Hyderabad Heavy Rain Alert
ఆకేరు న్యూస్, హైదరాబాద్: నగరవాసులను ఎండల నుంచి ఉపశమనం కలిగిస్తూ నైరుతి రుతుపవనాలు (Southwest Monsoon) రాష్ట్రంలోకి ప్రవేశించాయి. దీని ప్రభావంతో హైదరాబాద్లోని పలు ప్రాంతాల్లో ఉరుములు, మెరుపులు, ఈదురుగాలులతో కూడిన భారీ వర్షం కురుస్తోంది. ముఖ్యంగా నగరంలోని తూర్పు, పశ్చిమ ప్రాంతాల్లో వర్షం బీభత్సం సృష్టిస్తోంది.
* నగరంలో ప్రస్తుత పరిస్థితి…
ప్రస్తుతం నగరవ్యాప్తంగా ఆకాశం పూర్తిగా మేఘావృతమై ఉంది. ఉప్పల్, నాగోల్, ఎల్బీనగర్, వనస్థలిపురం, మల్కాజ్గిరి, అంబర్పేట్, దిల్సుఖ్నగర్ వంటి తూర్పు ప్రాంతాలలో అత్యధికంగా 40 mm నుండి 50 mm వరకు భారీ వర్షం నమోదవుతోంది.
మరోవైపు పశ్చిమ భాగాలైన పటాన్చెరు, అమీన్పూర్, బాచుపల్లి వైపు కూడా బలమైన ఉరుములు, మెరుపులతో కూడిన సిస్టమ్స్ డెవలప్ అవుతున్నాయి. దీనివల్ల లోతట్టు ప్రాంతాలు జలమయమయ్యే అవకాశం ఉందని వాతావరణ నిపుణులు హెచ్చరిస్తున్నారు. రోడ్లపై నీరు నిలవడంతో ట్రాఫిక్కు తీవ్ర అంతరాయం ఏర్పడుతోంది.
* రాగల 48 గంటల వాతావరణ హెచ్చరిక ..
భారత వాతావరణ శాఖ (IMD) హైదరాబాద్ కేంద్రం తెలిపిన వివరాల ప్రకారం.. తెలంగాణ అంతటా రాగల 48 గంటల పాటు భారీ నుంచి అతి భారీ వర్షాలు కురిసే అవకాశం ఉంది.
గాలి వేగం గంటకు 40 నుండి 50 కిలోమీటర్ల వేగంతో ఈదురుగాలులు వీచే అవకాశం ఉంది.
* ఎల్లో అలర్ట్…
హైదరాబాద్తో పాటు చుట్టుపక్కల ఉన్న రంగారెడ్డి, మేడ్చల్ మల్కాజ్గిరి, వికారాబాద్, సంగారెడ్డి, మెదక్ జిల్లాలకు వాతావరణ శాఖ ‘ఎల్లో అలర్ట్’ (Yellow Alert) జారీ చేసింది. వర్షాల కారణంగా నగరంలో గరిష్ట ఉష్ణోగ్రత 36°C కి పడిపోగా, కనిష్ట ఉష్ణోగ్రత 25°C గా నమోదయ్యే అవకాశం ఉంది.
* జీహెచ్ఎంసీ (GHMC) అలర్ట్…
భారీ వర్షాల నేపథ్యంలో అత్యవసరమైతే తప్ప నగరవాసులు బయటకు రావద్దని అధికారులు సూచించారు. మ్యాన్హోల్స్, తెగిపడిన విద్యుత్ తీగలకు దూరంగా ఉండాలని, ఏవైనా అత్యవసర సమస్యలు ఉంటే జీహెచ్ఎంసీ కంట్రోల్ రూమ్ను సంప్రదించాలని కోరారు.
About the Author
Please tell us what is wrong. Your report will be sent to the website team.
