చిన్న శ్రీశైలం యాదవ్‌
* ‘మయూఖ’ సక్సెస్‌ మీట్‌లో చిన్న శ్రీశైలం యాదవ్‌
Chinna Srisailam Yadav| ఆకేరు న్యూస్, సినిమా: కంటెంట్‌ బాగున్న చిన్న సినిమాలను ప్రేక్షకులు ఎప్పుడూ ఆదరిస్తారని, అలాంటి చిత్రాలకు తమ వంతు సహకారం అందిస్తామని కాంగ్రెస్‌ నాయకుడు చిన్న శ్రీశైలం యాదవ్‌ అన్నారు. పాయల్‌ చెంగప్ప ప్రధాన పాత్రలో నటించిన ‘మయూఖ’ సినిమా 25 రోజుల విజయోత్సవ కార్యక్రమంలో ఆయన ముఖ్య అతిథిగా పాల్గొన్నారు. హైదరాబాద్‌లో నిర్వహించిన ఈ వేడుకలో చిత్ర బృందాన్ని అభినందించారు.
ప్రశ్విత ఎంటర్‌టైన్‌మెంట్‌ బ్యానర్‌పై శశిధర్‌ నల్ల నిర్మించిన ఈ చిత్రానికి శ్రీ తేజ్‌ ఎస్‌.కె. దర్శకత్వం వహించారు. ఇటీవల ప్రేక్షకుల ముందుకు వచ్చిన ఈ సినిమా 25 రోజులు పూర్తి చేసుకున్న సందర్భంగా చిత్ర బృందం విజయోత్సవాన్ని నిర్వహించింది.
చిన్న సినిమాలకు మా మద్దతు ఉంటుంది
ఈ సందర్భంగా చిన్న శ్రీశైలం యాదవ్‌ మాట్లాడుతూ.. చిన్న సినిమాలకు తాము ఎన్నో ఏళ్లుగా మద్దతుగా నిలుస్తున్నామని చెప్పారు. ‘మయూఖ’ సినిమా 25 రోజుల వేడుక జరుపుకోవడం సంతోషంగా ఉందన్నారు. దర్శకుడు శ్రీతేజ్‌, నిర్మాత శశిధర్‌ తనకు చాలాకాలంగా పరిచయమని తెలిపారు.
చిత్ర బృందానికి భవిష్యత్తులో మరిన్ని విజయాలు దక్కాలని ఆకాంక్షించారు. టీమ్‌కు ఏ సహాయం కావాలన్నా తనను సంప్రదించవచ్చని చెప్పారు. చిన్న చిత్రాలకు ప్రభుత్వం తరఫున కూడా సహకారం అందేలా కృషి చేస్తామని హామీ ఇచ్చారు.
న్యూయార్క్‌ ఫిలిం ఫెస్టివల్‌లో అవార్డు
హీరోయిన్‌ పాయల్‌ చెంగప్ప మాట్లాడుతూ.. తమ సినిమా 25 రోజుల విజయోత్సవం జరుపుకోవడం ఆనందంగా ఉందన్నారు. సినిమా విడుదలకు ముందే న్యూయార్క్‌ ఫిలిం ఫెస్టివల్‌లో బెస్ట్‌ మిస్టరీ మూవీ అవార్డును అందుకుందని తెలిపారు. దర్శకుడికి కూడా అవార్డులు వచ్చాయని పేర్కొన్నారు.
ప్రేక్షకులు, శ్రేయోభిలాషులు అందించిన మద్దతుతోనే ఈ విజయాన్ని సాధించామని ఆమె చెప్పారు. అనంతరం చిన్న శ్రీశైలం యాదవ్‌ చిత్రంలో పనిచేసిన నటీనటులు, సాంకేతిక నిపుణులకు షీల్డులను అందజేశారు.
వేడుకలో పాల్గొన్న ప్రముఖులు
ఈ కార్యక్రమంలో ఎగ్జిక్యూటివ్‌ ప్రొడ్యూసర్‌ డి. గిరీష్‌ రెడ్డి, నటులు రఘు వాసిరెడ్డి, అభిలాష్‌ అడ్డ, దేవ్‌ డి., నిర్మాత మహేంద్రనాథ్‌ కూండ్ల, వీ5 ఎండీ వెంకటేష్‌, నిర్మాత శశిధర్‌ నల్ల, దర్శకుడు శ్రీతేజ్‌ ఎస్‌.కె. తదితరులు పాల్గొన్నారు.
About the Author
Please tell us what is wrong. Your report will be sent to the website team.
