Mahesh Kumar Goud | క్యాబినెట్ విస్తరణ లేనట్లే

Published: 05 Sep 2026 • 05:16 PM

* సురేఖ విషయంలో ఏఐసీసీ నో..

* మహేష్ గౌడ్ క్లారిటీ

ఆకేరు న్యూస్, హైదరాబాద్: తెలంగాణ కాంగ్రెస్ వర్గాల్లో తీవ్ర ఉత్కంఠ రేపుతున్న తెలంగాణ మంత్రివర్గ విస్తరణపై తెలంగాణ ప్రదేశ్ కాంగ్రెస్ కమిటీ (టీపీసీసీ) అధ్యక్షుడు బి. మహేష్ కుమార్ గౌడ్ సంచలన వ్యాఖ్యలు చేశారు. రాష్ట్రంలో క్యాబినెట్ విస్తరణ ఇప్పట్లో లేనట్లేనని ఆయన స్పష్టం చేశారు. ఢిల్లీ పర్యటనలో భాగంగా మీడియాతో మాట్లాడిన ఆయన, అధిష్టానంతో క్యాబినెట్ విస్తరణపై ఎలాంటి చర్చ జరగలేదని తేల్చిచెప్పారు.

*సురేఖ, చిన్నారెడ్డి అంశంపైనే చర్చ..

హైకమాండ్ భేటీలో కేవలం మాజీ మంత్రి కొండా సురేఖ, ప్రణాళికా సంఘం మాజీ ఉపాధ్యక్షుడు జి. చిన్నారెడ్డికి సంబంధించిన క్రమశిక్షణా అంశాలపై మాత్రమే ప్రధానంగా చర్చ జరిగిందని పీసీసీ చీఫ్ వెల్లడించారు. కొండా సురేఖను కాపాడేందుకు తాము తీవ్రంగా ప్రయత్నించినప్పటికీ, పార్టీ క్రమశిక్షణ ఉల్లంఘన విషయంలో ఏఐసీసీ (AICC) ఎంతమాత్రం ఒప్పుకోలేదని ఆయన తెలిపారు. అధిష్టానం నిర్ణయం మేరకే కఠిన చర్యలు తీసుకోవాల్సి వచ్చిందని పేర్కొన్నారు.

* సీఎం చేతిలోనే తుది నిర్ణయం..

మంత్రివర్గ విస్తరణకు సంబంధించి హైకమాండ్ నుంచి ఇప్పటివరకు తమకు ఎలాంటి సమాచారం లేదా సంకేతాలు లేవని మహేష్ కుమార్ గౌడ్ స్పష్టం చేశారు. క్యాబినెట్‌ను ఎప్పుడు విస్తరించాలి, ఎవరిని తీసుకోవాలనేది పూర్తిగా ముఖ్యమంత్రి రేవంత్ రెడ్డి విచక్షణ మరియు ఇష్టానికే ఆధారపడి ఉంటుందని వ్యాఖ్యానించారు.
ఇదే సమయంలో తనకూ మంత్రి పదవి దక్కనుందంటూ జరుగుతున్న ప్రచారంపై స్పందిస్తూ, ఆ ప్రచారంలో ఎలాంటి వాస్తవం లేదని, దానికి సంబంధించి తన వద్ద ఎలాంటి సమాచారం లేదని తేల్చిచెప్పారు. పార్టీ బలోపేతానికి, క్రమశిక్షణకు కట్టుబడి పనిచేయడమే తమ ప్రథమ ప్రాధాన్యమని ఈ సందర్భంగా టీపీసీసీ అధినేత పునరుద్ఘాటించారు.
——–