Yadadri Collectorate
* సమయానికి రాని అధికారులు, సిబ్బందికి షాక్..
* ప్రధాన గేటుకు తాళం వేయించిన కలెక్టర్
ఆకేరు న్యూస్, యాదాద్రి భువనగిరి జిల్లా : కలెక్టరేట్లో సమయపాలన పాటించని అధికారులు, సిబ్బందిపై ఇన్చార్జ్ కలెక్టర్ భాస్కర్రావు కఠినంగా వ్యవహరించారు. నిర్ణీత సమయానికి విధులకు హాజరుకాకపోవడంపై ఆగ్రహం వ్యక్తం చేస్తూ కలెక్టరేట్ ప్రధాన గేటుకు తాళం వేయించారు.
కలెక్టరేట్లో పనిచేస్తున్న అధికారులు, ఉద్యోగులు ఉదయం 10:30 గంటలకు విధులకు హాజరు కావాల్సి ఉండగా, పలువురు సమయానికి కార్యాలయానికి రావడం లేదని ఇన్చార్జ్ కలెక్టర్కు ఫిర్యాదులు అందాయి. దీంతో పరిస్థితిని స్వయంగా పరిశీలించిన ఆయన.. ఉదయం 10:45 గంటలకు కలెక్టరేట్ ప్రధాన గేటుకు తాళం వేయించారు.
అధికారులు, సిబ్బంది హాజరును పర్యవేక్షించేందుకు ఇప్పటికే లొకేషన్ ఆధారిత హాజరు విధానం అమల్లో ఉన్నప్పటికీ సమయపాలన పాటించకపోవడంపై కలెక్టర్ అసంతృప్తి వ్యక్తం చేశారు.
ఈ సందర్భంగా ఇన్చార్జ్ కలెక్టర్ భాస్కర్రావు మాట్లాడుతూ.. కలెక్టరేట్లో పనిచేస్తున్న అధికారులు, సిబ్బంది ఉదయం 10:30 గంటలకు విధులకు హాజరు కావాలి. ఉదయం 8 గంటలకే రావాలని ఎవరినీ చెప్పలేదు. అయినప్పటికీ నిర్ణీత సమయానికి హాజరు కాకపోవడంతో 10:45 గంటలకు గేటుకు తాళం వేశాం అని తెలిపారు.
ప్రజల నుంచి అధికారులు సమయానికి కార్యాలయాలకు రావడం లేదనే ఫిర్యాదులు రావడంతోనే ఈ చర్యలు చేపట్టినట్లు చెప్పారు. ఇకపై కూడా సమయానికి విధులకు హాజరుకాని వారిపై కఠిన చర్యలు తీసుకుంటామని హెచ్చరించారు. ప్రజలకు సేవ చేయడానికే మనం కార్యాలయాల్లో ఉన్నాం. ఈ విషయాన్ని ప్రతి ఒక్కరూ గుర్తుంచుకుని సమయపాలన పాటిస్తూ విధులకు హాజరు కావాలి” అని ఇన్చార్జ్ కలెక్టర్ స్పష్టం చేశారు.
About the Author
Please tell us what is wrong. Your report will be sent to the website team.
