IPS Uday Krishna Reddy | మిర్యాలగూడలో ఉదయ్ కృష్ణారెడ్డి అరెస్ట్.

Published: 29 Jul 2026 • 11:22 AM

* మహిళా ట్రైనీ ఐపీఎస్‌పై వేధింపుల కేసులో పోలీసుల చర్య

ఆకేరు న్యూస్, హైదరాబాద్: మహిళా ట్రైనీ ఐపీఎస్ అధికారిణిపై లైంగిక వేధింపులకు పాల్పడిన కేసులో నిందితుడు ఉదయ్ కృష్ణారెడ్డిని అత్తాపూర్ పోలీసులు అరెస్ట్ చేశారు. హైదరాబాద్‌కు వస్తున్న క్రమంలో నల్గొండ జిల్లా మిర్యాలగూడ వద్ద అతడిని పోలీసులు మంగళవారం అదుపులోకి తీసుకున్నారు. అనంతరం భారీ భద్రత నడుమ అతడిని అత్తాపూర్ పోలీస్ స్టేషన్‌కు తరలించి విచారణ ముమ్మరం చేశారు.

* కేసు నేపథ్యం…
పోలీస్ వర్గాల సమాచారం ప్రకారం.. సదరు మహిళా ట్రైనీ ఐపీఎస్ అధికారిణిని ఉదయ్ కృష్ణారెడ్డి కొంతకాలంగా తీవ్రంగా లైంగికంగా మరియు మానసికంగా వేధిస్తున్నట్లు ఆరోపణలు ఉన్నాయి. బాధితురాలు ఇచ్చిన ఫిర్యాదు మేరకు ఈ నెల 18న అత్తాపూర్ పోలీస్ స్టేషన్‌లో ఉదయ్ కృష్ణారెడ్డిపై పలు తీవ్రమైన సెక్షన్ల కింద కేసులు నమోదయ్యాయి. కేసు నమోదు చేసిన పోలీసులు దర్యాప్తు వేగవంతం చేశారు.

* ఆత్మహత్యాయత్నం.. ఆపై మిస్సింగ్ నాటకం…

కేసు నమోదు కావడంతో మానసిక ఒత్తిడికి గురైన ఉదయ్ కృష్ణారెడ్డి ఈ నెల 20న ఆత్మహత్యాయత్నానికి పాల్పడ్డాడు. దీంతో స్థానికులు అతడిని చికిత్స నిమిత్తం ప్రైవేట్ ఆస్పత్రికి తరలించారు. అయితే, ఆస్పత్రి నుంచి డిశ్చార్జ్ అయిన వెంటనే అతడు పోలీసులకు చిక్కకుండా కనిపించకుండా పోయాడు. అరెస్ట్ భయంతోనే అతడు పరారయ్యాడని ప్రచారం జరిగింది.

* ‘నేను పారిపోలేదు’ అంటూ మీడియాకు క్లారిటీ.. ఆ వెంటే అరెస్ట్..
తాను ఎక్కడికీ పారిపోలేదని, పోలీసుల విచారణకు సహకరిస్తానని ఉదయ్ కృష్ణారెడ్డి నిన్ననే మీడియా ముందుకొచ్చి ప్రకటన విడుదల చేశాడు. అయితే, అతడి కదలికలపై నిఘా ఉంచిన అత్తాపూర్ పోలీసులు.. హైదరాబాద్ వైపు వస్తుండగా మిర్యాలగూడ వద్ద అతడిని కచ్చితమైన సమాచారంతో అడ్డుకుని అదుపులోకి తీసుకున్నారు.

* న్యాయస్థానంలో హాజరుపరచే అవకాశం…
ఉదయ్ కృష్ణారెడ్డిని అత్తాపూర్ పోలీస్ స్టేషన్‌కు తీసుకొచ్చిన పోలీసులు.. లైంగిక వేధింపుల కేసుతో పాటు ఇతర అంశాలపై తీవ్రంగా ప్రశ్నిస్తున్నారు. వైద్య పరీక్షల అనంతరం అతడిని న్యాయమూర్తి ముందు హాజరుపరచనున్నట్లు సమాచారం. ఈ ఘటన ఉన్నతాధికారుల వర్గాల్లోనూ, సాధారణ ప్రజల్లోనూ తీవ్ర కలకలం రేపుతోంది.