Palakurthi | ఉపాధ్యాయ ప్రతిభకు గుర్తింపు

Published: 06 Sep 2026 • 07:35 PM

* ‘జిల్లా ఉత్తమ ఉపాధ్యాయ’ అవార్డు గ్రహీత దేవగిరి సూర్యప్రకాష్

ఆకేరు న్యూస్, పాలకుర్తి: విద్యా రంగంలో విశిష్ట సేవలు అందిస్తూ, వినూతన బోధనా పద్ధతులతో విద్యార్థుల మనస్సుల్లో చెరగని ముద్ర వేసుకున్న దర్దేపల్లి ప్రాథమిక పాఠశాల సెకండరీ గ్రేడ్ టీచర్ (SGT) దేవగిరి సూర్యప్రకాష్ జిల్లా స్థాయి ‘ఉత్తమ ఉపాధ్యాయ’ అవార్డును అందుకున్నారు. ఉపాధ్యాయ దినోత్సవం సందర్భంగా జనగామ జిల్లా కేంద్రంలో నిర్వహించిన ఈ వేడుకలో జిల్లా కలెక్టర్ సందీప్ కుమార్ ఝా, స్టేషన్ ఘన్‌పూర్ శాసనసభ్యులు కడియం శ్రీహరి చేతుల మీదుగా ఆయన ఈ ప్రతిష్టాత్మక పురస్కారాన్ని స్వీకరించారు.

సూర్యప్రకాష్, పాఠశాలలో విద్యార్థులకు క్లిష్టమైన విషయాలను సైతం సులభంగా అర్థమయ్యేలా ఆటపాటలతో, దృశ్య శ్రవణ (Audio-Visual) మాధ్యమాలతో బోధిస్తూ ప్రత్యేక గుర్తింపు తెచ్చుకున్నారు. కేవలం పాఠ్యాంశాలకే పరిమితం కాకుండా, విద్యార్థులలో నైతిక విలువలు, సృజనాత్మకత పెంపొందించడంలో ఆయన కృషి ఎంతో ఉందంటూ అధికారులతో పాటు స్థానికులు ప్రశంసించారు.

* విద్యార్థుల భవిష్యత్తే నా లక్ష్యం – సూర్యప్రకాష్, ఎస్‌జీటీ

అవార్డు స్వీకరించిన అనంతరం సూర్యప్రకాష్, మాట్లాడుతూ తన సంతోషాన్ని పంచుకున్నారు. ”ఈ జిల్లా స్థాయి ఉత్తమ ఉపాధ్యాయ అవార్డు రావడం చాలా ఆనందంగా ఉంది. ఇది నా ఒక్కడి కృషి మాత్రమే కాదు, నన్ను ఎల్లప్పుడూ ప్రోత్సహించే నా విద్యార్థులు, పాఠశాల ప్రధానోపాధ్యాయులు, తోటి ఉపాధ్యాయులు, గ్రామస్థులు మరియు విద్యాశాఖ అధికారుల సహకారానికి దక్కిన గుర్తింపు. నేటి సాంకేతిక యుగంలో ప్రభుత్వ పాఠశాల విద్యార్థులు ఎందులోనూ తక్కువ కాకూడదనే ఉద్దేశంతోనే వినూతన బోధనా పద్ధతులను అలవాటు చేశాను. పాఠాలను బట్టీ పట్టించే విధానానికి స్వస్తి చెప్పి, ప్రయోగత్మకంగా నేర్పడం వల్ల పిల్లల్లో ఆలోచనా శక్తి పెరుగుతుంది. ఈ అవార్డు నాపై మరింత బాధ్యతను పెంచింది. మున్ముందు ప్రభుత్వ పాఠశాలల బలోపేతానికి, నాణ్యమైన విద్యనందించడానికి మరింత శక్తివంచన లేకుండా కృషి చేస్తాను.”

ఈ సందర్భంగా దర్దేపల్లి పాఠశాల సిబ్బంది, ఇతర ఉపాధ్యాయ సంఘాల నాయకులు, గ్రామ పంచాయతీ ప్రతినిధులు మరియు విద్యార్థుల తల్లిదండ్రులు సూర్యప్రకాష్‌ను ఘనంగా అభినందించారు. ఆయన మరిన్ని ఉన్నత శిఖరాలను అధిరోహించాలని ఆకాంక్షించారు