KCR Stand Peddi Family Financial | రూ.2.25 కోట్ల సాయం

Published: 08 Aug 2026 • 03:14 PM

* పెద్ది కుటుంబానికి కేసీఆర్ భరోసా

ఆకేరు న్యూస్, వరంగల్: భారత రాష్ట్ర సమితి (BRS) మలిదశ తెలంగాణ ఉద్యమకారుడు, నర్సంపేట మాజీ ఎమ్మెల్యే దివంగత పెద్ది సుదర్శన్ రెడ్డి కుటుంబానికి పార్టీ అధినేత, మాజీ ముఖ్యమంత్రి K. చంద్రశేఖర్ రావు కొండంత అండగా నిలిచారు. ఇటీవల అకాల మరణం చెందిన పెద్ది సుదర్శన్ రెడ్డి కుటుంబాన్ని అన్ని విధాలా ఆదుకుంటామని ప్రకటించిన కేసీఆర్, పార్టీ తరఫున రూ. 2.25 కోట్ల ఆర్థిక సాయాన్ని మంజూరు చేస్తున్నట్లు గురువారం అధికారికంగా వెల్లడించారు.

* భవిష్యత్తుకు ఆర్థిక సాయం..

పెద్ది సుదర్శన్ రెడ్డి అకస్మాత్తుగా దూరమవడంతో ఆయన కుటుంబం తీవ్ర శోకసంద్రంలో మునిగిపోయింది. ఈ కష్టకాలంలో వారి భవిష్యత్తుకు పూర్తి ఆర్థిక భద్రత కల్పించేందుకు BRS అధిష్టానం ప్రాధాన్యతనిచ్చింది.

ఇద్దరు పిల్లలకు చెరో రూ.1 కోటి పెద్ది సుదర్శన్ రెడ్డి ఇద్దరు పిల్లల పేరు మీద చెరో ఒక కోటి రూపాయల చొప్పున మొత్తం రూ. 2 కోట్లు డిపాజిట్ చేయాలని అధినేత కేసీఆర్ నిర్ణయించారు.
వృద్ధురాలైన తల్లికి రూ. 25 లక్షలు: పెద్ది వృద్ధాప్యంలో ఉన్న తన తల్లి అమృతమ్మ బాగోగులు, వైద్య అవసరాల నిమిత్తం మరో రూ. 25 లక్షలు అందించనున్నారు.

* పిల్లల చదువు, భవిష్యత్తు బాధ్యత పార్టీదే..

కేవలం ఆర్థిక సాయంతోనే సరిపెట్టకుండా, దివంగత నేత పిల్లల భవిష్యత్తు, వారి ఉన్నత చదువులు, ఇతర కుటుంబ సంక్షేమానికి సంబంధించిన ప్రతి అంశాన్ని పార్టీ నిరంతరం పర్యవేక్షిస్తుందని కేసీఆర్ భరోసా ఇచ్చారు. పెద్ది సుదర్శన్ రెడ్డి తెలంగాణ ఉద్యమ కాలం నుంచి పార్టీకి, ప్రజలకు అందించిన సేవలను ఈ సందర్భంగా కేసీఆర్ గుర్తు చేసుకున్నారు.

* ముఖ్య నేతలతో చర్చించి నిర్ణయం..

పార్టీ సీనియర్ నాయకులు, ఉమ్మడి వరంగల్ జిల్లా ముఖ్య నేతలతో సుదీర్ఘంగా చర్చించిన అనంతరమే కేసీఆర్ ఈ కీలక నిర్ణయాన్ని తీసుకున్నారు. పెద్ది సుదర్శన్ రెడ్డి దశదినకర్మల కార్యక్రమాలు పూర్తయిన తర్వాత ఉమ్మడి వరంగల్ జిల్లా పార్టీ ముఖ్య నాయకులు సమావేశమై, వారి కుటుంబ సంక్షేమానికి సంబంధించిన మరిన్ని నిర్ణయాలను అమలు చేయనున్నారు.

“పెద్ది సుదర్శన్ రెడ్డి కేవలం ఒక నాయకుడు మాత్రమే కాదు, BRS కుటుంబంలో ఒక ముఖ్యమైన సభ్యుడు. ఆయన లేని లోటు తీర్చలేనిది అయినప్పటికీ, వారి కుటుంబానికి ఎల్లవేళలా, ఎల్లకాలం BRS పార్టీ అండగా ఉంటుంది” అని కేసీఆర్ స్పష్టం చేశారు.