ChatGPT Exam Incident | పరీక్షలో కాపీయింగ్ ఆరోపణ..

Published: 19 Sep 2026 • 10:58 AM

* ఐఐటీ బాంబేలో విద్యార్థి మృతి
* కౌన్సెలింగ్ ఇచ్చినా ఆపలేకపోయారు..
* యాజమాన్య తీరుపై భగ్గుమంటున్న విద్యార్థులు

ఆకేరు న్యూస్, డెస్క్ : దేశంలోని ప్రతిష్టాత్మక విద్యాసంస్థ అయిన ఇండియన్ ఇన్‌ఫ్రాస్ట్రక్చర్ ఆఫ్ టెక్నాలజీ (IIT) బాంబే క్యాంపస్‌లో తీవ్ర విషాదం చోటుచేసుకుంది. పరీక్షలో కృత్రిమ మేధస్సు (AI) టూల్‌ను వాడుతూ పట్టుబడిన ఓ విద్యార్థి మనస్తాపంతో బలవన్మరణానికి పాల్పడ్డాడు. ఈ ఘటనతో ఐఐటీ క్యాంపస్‌లో ఒక్కసారిగా ఉద్రిక్త వాతావరణం నెలకొంది. విద్యార్థులు పెద్ద ఎత్తున నిరసనలకు దిగడంతో అధికారులు అప్రమత్తమయ్యారు.

*అసలు ఏం జరిగిందంటే..

ఐఐటీ బాంబేలోని ‘డిపార్ట్‌మెంట్ ఆఫ్ ఎనర్జీ సైన్స్ అండ్ ఇంజనీరింగ్’ విభాగంలో సాహిల్ వాకోడే (Sahil Wakode) అనే విద్యార్థి సెకండ్ ఇయర్ (రెండో సంవత్సరం) చదువుతున్నాడు. అయితే ఇటీవల జరిగిన మిడ్-సెమిస్టర్ పరీక్షల సమయంలో సాహిల్ తన మొబైల్ ఫోన్‌ను ఉపయోగించి ప్రశ్నపత్రాన్ని చాట్‌జీపీటీ (ChatGPT)లో అప్‌లోడ్ చేసి సమాధానాలు వెతికే ప్రయత్నం చేశాడు. దీనిని గమనించిన పరీక్షా హాల్‌లోని ఇన్విజిలేటర్లు అతడిని రెడ్ హ్యాండెడ్‌గా పట్టుకుని ఉన్నతాధికారుల దృష్టికి తీసుకెళ్లారు.

*హెచ్‌వోడీ మరియు ఇన్‌స్ట్రక్టర్ కౌన్సెలింగ్..

ఈ ఘటనపై కోర్సు ఇన్‌స్ట్రక్టర్ మరియు విభాగాధిపతి (HoD) సాహిల్‌ను పిలిచి మాట్లాడారు. పరీక్షలో ఇలా చేయడం నిబంధనలకు విరుద్ధమైనప్పటికీ, ఈ చిన్న పొరపాటు కారణంగా అతని అకడమిక్ కెరీర్ లేదా భవిష్యత్తుపై ఎలాంటి ప్రతికూల ప్రభావం పడదని, ఎలాంటి క్రమశిక్షణా చర్యలు (Disciplinary Action) ఉండవని వారు సాహిల్‌కు ధైర్యం చెప్పారు. అధ్యాపకులు ఎంతో సానుకూలంగా స్పందించి అతనికి కౌన్సెలింగ్ ఇచ్చి హాస్టల్ గదికి పంపించారు.

*హాస్టల్ గదిలో విగతజీవిగా..

అధ్యాపకులు ధైర్యం చెప్పినప్పటికీ, పరీక్షలో పట్టుబడ్డానన్న తీవ్రమైన మానసిక ఆందోళన, అభద్రతా భావం నుంచి సాహిల్ బయటపడలేకపోయాడు. సాయంత్రం సమయంలో అతను తన హాస్టల్ గదిలో విగతజీవిగా కనిపించాడు. సమాచారం అందుకున్న పోలీసులు వెంటనే ఘటనా స్థలానికి చేరుకుని మృతదేహాన్ని స్వాధీనం చేసుకున్నారు మరియు ఈ ఘటనపై కేసు నమోదు చేసి దర్యాప్తు ప్రారంభించారు.

*భగ్గుమన్న క్యాంపస్..

సాహిల్ ఆత్మహత్య వార్త తెలియడంతో తోటి విద్యార్థులు తీవ్ర దిగ్భ్రాంతికి గురయ్యారు. క్యాంపస్‌లో వరుసగా జరుగుతున్న ఆత్మహత్యలపై విద్యార్థులు తీవ్ర ఆగ్రహం వ్యక్తం చేశారు. వందలాది మంది విద్యార్థులు అడ్మినిస్ట్రేషన్ బిల్డింగ్ ముందు బైఠాయించి రాత్రంతా నిరసన తెలిపారు. విద్యార్థుల మానసిక ఆరోగ్యంపై యాజమాన్యం సరైన శ్రద్ధ పెట్టడం లేదని, క్యాంపస్‌లో జవాబుదారీతనం కొరవడిందని ఆరోపించారు. ఈ ఏడాదిలో క్యాంపస్‌లో ఇలాంటి ఘటన జరగడం ఇది మూడోసారినని విద్యార్థులు ఆవేదన వ్యక్తం చేశారు.

పరిస్థితి చేయి దాటకుండా ఉండేందుకు ఐఐటీ డైరెక్టర్ విద్యార్థులతో రాత్రిపూట చర్చలు జరిపారు. విద్యార్థుల డిమాండ్ మేరకు ప్రస్తుతానికి కొనసాగుతున్న మిడ్-సెం పరీక్షలను తాత్కాలికంగా వాయిదా వేస్తున్నట్లు యాజమాన్యం ప్రకటించింది.