MAHARASHTRA | చంద్రపూర్‌లో పులి బీభత్సం..

Published: 22 May 2026 • 10:20 AM

* చంద్రపూర్‌లో నరమేధం.. నరభక్షక పులి వేట

ఆకేరు న్యూస్, డెస్క్: మహారాష్ట్రలోని చంద్రపూర్ జిల్లాలో గుండెలు పిండేసే ఘోర విషాదం చోటుచేసుకుంది. సిందేవాహి తాలూకా పరిధిలోని అటవీ ప్రాంతంలో తునికాకు (బీడి ఆకులు) సేకరించేందుకు వెళ్లిన గిరిజన మహిళలపై ఒక పులి ఒక్కసారిగా విరుచుకుపడింది. ఈ మెరుపు దాడిలో నలుగురు మహిళలు అక్కడికక్కడే ప్రాణాలు కోల్పోగా, మిగిలిన వారు తృటిలో ప్రాణాలతో బయటపడ్డారు. ఈ ఘటనతో స్థానిక గ్రామాల్లో తీవ్ర భయాందోళనలు, ఉద్రిక్త వాతావరణం నెలకొన్నాయి.

* తునికాకు వేటలో ఊహించని ప్రమాదం..

స్థానిక గుంజేవాహి గ్రామానికి చెందిన 13 మంది మహిళల బృందం ఉదయాన్నే సమీపంలోని ‘గుంజేవాహి-పవన్ పార్’ అటవీ ప్రాంతానికి తునికాకు సేకరించడానికి వెళ్లారు. వేసవి కాలంలో ఈ ప్రాంత కుటుంబాలకు ఈ ఆకుల సేకరణే ప్రధాన జీవనాధారం. ఉదయం 8 గంటల ప్రాంతంలో మహిళలంతా అడవిలో ఆకులు ఏరుకోవడంలో నిమగ్నమై ఉండగా.. పొదల్లో పొంచి ఉన్న పులి అత్యంత వేగంగా, వరుసగా దాడులు చేసింది. ఈ దాడిలో నలుగురు మహిళలకు కోలుకునే అవకాశం కూడా లేకుండా పోయింది. వారు తీవ్ర గాయాలతో అక్కడికక్కడే మరణించారు. మిగిలిన 9 మంది మహిళలు భయంతో పెద్ద పెట్టున కేకలు వేస్తూ, ప్రాణాలు గుప్పిట్లో పెట్టుకుని అడవి వెలుపలికి పరుగులు తీశారు.

* రంగంలోకి అటవీ శాఖ…

ఈ ఘోర ఉదంతంపై సమాచారం అందుకున్న వెంటనే ఫారెస్ట్ అధికారులు, పోలీసులు రంగంలోకి దిగారు. దాడికి పాల్పడిన పులిని గుర్తించడానికి ఘటనా స్థలంలో తక్షణమే 15 కంటే ఎక్కువ కెమెరా ట్రాప్‌లను, నిఘా కోసం థర్మల్ డ్రోన్లను ఏర్పాటు చేశారు. పులిని బంధించడానికి ప్రత్యేక షార్ప్ షూటర్లు, ట్రాంక్విలైజర్ (మత్తుమందు) బృందాలను సిద్ధంగా ఉంచారు. మరోవైపు, వన్యప్రాణుల దాడిలో మరణించిన వారి కుటుంబాలకు మహారాష్ట్ర ప్రభుత్వ నిబంధనల ప్రకారం రూ. 20 లక్షల ఆర్థిక సహాయం అందజేస్తామని అధికారులు ప్రకటించారు.

* శోకసంద్రంలో గ్రామం..

ఒకే గ్రామానికి చెందిన నలుగురు మహిళలు మృత్యువాత పడటంతో గుంజేవాహి గ్రామం శోకసంద్రంలో మునిగిపోయింది. అటవీ శాఖ నిర్లక్ష్యం వల్లే ఈ ప్రమాదం జరిగిందంటూ ఆగ్రహించిన గ్రామస్థులు అధికారుల వాహనాలను అడ్డుకుని నిరసన తెలిపారు. సదరు పులిని వెంటనే పట్టుకునే వరకు తాము మృతదేహాలను కదిలించబోమని భీష్మించుకు కూర్చోవడంతో అటవీ ప్రాంతంలో భారీగా పోలీసు బందోబస్తు ఏర్పాటు చేయాల్సి వచ్చింది.

* ఒంటరిగా అడవుల్లోకి వెళ్లొద్దు…

ప్రసిద్ధ ‘తడోబా అంధారి టైగర్ రిజర్వ్’ (TATR) పరిసర ప్రాంతాల్లో వేసవి తీవ్రతకు, నీటి కోసం పులులు అటవీ అంచుల వైపు రావడం వల్ల ఇలాంటి మానవ-మృగ సంఘర్షణలు పెరుగుతున్నాయి. తునికాకు సీజన్ కావడంతో ప్రజలు గుంపులుగా వెళ్లాలని, ఒంటరిగా అడవుల్లోకి వెళ్లవద్దని అధికారులు హెచ్చరిస్తున్నారు. స్థానిక అటవీ ప్రాంతంలో ప్రస్తుతం గస్తీని ముమ్మరం చేశారు.