Maharashtra Tribal School
* అల్లరి చేశారని దారుణ శిక్ష
ఆకేరు న్యూస్, డెస్క్: పాఠశాలలు విద్యార్థులను తీర్చిదిద్దే దేవాలయాలు అంటారు. కానీ, కొన్ని విద్యాసంస్థల్లో సిబ్బంది వ్యవహరిస్తున్న తీరు సమాజం తలదించుకునేలా చేస్తోంది. క్రమశిక్షణ పేరుతో విద్యార్థుల పట్ల అమానుషంగా ప్రవర్తిస్తున్న ఘటనలు తీవ్ర కలకలం రేపుతున్నాయి.
తాజాగా మహారాష్ట్రలోని ఓ ప్రభుత్వ గిరిజన ఆశ్రమ పాఠశాలలో 82 మంది విద్యార్థులకు సిబ్బంది బలవంతంగా సగం గుండు (అరగుండు) చేయించిన ఉదంతం తీవ్ర ఆగ్రహజ్వాలలకు దారితీసింది.
* సగం గుండుతో రాక్షసత్వ ప్రదర్శన
పాఠశాలలో విద్యార్థులకు సాధారణ క్రాపింగ్ చేయించే క్రమంలో విద్యార్థులు అల్లరి చేశారని, క్రమశిక్షణ తప్పారని వార్డెన్/హాస్టల్ సూపరింటెండెంట్ తీవ్ర ఆగ్రహానికి లోనయ్యారు.
విద్యార్థులకు బుద్ధి చెప్పాలనే నెపంతో పాఠశాల సిబ్బందితో కలిసి ట్రిమ్మర్ సాయంతో విద్యార్థుల జుట్టును సగానికి మాత్రమే కట్ చేయించి, సగం గుండుతో వదిలేశారు. ఈ క్రూరమైన ఆకృత్యానికి దాదాపు 82 మంది అమాయక విద్యార్థులు బాధితులయ్యారు.
* ఆగ్రహంలో తల్లిదండ్రులు
ఈ ఘటనతో తీవ్ర భయాందోళనకు గురైన విద్యార్థులు పాఠశాల నుంచి ఇళ్లకు వెళ్లి తమ తల్లిదండ్రులకు విషయాన్ని వివరించారు. సగం గుండుతో ఉన్న విద్యార్థుల ఫొటోలు సోషల్ మీడియాలో వైరల్ అవ్వడంతో స్థానికంగా మరియు నెటిజన్లలో తీవ్ర నిరసన వ్యక్తమైంది.
పిల్లల మానసిక స్థైర్యాన్ని దెబ్బతీసేలా ప్రవర్తించిన పాఠశాల సిబ్బందిపై కఠిన చర్యలు తీసుకోవాలని తల్లిదండ్రులు, స్థానిక గిరిజన సంఘాల నాయకులు డిమాండ్ చేస్తున్నారు.
* అర్ధరాత్రి మరోసారి క్రాపింగ్ సరిచేసే ప్రయత్నం
ఫొటోలు సోషల్ మీడియాలో వైరల్ అవ్వడం, ఉన్నతాధికారుల దృష్టికి వెళ్లడంతో ఉలిక్కిపడిన పాఠశాల యాజమాన్యం తప్పును కప్పిపుచ్చుకునేందుకు యత్నించింది. శనివారం అర్ధరాత్రి 11 గంటల నుంచి తెల్లవారుజామున 4 గంటల వరకు నిద్రపోతున్న పిల్లలను లేపి జుట్టును సరిసమానంగా కట్ చేయించినట్లు సమాచారం.
* అధికారుల స్పందన
ఈ ఘోర ఉదంతంపై పాఠశాల ప్రిన్సిపల్ తీవ్రంగా స్పందిస్తూ బాధ్యులైన వార్డెన్/సూపరింటెండెంట్‌కు ‘షోకాజ్ నోటీసు’ జారీ చేశారు. ఈ సంఘటనపై ఉన్నతాధికారులు లోతైన విచారణకు ఆదేశించారు. బాధ్యులు ఎంతటివారైనా సస్పెండ్ చేసి క్రిమినల్ కేసులు నమోదు చేయాలని బాధితుల కుటుంబీకులు డిమాండ్ చేస్తున్నారు.
About the Author
Please tell us what is wrong. Your report will be sent to the website team.
