Bank Holidays | బ్యాంకు ఖాతాదారులకు బిగ్ అలర్ట్‌..

Published: 11 Sep 2026 • 10:55 AM

* వరుసగా నాలుగు రోజులు సెలవులు

* నేడు దేశవ్యాప్తంగా బంద్

అకేరు న్యూస్, హైదరాబాద్ : దేశవ్యాప్తంగా బ్యాంకింగ్ సేవలకు అంతరాయం ఏర్పడనుంది. బ్యాంకు ఉద్యోగులు తమ డిమాండ్ల సాధన కోసం నేడు బంద్‌కు పిలుపునిచ్చారు. దీంతో పలు ప్రాంతాల్లో బ్యాంకు శాఖలు మూతపడనున్నాయి. బ్యాంకింగ్ రంగంలో వారానికి ఐదు రోజుల పనిదినాలు అమలు చేయాలని, ఉద్యోగులు, పెన్షనర్లకు సంబంధించిన సమస్యలను పరిష్కరించాలని యునైటెడ్ ఫోరం ఆఫ్ బ్యాంక్ యూనియన్స్ (UFBU) డిమాండ్ చేస్తోంది. ఈ డిమాండ్ల సాధనలో భాగంగా ఉద్యోగులు బంద్ చేపడుతున్నారు.

* బ్యాంకులకు వరుస సెలవులు..

ఇదిలా ఉండగా.. నేటి బంద్‌కు తోడు వరుసగా సెలవులు రావడంతో బ్యాంకు ఖాతాదారులకు ఇబ్బందులు ఎదురయ్యే అవకాశం ఉంది. శనివారం, ఆదివారం వారాంతపు సెలవులు కాగా, అనంతరం సోమవారం వినాయక చవితి సందర్భంగా సెలవు ఉండనుంది. దీంతో వరుసగా నాలుగు రోజుల పాటు బ్యాంకు శాఖలు మూసి ఉండే పరిస్థితి ఏర్పడుతోంది. ఈ నేపథ్యంలో నగదు లావాదేవీలు, చెక్ క్లియరెన్స్, బ్యాంకు శాఖల్లో నిర్వహించే ఇతర ప్రత్యక్ష సేవలపై ప్రభావం పడే అవకాశం ఉంది.

అయితే ఏటీఎంలు, యూపీఐ, మొబైల్ బ్యాంకింగ్, ఇంటర్నెట్ బ్యాంకింగ్ వంటి డిజిటల్ సేవలు సాధారణంగా అందుబాటులో ఉండే అవకాశం ఉంది. బ్యాంకులకు వెళ్లి చేయాల్సిన అత్యవసర పనులు ఉన్న ఖాతాదారులు ముందుగానే పూర్తి చేసుకోవాలని అధికారులు సూచిస్తున్నారు. వరుస సెలవుల కారణంగా సోమవారం తర్వాత బ్యాంకుల్లో రద్దీ పెరిగే అవకాశం ఉంది.