* తెలంగాణలో ట్రాఫిక్ రూల్స్ కఠినం…
* 5 పెండింగ్ చలాన్లు ఉంటే DL, RC కట్!
ఆకేరు న్యూస్, హైదరాబాద్: వాహనదారులారా జాగ్రత్త! ఇకపై ట్రాఫిక్ నిబంధనలు ఉల్లంఘిస్తే జరిమానాలు కట్టకుండా తప్పించుకోవడం సాధ్యం కాదు. పెండింగ్ చలాన్ల వసూళ్ల కోసం తెలంగాణ రవాణా మరియు పోలీస్ శాఖలు సరికొత్త నిబంధనలను అమల్లోకి తీసుకువచ్చేందుకు సిద్ధమయ్యాయి.
కొత్త నిబంధనల ముఖ్యాంశాలు:
ఒక వాహనంపై ఏడాదికి 5 కంటే ఎక్కువ పెండింగ్ చలాన్లు ఉంటే, సదరు వాహనదారుడి డ్రైవింగ్ లైసెన్స్ (DL) లేదా వాహన రిజిస్ట్రేషన్ కార్డ్ (RC) ను అధికారులు ఫ్రీజ్ (బ్లాక్) చేసే అవకాశం ఉంది. ఒకసారి DL లేదా RC బ్లాక్ అయితే, పెండింగ్ ఉన్న అన్ని చలాన్లను క్లియర్ చేసే వరకు రవాణా శాఖకు సంబంధించిన ఎలాంటి సేవలు (RTA Services) పొందే వీలుండదు. కెమెరా ఆధారిత చలాన్లను 3 రోజుల్లో, మాన్యువల్ చలాన్లను 15 రోజుల్లోపు వాహనదారులకు పంపాలని అధికారులు నిర్ణయించారు. నోటీసు అందిన 45 రోజుల్లోపు జరిమానా చెల్లించాలి లేదా చలాన్పై ఉన్న అభ్యంతరాలను అధికారుల దృష్టికి తీసుకెళ్లాలి.
అభ్యంతరాల కోసం ‘గ్రీవెన్స్ రిడ్రెస్సల్ అథారిటీ’
సాంకేతిక లోపాల వల్ల లేదా వాహనం అమ్మిన తర్వాత కూడా పాత యజమాని పేరిట చలాన్లు రావడం వంటి సమస్యల పరిష్కారానికి ప్రభుత్వం ఒక ప్రత్యేక గ్రీవెన్స్ రిడ్రెస్సల్ అథారిటీని ఏర్పాటు చేయనుంది.
వాహనదారులు తమ ఫిర్యాదులను ఆన్లైన్ పోర్టల్ ద్వారా నమోదు చేయవచ్చు.
అధికారులు 30 రోజుల్లోపు దీనిపై నిర్ణయం తీసుకుంటారు.
ఒకవేళ అధికారుల నిర్ణయంపై సంతృప్తి చెందకపోతే, జరిమానా మొత్తంలో 50 శాతం చెల్లించి కోర్టును ఆశ్రయించే వెసులుబాటు కూడా ఉంటుంది.
ఎందుకు ఈ నిర్ణయం?
రోడ్డు భద్రతను మెరుగుపరచడం మరియు వాహనదారుల్లో బాధ్యతను పెంచడం ఈ కొత్త స్టాండర్డ్ ఆపరేటింగ్ ప్రొసీజర్ (SOP) ముఖ్య ఉద్దేశం. త్వరలోనే దీనికి సంబంధించిన అధికారిక నోటిఫికేషన్ విడుదలయ్యే అవకాశం ఉంది.
About the Author
Please tell us what is wrong. Your report will be sent to the website team.
