దర్శకుడు శ్రీకర్‌ నయన్‌
* ‘సమ్మర్‌ హాలిడేస్‌’పై దర్శకుడు శ్రీకర్‌ నయన్‌ ఆసక్తికర వ్యాఖ్యలు
* ఈ నెల 6న థియేటర్లలో విడుదల
Summer Holidays Movie| ఆకేరు న్యూస్, సినిమా: చిన్ననాటి వేసవి సెలవులు, అమ్మమ్మ ఊరు, కొత్త స్నేహాలు, ఆటపాటలు.. ప్రతి ఒక్కరి జీవితంలో మధుర జ్ఞాపకాలుగా నిలిచిపోయే అనుభవాలను వెండితెరపై ఆవిష్కరిస్తూ రూపొందిన చిత్రం ‘సమ్మర్‌ హాలిడేస్‌’. ఈ సినిమాను కేవలం పిల్లల చిత్రంగా చూడకూడదని, పిల్లలు నటించిన పెద్దల సినిమాగా భావించాలని దర్శకుడు శ్రీకర్‌ నయన్‌ అన్నారు. అన్ని వర్గాల ప్రేక్షకులను అలరించేలా పూర్తి వినోదాత్మకంగా ఈ చిత్రాన్ని తెరకెక్కించినట్లు వెల్లడించారు. ఈ నెల 6న ఈ సినిమా ప్రేక్షకుల ముందుకు రానుంది.
నిర్మాత, పంపిణీదారుడు ధీరజ్‌ మొగిలినేని తన ధీరజ్‌ మొగిలినేని ఎంటర్‌టైన్‌మెంట్స్‌ బ్యానర్‌పై ఈ చిత్రాన్ని నిర్మిస్తున్నారు. మాస్టర్‌ రోహన్‌, మాస్టర్‌ అరుణ్‌, బేబీ ఖుషి ప్రధాన పాత్రల్లో నటించగా.. జయసుధ, వాసుకి, హర్షిణి, రాజీవ్‌ కనకాల, హర్షవర్ధన్‌ తదితరులు కీలక పాత్రలు పోషించారు. సినిమా విడుదల నేపథ్యంలో దర్శకుడు శ్రీకర్‌ నయన్‌ మీడియాతో మాట్లాడుతూ చిత్ర విశేషాలను పంచుకున్నారు.
చిన్న సినిమాల నుంచి దర్శకుడిగా..
విశాఖపట్నానికి చెందిన శ్రీకర్‌ నయన్‌కు కాలేజీ రోజుల నుంచే సినిమాలపై ఆసక్తి ఉండేది. అప్పట్లోనే షార్ట్‌ఫిలింస్‌ రూపొందిస్తూ కథలు రాయడం, దర్శకత్వంపై పట్టు సాధించారు. చదువు పూర్తయ్యాక హైదరాబాద్‌కు వచ్చి ‘తెల్లవారితే గురువారం’తో పాటు మరికొన్ని చిత్రాలకు దర్శకత్వ శాఖలో పనిచేశారు. అనంతరం సొంతంగా కథలు సిద్ధం చేసుకుని అవకాశాల కోసం ప్రయత్నించారు.
ఈ క్రమంలో మధుర శ్రీధర్‌ రెడ్డి ద్వారా నిర్మాత ధీరజ్‌ మొగిలినేనిని కలిశారు. తొలుత ఓ థ్రిల్లర్‌ కథ వినిపించగా, అది నచ్చినప్పటికీ మరికొంత అనుభవం సంపాదించుకోవాలని నిర్మాత సూచించారు. ఆ తర్వాత ‘సమ్మర్‌ హాలిడేస్‌’ కథ చెప్పడంతో వెంటనే సినిమా చేసే అవకాశం కల్పించారని దర్శకుడు గుర్తుచేసుకున్నారు.
చిన్ననాటి జ్ఞాపకాలే కథకు స్ఫూర్తి
మొదట ఈ చిత్రానికి ‘సమ్మర్‌ ఫ్రెండ్‌’ అనే టైటిల్‌ అనుకున్నట్లు శ్రీకర్‌ నయన్‌ తెలిపారు. రెండు విభిన్న నేపథ్యాలకు చెందిన పిల్లలు వేసవి సెలవుల్లో స్నేహితులుగా మారితే ఎలా ఉంటుందనే ఆలోచనతో కథను రూపొందించినట్లు చెప్పారు.
వేసవి సెలవుల్లో అమ్మమ్మ ఊరికి వెళ్లడం, స్నేహితులతో క్రికెట్‌ ఆడటం, తాటి ముంజలు తినడం, అమ్మమ్మ చెప్పే కబుర్లు వినడం వంటి అనుభవాలు ప్రతి ఒక్కరికీ ఉంటాయని పేర్కొన్నారు. అలాంటి మధురమైన జ్ఞాపకాలను ప్రేక్షకులకు మరోసారి గుర్తుచేసేలా సినిమాను తెరకెక్కించినట్లు వివరించారు.
జయసుధ పాత్ర ప్రత్యేక ఆకర్షణ
ఈ చిత్రంలో సీనియర్‌ నటి జయసుధ అరుణ్‌ అమ్మమ్మ పాత్రలో కనిపించనున్నారు. ఆమె పాత్ర ప్రేక్షకులకు ప్రత్యేక ఆకర్షణగా నిలుస్తుందని దర్శకుడు చెప్పారు. ముఖ్యంగా అరుణ్‌, జయసుధ మధ్య వచ్చే సన్నివేశాలు భావోద్వేగానికి గురిచేస్తాయని తెలిపారు.
అలాగే వాసుకి పాత్రకు కథలో మంచి ప్రాధాన్యం ఉందన్నారు. సినిమాలోని ప్రధాన సందేశం, క్లైమాక్స్‌లో వచ్చే బలమైన సంభాషణలు ఆమె పాత్ర ద్వారా ప్రేక్షకులకు చేరుతాయని వెల్లడించారు.
వందమంది పిల్లలతో షూటింగ్‌ సవాల్‌!
పిల్లలతో సినిమా చేయడం అంత సులభం కాదని దర్శకుడు తెలిపారు. షూటింగ్‌కు ముందే ప్రత్యేక వర్క్‌షాప్‌లు నిర్వహించి పిల్లలకు శిక్షణ ఇచ్చినట్లు చెప్పారు. ఈ చిత్రంలో దాదాపు వందమంది పిల్లలు నటించారని వెల్లడించారు.
రోహన్‌, అరుణ్‌ ఎంతో ప్రతిభావంతులని, గోదావరి యాసను సైతం నేర్చుకుని సహజంగా నటించారని ప్రశంసించారు. అయితే ఇంతమంది పిల్లలతో షూటింగ్‌ నిర్వహించడం తమకు పెద్ద సవాలుగా మారిందని సరదాగా చెప్పారు. ఒకరు షూటింగ్‌లో పాల్గొంటుంటే మరొకరు ఆడుకోవడానికి వెళ్లిపోయేవారని గుర్తుచేసుకున్నారు.
యాక్షన్‌ సినిమాల మధ్య ఆహ్లాదకరమైన కథ
ఈ సినిమాను వేసవి సెలవుల్లోనే విడుదల చేయాలని మొదట భావించినప్పటికీ, సరైన విడుదల తేదీ లభించకపోవడంతో వాయిదా పడిందని శ్రీకర్‌ నయన్‌ తెలిపారు. చివరకు ఈ నెల 6న థియేటర్లలోకి తీసుకొస్తున్నట్లు చెప్పారు.
ప్రస్తుతం ప్రేక్షకులు యాక్షన్‌, హింసాత్మక సన్నివేశాలతో కూడిన సినిమాలను ఎక్కువగా చూస్తున్నారని, అలాంటి సమయంలో ‘సమ్మర్‌ హాలిడేస్‌’ ఆహ్లాదకరమైన భావోద్వేగాలతో ప్రేక్షకుల ముఖంపై చిరునవ్వు తెస్తుందని ఆశాభావం వ్యక్తం చేశారు.
ఇద్దరు పిల్లల సమస్యల చుట్టూ కథ
ఈ సినిమాలో రోహన్‌, అరుణ్‌ పోషించిన పాత్రలకు వేర్వేరు సమస్యలు ఉంటాయని దర్శకుడు వివరించారు. ఆ సమస్యలను వారు ఎలా ఎదుర్కొన్నారు? వేసవి సెలవులు వారి జీవితాల్లో ఎలాంటి మార్పు తీసుకొచ్చాయి? అనేదే కథలో ఆసక్తికరమైన అంశమని చెప్పారు.
‘సత్యం సుందరం’ తరహాలో పాత్రలు, భావోద్వేగాల ద్వారా కథలోని సందేశాన్ని ప్రేక్షకులకు చేరువ చేయాలని ప్రయత్నించినట్లు తెలిపారు. షూటింగ్‌ సమయంలోనే అరుణ్‌ నటించిన ‘35 – ఇది చిన్న కథ కాదు’ చిత్రానికి జాతీయ అవార్డు రావడం తమ బృందానికి ఎంతో ఆనందాన్ని ఇచ్చిందన్నారు.
సినిమా విజయంపై నమ్మకం
‘సమ్మర్‌ హాలిడేస్‌’ విజయంపై తాను, నిర్మాత ధీరజ్‌ మొగిలినేని ఎంతో నమ్మకంగా ఉన్నామని శ్రీకర్‌ నయన్‌ తెలిపారు. నిర్మాత తన సన్నిహితులకు సినిమాను చూపించగా మంచి స్పందన వచ్చిందని చెప్పారు. చిన్ననాటి జ్ఞాపకాలు, కుటుంబ అనుబంధాలు, స్నేహం, భావోద్వేగాల కలయికగా రూపొందిన ఈ చిత్రం ప్రేక్షకులను ఆకట్టుకుంటుందని ఆశాభావం వ్యక్తం చేశారు.
About the Author
Please tell us what is wrong. Your report will be sent to the website team.
