*క్రూరత్వానికి పరాకాష్ట…
*భార్య ఆత్మహత్య చేసుకుంటుంటే ఆపాల్సింది పోయి.. నవ్వుతూ వీడియో తీసిన భర్త!
ఆకేరు న్యూస్, డెస్క్: మనుషుల మధ్య మానవత్వం మంటగలిసిపోతోంది. కష్టసుఖాల్లో తోడుండాల్సిన భర్తే కాలయముడిగా మారాడు. క్షణికావేశంలో భార్య ఆత్మహత్యకు సిద్ధపడుతుంటే, ప్రాణాలు కాపాడాల్సిన వాడు రాక్షసుడిలా ప్రవర్తించాడు. “ఉరి వేసుకోవాల్సింది అలా కాదు.. ఇలా..” అంటూ వెటకారంగా సలహాలిస్తూ, ఆమె మరణాన్ని తన ఫోన్లో బంధించిన కిరాతక ఘటన కడప జిల్లాలో కలకలం రేపుతోంది.
అసలేం జరిగిందంటే?
కడప జిల్లా రాజంపేట మండలం బోయినపల్లి గ్రామానికి చెందిన శ్రీరామ్ శ్రీనివాస్ రైల్వే శాఖలో లోకో పైలెట్గా పనిచేస్తున్నాడు. అతనికి కృష్ణవేణితో వివాహమైంది. కొంతకాలంగా వీరిద్దరి మధ్య తరచూ మనస్పర్థలు, గొడవలు జరుగుతున్నాయి. ఈ క్రమంలోనే మరోసారి దంపతుల మధ్య తీవ్రస్థాయిలో వాగ్వాదం చోటుచేసుకుంది. భర్త వేధింపులను తట్టుకోలేక, తీవ్ర మనస్థాపానికి గురైన కృష్ణవేణి ఆవేశంతో ఉరి వేసుకుని ఆత్మహత్య చేసుకోవాలని నిర్ణయించుకుంది.
భర్త రాక్షసానందం…
సాధారణంగా ఇంట్లో ఎవరైనా ఇలాంటి అఘాయిత్యానికి పాల్పడుతుంటే కుటుంబ సభ్యులు భయాందోళనతో అడ్డుకుంటారు. కానీ శ్రీనివాస్ మాత్రం ఇందుకు భిన్నంగా ప్రవర్తించాడు. భార్య ఉరితాడు బిగించుకుంటుంటే ఆమెను ఆపడానికి ప్రయత్నించలేదు సరికదా.. తన మొబైల్ ఫోన్ తీసి వీడియో తీయడం మొదలుపెట్టాడు.
“ఉరి వేసుకోవాల్సింది అలా కాదు.. ఇలా వేసుకోవాలి” అంటూ ఆమెను హేళన చేస్తూ, నవ్వుతూ ఆ తతంగం మొత్తాన్ని రికార్డ్ చేశాడు. కళ్ళముందే ప్రాణాలు పోతున్నా కనికరం లేకుండా ప్రవర్తించిన అతని తీరు చూసి స్థానికులు విస్తుపోతున్నారు.
పోలీసుల రంగప్రవేశం…
ఘటనపై సమాచారం అందుకున్న పోలీసులు కేసు నమోదు చేసుకుని దర్యాప్తు ప్రారంభించారు. భార్య ఆత్మహత్యకు ప్రేరేపించడమే కాకుండా, సహాయం చేయకుండా వీడియో తీసిన భర్తను అదుపులోకి తీసుకునే అవకాశం ఉంది. సదరు వీడియోను పోలీసులు స్వాధీనం చేసుకున్నట్లు సమాచారం. ఈ ఘటన స్థానికంగా తీవ్ర చర్చనీయాంశంగా మారింది.
జీవితంలో సమస్యలు ఎదురైనప్పుడు ఆత్మహత్య పరిష్కారం కాదు అని నిపుణులు చెబుతున్నారు.
About the Author
