CM Revanth Reddy | హైదరాబాద్‌కు ఆక్స్‌ఫర్డ్ యూనివర్సిటీ

Published: 22 Aug 2026 • 01:14 PM

* లండన్‌లో సీఎం రేవంత్ రెడ్డి బిజీ బిజీ

ఆకేరు న్యూస్, డెస్క్: తెలంగాణను విద్య, పరిశోధన, ఆవిష్కరణలు మరియు క్రీడలకు అంతర్జాతీయ కేంద్రంగా తీర్చిదిద్దే లక్ష్యంతో ముఖ్యమంత్రి శ్రీ ఎ. రేవంత్ రెడ్డి నేతృత్వంలోని ‘తెలంగాణ రైజింగ్’ ప్రతినిధి బృందం లండన్‌లో విస్తృతంగా పర్యటిస్తోంది. ఈ పర్యటనలో భాగంగా ప్రపంచ ప్రఖ్యాత ఆక్స్‌ఫర్డ్ యూనివర్సిటీ ప్రతినిధులను కలవడంతో పాటు, జీఎంఆర్ గ్రూప్ క్రీడా ప్రాంగణాన్ని సీఎం పరిశీలించారు.

* ఆక్స్‌ఫర్డ్ వర్సిటీకి సీఎం ఆహ్వానం..

900 ఏళ్ల ఘన చరిత్ర కలిగిన ఆక్స్‌ఫర్డ్ యూనివర్సిటీని సందర్శించిన సీఎం రేవంత్ రెడ్డి, అక్కడ బ్లోవాట్నిక్ స్కూల్ ఆఫ్ గవర్నమెంట్‌కు చెందిన ప్రొఫెసర్ మాయా ట్యూడర్, బేలియోల్ కాలేజీకి చెందిన ప్రొఫెసర్ ఫైసల్ దేవ్జీలతో సమావేశమయ్యారు. తెలంగాణలో ఎగ్జిక్యూటివ్ ఎడ్యుకేషన్, పరిశోధనా కేంద్రాలు ఏర్పాటు చేయాలని, రాష్ట్ర యువతకు ప్రపంచస్థాయి విద్యా అవకాశాలు కల్పించేందుకు హైదరాబాద్‌లో ప్రత్యేకాధికార సెంటర్‌ను ప్రారంభించాలని కోరారు.

ఈ సందర్భంగా సీఎం కార్యాలయ ప్రత్యేక ప్రధాన కార్యదర్శి కె. రామకృష్ణారావు జాతీయ విద్యా విధానం (NEP) కింద విదేశీ యూనివర్సిటీలకు లభించే ప్రయోజనాలపై ప్రజెంటేషన్ ఇచ్చారు. తెలంగాణ ప్రభుత్వ ప్రతిపాదనలపై ఆక్స్‌ఫర్డ్ ప్రతినిధులు సానుకూలంగా స్పందిస్తూ, కలిసి పనిచేసేందుకు ఆసక్తి చూపారు. డిసెంబర్ 7, 8, 9 తేదీల్లో హైదరాబాద్‌లో జరగనున్న ‘తెలంగాణ రైజింగ్ గ్లోబల్ సమ్మిట్’కు రావాలని ఆక్స్‌ఫర్డ్ బృందాన్ని సీఎం ఆహ్వానించారు.

* ఇందిరా గాంధీ చిత్రపటానికి నివాళులు…

అనంతరం సీఎం రేవంత్ రెడ్డి సోమర్‌విల్ కాలేజీని సందర్శించి, అక్కడ విద్యాభ్యాసం చేసిన భారత మాజీ ప్రధాని దివంగత ఇందిరా గాంధీ గారి చిత్రపటాన్ని తిలకించారు. (ఈ చిత్రాన్ని 2002లో సోనియా గాంధీ బహూకరించారు).

* క్రీడారంగంలో పెట్టుబడులు – జీఎంఆర్‌తో మంతనాలు…

జీఎంఆర్ గ్రూప్ నిర్వహిస్తున్న ప్రసిద్ధ యుటిలిటా బౌల్ (గోల్ఫ్ కోర్స్, స్పోర్ట్స్ ఇన్ఫ్రాస్ట్రక్చర్, హోటల్ కాంప్లెక్స్)ను సీఎం సందర్శించారు. జీఎంఆర్ కార్పొరేట్ చైర్మన్ కిరణ్ కుమార్ గ్రంథితో కలిసి తెలంగాణలో అంతర్జాతీయ స్థాయి క్రీడా వసతులు, స్టేడియంల అభివృద్ధిపై చర్చించారు. రాష్ట్రంలో పెట్టుబడులు పెట్టాలని జీఎంఆర్ గ్లోబల్ స్పోర్ట్స్ యూనిట్‌ను ఆహ్వానించారు.
ఈ పర్యటన ముగింపుగా, ఎమిరేట్స్ స్టేడియంలో ఆర్సెనల్ వర్సెస్ కోవెంట్రీ మధ్య జరిగే ఈపీఎల్ (EPL) ఫుట్‌బాల్ మ్యాచ్‌ను వీక్షించేందుకు సీఎం బృందం హాజరవుతోంది.