22-A Land Rules Telangana | సామాన్యులను ఇబ్బంది పెట్టొద్దు

Published: 17 Aug 2026 • 08:27 PM

* మంత్రి పొంగులేటి శ్రీనివాస రెడ్డి హెచ్చరిక

అకేరు న్యూస్, హన్మకొండ :తెలంగాణలో భూముల రిజిస్ట్రేషన్లు మరియు నిషేధిత జాబితా (22-A) అంశంపై రాష్ట్ర రెవెన్యూ, గృహనిర్మాణ, సమాచార పౌరసంబంధాల శాఖా మంత్రి పొంగులేటి శ్రీనివాస రెడ్డి తీవ్రమైన ఆదేశాలు జారీ చేశారు. సామాన్యులకు ఎలాంటి ఇబ్బందులు తలెత్తకుండా చూడాలని అధికారులను హెచ్చరించారు.

* ప్రత్యేక టోల్‌ఫ్రీ నంబర్ ఏర్పాటు

భూములకు సంబంధించి ప్రజల నుండి వచ్చే ఫిర్యాదులను స్వీకరించేందుకు త్వరలోనే ఒక ప్రత్యేక టోల్‌ఫ్రీ నంబర్‌ను అందుబాటులోకి తీసుకురానున్నట్లు మంత్రి ప్రకటించారు. సబ్‌రిజిస్ట్రార్ కార్యాలయాల వారీగా పెండింగ్‌లో ఉన్న దరఖాస్తులపై అధికారులతో సమీక్ష నిర్వహించి, వాటి పరిష్కారానికి స్పష్టమైన గడువు ఇవ్వాలని ఆదేశించారు.

* 22-A సాకుతో దరఖాస్తుల తిరస్కరణ వద్దు

కేవలం భూమి 22-A నిషేధిత జాబితాలో ఉందనే ఏకైక కారణంతో ఏ ఒక్క దరఖాస్తును కూడా అధికారుల స్థాయిలో తిరస్కరించకూడదని మంత్రి స్పష్టం చేశారు. ఆ భూమి ఆ జాబితాలోకి ఎందుకు చేరిందనే దానిపై సమగ్రమైన రికార్డులు మరియు వాస్తవ పరిస్థితులను క్షుణ్ణంగా పరిశీలించాలని దిశానిర్దేశం చేశారు.

* ప్రభుత్వ భూముల రక్షణ – నిజమైన హక్కుదారులకు న్యాయం

ప్రభుత్వ భూములు మరియు ఆస్తులను సంరక్షించడంతో పాటు, నిజమైన భూ హక్కుదారులకు ఎలాంటి అన్యాయం జరగకుండా చూసే బాధ్యత అధికారులపై ఉందని మంత్రి గుర్తుచేశారు. ఈ విషయంలో ఎలాంటి నిర్లక్ష్యం ప్రదర్శించినా ప్రభుత్వం తరఫు నుంచి తీవ్రమైన చర్యలు ఉంటాయని హెచ్చరించారు.