MLA Yashaswini | రైతు బతకాలంటే సాగులో మార్పులు రావాలి

Published: 10 Sep 2026 • 03:38 PM

* పాడి రైతులు, కూరగాయల సాగుకు సబ్సిడీలు ఇవ్వాలి

* పెస్టిసైడ్స్ విషంతో క్యాన్సర్ ముప్పు

* మండలిలో ఎమ్మెల్యే యశస్విని రెడ్డి కీలక వ్యాఖ్యలు

ఆకేరు న్యూస్, హైదరాబాద్ : రాష్ట్రంలో కూరగాయలు, పప్పుధాన్యాల సాగు గణనీయంగా తగ్గిపోవడం మరియు విచక్షణారహితంగా పురుగుమందుల (పెస్టిసైడ్స్) వాడకం పెరిగిపోవడంపై పాలకుర్తి శాసనసభ్యురాలు (ఎమ్మెల్యే) మామిడాల యశస్విని రెడ్డి తీవ్ర ఆందోళన వ్యక్తం చేశారు. శాసనమండలి సభ ప్రాంగణంలో మీడియా ప్రతినిధులు మరియు ప్రతినిధులతో మాట్లాడిన ఆమె, వ్యవసాయ రంగంలో ఎదురవుతున్న ప్రస్తుత సవాళ్లు, ప్రజారోగ్యంపై దాని ప్రభావం మరియు పాడి రైతుల సమస్యలపై వివరంగా మాట్లాడారు.

* పప్పుధాన్యాల సాగు తగ్గడంపై ఆందోళన..

ఒకప్పుడు పల్లెల్లో ఎటు చూసినా రకరకాల కూరగాయల తోటలు, పొద్దుతిరుగుడు (సన్‌ఫ్లవర్), కందులు, పెసర్లు వంటి పప్పుధాన్యాల పంటలు కలకలలాడేవని, కానీ ఇప్పుడు పరిస్థితి పూర్తిగా మారిపోయిందని యశస్విని రెడ్డి అన్నారు. ఎక్కడ చూసినా కేవలం వరి పంట మాత్రమే కనిపిస్తోందని తెలిపారు. రాబోయే రోజుల్లో ఇదే పరిస్థితి కొనసాగితే కూరగాయలు సాగు చేసే రైతులే లేకుండా పోతారని హెచ్చరించారు. రైతులు కూరగాయల వైపు మొగ్గు చూపేలా ప్రభుత్వం ప్రత్యేకంగా ప్రోత్సాహక సబ్సిడీలను అందించాలని ఆమె విజ్ఞప్తి చేశారు.

*పెరుగుతున్న క్యాన్సర్ కేసులు..

వ్యవసాయం మరియు కూరగాయల సాగులో పురుగుమందులు, రసాయనాల వాడకం మితిమీరిపోతోందని ఎమ్మెల్యే తెలిపారు. దీని కారణంగా చిన్న వయస్సులోనే అనేక మంది క్యాన్సర్ బారిన పడుతున్నారని, ఇతర తీవ్రమైన ఆరోగ్య సమస్యలు తలెత్తుతున్నాయని అన్నారు. “నేటి కాలంలో ఎంత ఆస్తిపాస్తులు ఉన్నాయన్న దానికంటే ఎంత ఆరోగ్యంగా ఉన్నామన్నదే అత్యంత ముఖ్యం. మనం ఇంట్లోనే శుభ్రంగా వండుకుని తింటున్నామని అనుకుంటున్నాం కానీ, మనకు లభిస్తున్న ఏ ఒక్క ఆహార పదార్థం కూడా 100% ఆర్గానిక్ కాదు. అన్నింటిలోనూ పరిమితికి మించి పెస్టిసైడ్స్ ఉంటున్నాయి. దీనిపై ప్రభుత్వం ప్రత్యేక దృష్టి పెట్టి, నిబంధనలు ఉల్లంఘించే వారిపై కఠిన చట్టాలు తేవాలి” అని ఆమె కోరారు.

*ఫుడ్ ఇన్సెక్టోరేట్ చర్యలకు మద్దతు..

రాష్ట్రంలో ఆహార కల్తీని అరికట్టేందుకు ఫుడ్ ఇన్సెక్టోరేట్ అధికారులు చేపడుతున్న తనిఖీలను మరియు కఠిన చర్యలను ఆమె స్వాగతించారు. ముఖ్యంగా మార్కెట్‌లో విక్రయిస్తున్న పన్నీర్ వంటి పదార్థాలు కృత్రిమంగా (సింథటిక్), తీవ్రమైన కల్తీతో తయారుచేస్తున్నారని, బయట తినాలంటేనే ప్రజలు భయపడే పరిస్థితులు ఉన్నాయని పేర్కొన్నారు. ఎలాంటి ఒత్తిళ్లకు తలొగ్గకుండా ఫుడ్ సేఫ్టీ తనిఖీలు నిరంతరం కొనసాగాలని డిమాండ్ చేశారు

* పాడి రైతుల ప్రోత్సాహం ఇవ్వాలి..

పాడి రంగంలో విజయ డైరీని బలోపేతం చేసేందుకు ప్రభుత్వం చర్యలు తీసుకోవాలని సూచించారు. ప్రైవేట్ డైరీలకు ఏమాత్రం తీసిపోకుండా, ఆధునిక సాంకేతికత మరియు మెషినరీతో విజయ డైరీని అభివృద్ధి చేయడానికి ప్రణాళికలు రూపొందిస్తున్నట్లు చైర్మన్ అదిత్య రెడ్డి తెలిపారని, ఇది అభినందనీయమని అన్నారు. పాడి రైతులకు వేళకు చెల్లింపులు చేస్తూ, వారిని ప్రోత్సహిస్తేనే ప్రజలకు కల్తీ లేని స్వచ్ఛమైన పాలు అందుతాయని అభిప్రాయపడ్డారు.

* పల్లెల్లో తీవ్రమైన కోతుల బెడద..

రైతులు లేదా సామాన్య ప్రజలు కనీసం తమ ఇంటి పెరటిలో సొంత అవసరాల కోసం కూరగాయలు వేసుకుందామన్నా వేసుకోలేకపోతున్నారని అన్నారు. గ్రామాల్లో కోతుల బెడద విపరీతంగా పెరిగిపోయిందని ఎమ్మెల్యే ఆవేదన వ్యక్తం చేశారు. కోతులు గుంపులుగా వచ్చి దాడులు చేస్తున్నాయని, ఇది ఒక్క నియోజకవర్గానికే కాకుండా రాష్ట్రమంతటికీ పెద్ద సమస్యగా మారిందన్నారు. ప్రభుత్వం తక్షణమే కోతుల నివారణకు చర్యలు చేపట్టాలని కోరారు.