Telangana Assembly | తెలంగాణ అసెంబ్లీలో నేడు కీలక ఘట్టం..

Published: 11 Sep 2026 • 10:28 AM

* ఐదోరోజు బిల్లులపై ఉత్కంఠ

ఆకేరు న్యూస్, హైదరాబాద్‌ : తెలంగాణ అసెంబ్లీ సమావేశాలు నేడు ఐదో రోజు కొనసాగనున్నాయి. ఉదయం 10 గంటలకు శాసనసభ సమావేశాలు ప్రారంభం కానున్నాయి. ఐదో రోజు సమావేశాల్లో ప్రభుత్వం పలు కీలక బిల్లులను సభ ముందుకు తీసుకురానుంది. దీంతో నేటి అసెంబ్లీ సమావేశాలు ప్రాధాన్యత సంతరించుకున్నాయి.

* సభ ముందుకు కీలక బిల్లులు

తెలంగాణ ముఖ్యమంత్రి కోర్ అర్బన్ రీజియన్ బిల్లును అసెంబ్లీలో ప్రవేశపెట్టనున్నారు. అలాగే మున్సిపాలిటీల నాలుగో సవరణ బిల్లును కూడా సీఎం సభ ముందుకు తీసుకురానున్నారు. పట్టణ ప్రాంతాల అభివృద్ధి, మున్సిపాలిటీల పరిపాలనకు సంబంధించిన అంశాల నేపథ్యంలో ఈ బిల్లులపై చర్చ జరిగే అవకాశం ఉంది.
మరోవైపు ప్రజా విశ్వాసం నిబంధనల సవరణ బిల్లును మంత్రి శ్రీధర్‌బాబు అసెంబ్లీలో ప్రవేశపెట్టనున్నారు.

* బీసీ, ఓబీసీ అంశంపై స్వల్పకాలిక చర్చ

ఇక నేటి సమావేశాల్లో జనగణనలో బీసీ, ఓబీసీల అంశంపై స్వల్పకాలిక చర్చ జరగనుంది. జనగణనలో బీసీ, ఓబీసీల అంశానికి సంబంధించిన డిమాండ్లు, ప్రాధాన్యత తదితర విషయాలపై సభ్యులు తమ అభిప్రాయాలను వెల్లడించనున్నారు.

* విద్యారంగంపై మరో చర్చ..

విద్యారంగ కార్యక్రమాలపై కూడా స్వల్పకాలిక చర్చ జరగనుంది. రాష్ట్రంలో విద్యారంగ అభివృద్ధి, ప్రభుత్వం చేపడుతున్న కార్యక్రమాలు, విద్యార్థులు ఎదుర్కొంటున్న సమస్యలు తదితర అంశాలు చర్చకు వచ్చే అవకాశం ఉంది. మొత్తంగా చూస్తే.. కీలక బిల్లులతో పాటు బీసీ, ఓబీసీ జనగణన, విద్యారంగంపై చర్చలు ఉండటంతో నేటి తెలంగాణ అసెంబ్లీ సమావేశాలు ఆసక్తికరంగా మారనున్నాయి.