Hyderabad Metro Bus Pass | ప్రయాణికులకు గుడ్ న్యూస్

Published: 05 Nov 2026 • 03:25 PM

* రోజంతా రూ.325 మాత్రమే

* మెట్రో, ఆర్టీసీ ఒకే పాస్

* దీపావళి నుంచి కొత్త ధరలు

ఆకేరు న్యూస్, హైదరాబాద్: నగరంలో మెట్రో రైళ్లు, ఆర్టీసీ బస్సుల్లో నిత్యం ప్రయాణించే వారికి ఊరట కలిగించేలా ఉమ్మడి ప్రయాణ పాస్ ధరలను తగ్గించేందుకు ప్రభుత్వం కసరత్తు చేస్తున్నట్లు సమాచారం. ప్రస్తుతం అధికంగా ఉన్న మెట్రో-ఆర్టీసీ కాంబినేషన్ పాస్ ధరలను భారీగా తగ్గించాలని నిర్ణయించినట్లు తెలుస్తోంది. ప్రతిపాదిత ధరల ప్రకారం రోజువారీ పాస్‌ను రూ.400 నుంచి రూ.325కు, నెలవారీ పాస్‌ను రూ.8,500 నుంచి రూ.4,000 లేదా రూ.4,500కు తగ్గించనున్నారు. కొత్త ధరలు దీపావళి నుంచి అమల్లోకి వచ్చే అవకాశం ఉన్నట్లు రవాణా వర్గాల సమాచారం.

రోజువారీ పాస్ ధర రూ.325

హైదరాబాద్‌లో మెట్రో రైలు, టీజీఎస్‌ఆర్టీసీ బస్సుల్లో ఒకే పాస్‌తో ప్రయాణించే సదుపాయాన్ని అందుబాటులోకి తీసుకొచ్చారు. అయితే మొదట నిర్ణయించిన ధరలు ఎక్కువగా ఉండటంతో ప్రయాణికుల నుంచి ఆశించిన స్పందన రాలేదు. ప్రస్తుతం రోజువారీ ఉమ్మడి పాస్ ధర రూ.400గా ఉంది. దీనిని రూ.325కు తగ్గించాలని నిర్ణయించినట్లు తెలుస్తోంది. ప్రతిపాదిత విధానం ప్రకారం రోజువారీ పాస్‌లో ఆర్టీసీకి రూ.75, మెట్రో రైలుకు రూ.250 కేటాయించేలా చర్చలు జరిగినట్లు సమాచారం. దీంతో ప్రయాణికులు ఒకే పాస్‌తో రోజంతా రెండు రవాణా వ్యవస్థల్లోనూ ప్రయాణించే అవకాశం ఉంటుంది.

నెలవారీ పాస్ ధర సగానికి తగ్గింపు

నెలవారీ ఉమ్మడి పాస్ ధరను కూడా గణనీయంగా తగ్గించేందుకు అధికారులు ప్రతిపాదనలు సిద్ధం చేసినట్లు తెలుస్తోంది. ప్రస్తుతం నెలవారీ పాస్ ధర రూ.8,500గా ఉండగా.. దానిని రూ.4,000 లేదా రూ.4,500కు పరిమితం చేయాలని యోచిస్తున్నారు. ఈ ప్రతిపాదన ప్రకారం ఆర్టీసీకి రూ.1,000, మెట్రో రైలుకు రూ.3,000 లేదా రూ.3,500 కేటాయించేలా ప్రాథమికంగా చర్చలు జరిగినట్లు సమాచారం. ఈ నిర్ణయం అమల్లోకి వస్తే నెలవారీ పాస్ తీసుకునే ఉద్యోగులు, విద్యార్థులు, ఇతర రోజువారీ ప్రయాణికులపై ఆర్థిక భారం తగ్గనుంది.

ఆర్టీసీ, మెట్రో అధికారుల మధ్య చర్చలు

ఉమ్మడి పాస్ ధరల తగ్గింపుపై ఆర్టీసీ ఎండీ నాగిరెడ్డి, మెట్రో రైలు సలహాదారు ఎన్వీఎస్ రెడ్డి మధ్య చర్చలు జరిగినట్లు సమాచారం. ధరల తగ్గింపుపై ఇరువర్గాలు ఒక అవగాహనకు వచ్చినట్లు తెలుస్తోంది. తదుపరి రాష్ట్ర ప్రభుత్వ ప్రధాన కార్యదర్శి సంజయ్ జాజుతో ఆర్టీసీ ఎండీ, మెట్రో రైలు సలహాదారు సమావేశమై తుది ప్రతిపాదనలపై చర్చించనున్నట్లు సమాచారం. ఈ సమావేశం అనంతరం పాస్ ధరలపై పూర్తి స్పష్టత వచ్చే అవకాశం ఉంది.

దీపావళి నుంచి కొత్త ధరలు

ప్రభుత్వం ఆమోదం తెలిపిన తర్వాత తగ్గించిన ధరలను దీపావళి నుంచి అమల్లోకి తీసుకురావాలని యోచిస్తున్నట్లు రవాణా వర్గాల ద్వారా తెలుస్తోంది. అయితే దీనిపై అధికారిక ప్రకటన వెలువడాల్సి ఉంది. కొత్త ధరలు అమల్లోకి వస్తే హైదరాబాద్‌లో మెట్రో, ఆర్టీసీ బస్సులను నిత్యం వినియోగించే ప్రయాణికులకు ప్రయోజనం కలగనుంది. ముఖ్యంగా ఉద్యోగులు, విద్యార్థులు, రోజూ నగరంలోని వివిధ ప్రాంతాలకు రాకపోకలు సాగించే వారికి ప్రయాణ ఖర్చులు తగ్గే అవకాశం ఉంది. కాగా, రోజువారీ పాస్ రూ.325, నెలవారీ పాస్ రూ.4,000-4,500గా నిర్ణయించే ప్రతిపాదనలు ప్రస్తుతం చర్చల్లో ఉన్నట్లు సమాచారం. తుది ధరలు, అమలు తేదీపై ప్రభుత్వం అధికారిక ప్రకటన చేసిన తర్వాతే పూర్తి వివరాలు వెల్లడికానున్నాయి.