VENEZUELA EARTHQUAKE | ముగ్గురు పిల్లలు క్షేమం

Published: 27 Jun 2026 • 07:45 AM

* 920కి చేరిన మృతుల సంఖ్య!

ఆకేరు న్యూస్, డెస్క్: దక్షిణ అమెరికా దేశమైన వెనెజ్వెలాలో సంభవించిన ఘోర భూకంపం తీవ్ర విషాదాన్ని నింపింది. అయితే, ఈ చీకటి రోజుల్లోనూ ఒక అద్భుతం జరిగి అక్కడి ప్రజల్లో ఆశలు రేకెత్తించింది. ఒక కుప్పకూలిన భవన శిథిలాల కింద గంటల తరబడి చిక్కుకుపోయిన ముగ్గురు చిన్నారులను సహాయక సిబ్బంది క్షేమంగా బయటకు తీశారు. ప్రాణాలతో బయటపడిన ఆ చిన్నారులను చూసి స్థానికులు, వారి కుటుంబ సభ్యులు ఆనందబాష్పాలు రాల్చారు.

* బిడ్డను రక్షించి.. కన్నుమూసిన తల్లి..

ఈ రెస్క్యూ ఆపరేషన్‌లో ఒక హృదయ విదారకరమైన ఘటన వెలుగుచూసింది. భూకంపం సంభవించిన సమయంలో ఒక తల్లి తన ప్రాణాలను పణంగా పెట్టి తన బిడ్డను రక్షించింది. శిథిలాలు పడుతున్న వేళ బిడ్డకు అడ్డుగా నిలిచి కాపాడింది, కానీ దురదృష్టవశాత్తూ భారీ కాంక్రీట్ దిమ్మెలు పడటంతో ఆమె అక్కడికక్కడే ప్రాణాలు కోల్పోయింది. తల్లి మరణించినా, ఆమె చూపిన మాతృమూర్తి త్యాగం వల్ల ఆ బిడ్డ ప్రాణాలతో బయటపడటం అందరినీ కన్నీరు పెట్టిస్తోంది.

* 920కి చేరిన మరణాల సంఖ్య..

వెనెజ్వెలాలో సెకన్ల వ్యవధిలో వెనువెంటనే రెండు భారీ భూకంపాలు సంభవించాయి. ఇందులో రెండో భూకంపం అత్యంత తీవ్రమైనదిగా అధికారులు గుర్తించారు. రిక్టర్ స్కేలుపై దీని తీవ్రత 7.5గా నమోదైంది. ఈ శతాబ్దంలోనే దేశంలో సంభవించిన అత్యంత ఘోరమైన విపత్తులలో ఇది ఒకటిగా నిలిచింది. తాజా సమాచారం ప్రకారం ఈ ప్రకృతి బీభత్సానికి ఇప్పటివరకు 920 మందికి పైగా మరణించారు. అలాగే 3,360 మందికి పైగా తీవ్రంగా గాయపడ్డారు.

* 200 సార్లకు పైగా ప్రకంపనలు (Aftershocks)..

భూకంపం ముగిసిన తర్వాత కూడా వెనెజ్వెలా అంతటా దాదాపు 214 సార్లకు పైగా చిన్నపాటి ప్రకంపనలు (ఆఫ్టర్ షాక్స్) రావడంతో ప్రజలు తీవ్ర భయాందోళనలకు గురవుతున్నారు. రాజధాని కారకస్‌తో పాటు ఉత్తర ప్రాంతంలో ఉన్న ప్రధాన రేవు పట్టణం ‘లా గువైరా’ ఈ భూకంపం ధాటికి అతలాకుతలమైంది. ఇక్కడి సైమన్ బొలివర్ అంతర్జాతీయ విమానాశ్రయం సైతం పాక్షికంగా దెబ్బతిన్నట్లు సమాచారం.

* కొనసాగుతున్న గాలింపు చర్యలు..అంతర్జాతీయ సాయం..

కూలిపోయిన వందలాది భవనాల కింద ఇంకా చాలామంది చిక్కుకుని ఉంటారని అధికారులు భావిస్తున్నారు. అందువల్ల మృతుల సంఖ్య ఇంకా పెరిగే అవకాశం ఉంది. ప్రస్తుతం క్షతగాత్రులకు తాత్కాలిక వైద్య శిబిరాలను ఏర్పాటు చేసి చికిత్స అందిస్తున్నారు. వెనెజ్వెలా ప్రభుత్వ విజ్ఞప్తి మేరకు ఇప్పటికే వందలాది మంది అంతర్జాతీయ రెస్క్యూ నిపుణులు, వైద్య బృందాలు దేశానికి చేరుకుని సహాయక చర్యల్లో ముమ్మరంగా పాల్గొంటున్నాయి.