Mahabubabad | మహబూబాబాద్‌లో ఘోర రోడ్డు ప్రమాదం

Published: 13 Aug 2026 • 11:30 AM

* ఆటో డ్రైవర్ దుర్మరణం

ఆకేరు న్యూస్, మహబూబాబాద్:

మహబూబాబాద్ జిల్లా పరిధిలోని గంధంపల్లి–ఇల్లెందు ప్రధాన రహదారిపై గురువారం ఘోర రోడ్డు ప్రమాదం చోటుచేసుకుంది. వేగంగా వచ్చిన ఆర్టీసీ బస్సు, ఎదురుగా వస్తున్న ఆటోను బలంగా ఢీకొనడంతో ఈ విషాద సంఘటన జరిగింది.

* స్థానికులు తెలిపిన వివరాల ప్రకారం..

గంధంపల్లి–ఇల్లెందు మార్గంలో పయనిస్తున్న ఆర్టీసీ బస్సు, ఆటో ముఖాముఖి ఢీకొన్నాయి. ఈ ప్రమాద తీవ్రతకు ఆటో రోడ్డుపై తీవ్రంగా దెబ్బతిని బోల్తా పడింది. ఈ ఘటనలో ఆటో డ్రైవర్ సాయికి తీవ్ర గాయాలయ్యాయి. ప్రమాదాన్ని గమనించిన వెంటనే స్థానికులు సంఘటనా స్థలానికి చేరుకుని సహాయక చర్యలు చేపట్టారు. అయితే, తీవ్ర రక్తస్రావం కావడంతో డ్రైవర్ సాయి అక్కడికక్కడే మృతి చెందినట్లు స్థానికులు వెల్లడించారు.

సమాచారం అందుకున్న పోలీసులు వెంటనే సంఘటనా స్థలానికి చేరుకుని పరిస్థితిని సమీక్షించారు. ఘటనపై కేసు నమోదు చేసుకుని ప్రమాదానికి గల కారణాలపై విచారణ జరుపుతున్నారు. అనంతరం మృతదేహాన్ని పంచనామా నిర్వహించి, పోస్టుమార్టం నిమిత్తం మహబూబాబాద్ జిల్లా ప్రభుత్వ ఆసుపత్రికి తరలించారు. ఈ ప్రమాదంతో మృతుని కుటుంబంలోనూ, స్థానికంగానూ తీవ్ర విషాద ఛాయలు అలముకున్నాయి.