట్‌లో విద్యుత్ ఉత్పత్తి పరిస్థితి, యూనిట్ల పనితీరు, బొగ్గు సరఫరా వంటి అంశాలపై ప్రజలకు స్పష్టత ఇవ్వాల్సిన బాధ్యత ప్రభుత్వంపై ఉందన్నారు.

నిరంతర విద్యుత్‌పై ప్రశ్నలు: రైతులకు 24 గంటల విద్యుత్ సరఫరా ఎక్కడ అని ప్రశ్నిస్తూ, రాష్ట్రంలో విద్యుత్ పరిస్థితిపై ప్రభుత్వం వాస్తవాలను బయటపెట్టాలని డిమాండ్ చేశారు.

కార్యక్రమంలో మాజీ మంత్రి సత్యవతి రాథోడ్, ఎమ్మెల్యే పల్లా రాజేశ్వర్ రెడ్డి, మాజీ ఎమ్మెల్యేలు గండ్ర వెంకటరమణ రెడ్డి, ఆరూరి రమేష్, శంకర్ నాయక్, ములుగు జిల్లా బీఆర్ఎస్ అధ్యక్షుడు లక్ష్మణ్ రావు తదితరులు పాల్గొన్నారు.