Khet Bachao Abhiyan Telangana
* భూగర్భ జలాల పరిరక్షణే లక్ష్యం..
* మైలారం గ్రామంలో ‘ఖేత్ బచావో అభియాన్’ అవగాహన సదస్సు
ఆకేరు న్యూస్, రాయపర్తి: భూగర్భ జలాలను పరిరక్షించుకోవడానికి, కరువు ముప్పు నుంచి రైతులను రక్షించడానికి యాసంగిలో వరి సాగును పూర్తిగా నివారించాలని వ్యవసాయ శాఖ అధికారులు హెచ్చరించారు. రాయపర్తి మండలం మైలారం గ్రామంలో కేంద్ర ప్రభుత్వం చేపట్టిన ‘ఖేత్ బచావో అభియాన్’లో భాగంగా నిర్వహించిన రైతుల అవగాహన సదస్సులో ఈ మేరకు స్పష్టమైన పిలుపునిచ్చారు. గ్రామ సర్పంచ్ చిర్ర వేణు అధ్యక్షతన, మండల వ్యవసాయ అధికారి వీరభద్రం ఆదేశాల మేరకు ఈ సదస్సు అత్యంత ప్రాధాన్యత సంతరించుకుంది.
* నీటి చుక్కకూ లెక్క ఉంది.. వరి వద్దు!
సదస్సులో వ్యవసాయ విస్తరణ అధికారి (AEO) క్రాంతి కుమార్ మాట్లాడుతూ.. ప్రస్తుతం ఏర్పడుతున్న ఎల్ నినో ప్రభావం, వర్షాభావ పరిస్థితుల కారణంగా భూగర్భ జలాలు అడుగంటుతున్నాయని ఆందోళన వ్యక్తం చేశారు. కేవలం ఒక్క కిలో వరి ధాన్యం పండించడం కోసమే సుమారు 2,500 లీటర్ల నీరు అవసరమవుతుందని గుర్తుచేశారు. ఈ నేపథ్యంలో రైతులు భారీగా నీటిని కోల్పోయే వరి సాగు వైపు వెళ్లకుండా, తక్కువ నీటి వినియోగంతో అధిక దిగుబడినిచ్చే పప్పుధాన్యాలు, నూనెగింజలు, చిరుధాన్యాలు మరియు కూరగాయల సాగును చేపట్టాలని సూచించారు. రైతులు నష్టాల బారిన పడకుండా ప్రభుత్వం ఇస్తున్న సూచనలను తూచా తప్పకుండా పాటించాలని విజ్ఞప్తి చేశారు.
* పశుగ్రాసంపై ప్రత్యేక శ్రద్ధ.. విద్యుత్ పొదుపు అవసరం
వెటర్నరీ డాక్టర్ సౌమ్య మాట్లాడుతూ.. పశువులకు అవసరమైన మేత కొరత రాకుండా ప్రత్యామ్నాయ పశుగ్రాసాలను వేసుకోవాలని కోరారు. ఇందుకు సంబంధించి ప్రభుత్వపరంగా వివిధ పథకాలు అందుబాటులో ఉన్నాయని, రైతులు తక్షణమే పశుసంవర్ధక శాఖను సంప్రదించాలని సూచించారు.
గ్రామ సర్పంచ్ చిర్ర వేణు మాట్లాడుతూ.. పెరుగుతున్న కరువు పరిస్థితులరీత్యా ప్రతి ఒక్కరూ బాధ్యతగా వ్యవహరించాలని కోరారు. కేవలం వ్యవసాయంలోనే కాకుండా, గృహ అవసరాలకు వాడే విద్యుత్‌ను కూడా అత్యంత పొదుపుగా వినియోగించుకోవాలని పిలుపునిచ్చారు.
ఈ కార్యక్రమంలో ఉపసర్పంచ్ రత్నాకర్ రెడ్డి, వార్డు సభ్యులు, గ్రామ పంచాయతీ కార్యదర్శి విజేందర్, మహిళా సంఘాల ప్రతినిధులు మరియు భారీ సంఖ్యలో స్థానిక రైతులు పాల్గొన్నారు
About the Author
Please tell us what is wrong. Your report will be sent to the website team.
